भांगरभूंय | प्रतिनिधी
तवडकार : कोमरपंत समाजांतल्या आनीक दोगांचीं घरां बांदतले
भांगरभूंय । प्रतिनिधी
काणकोण : आदल्या काळांत शेजाऱ्यांक, घरच्यांक एकामेकाक आदार करून त्या त्या व्यक्तींचीं घरां बांदताले. शेतांतलीं कामां लेगीत तशीच करताले. मदल्या काळांत ह्या गजालींक खंड पडलो. लोकश्रमांतल्यान आदार करपाची जी आदली पद्दत आशिल्ली, ते पद्दतीचो आयज लेगीत उपेग करून मनीसपण सांबाळपाच्या वावराक सुरवात केल्या, अशें काणकोणचे आमदार तशेंच सभापती रमेश तवडकार हांणी सांगलें.
कोमरपंत समाजांतले देवाबागचे मंजुनाथ सदानंद कोमरपंत आनी तेंबेवाड्या वयले योगेश उद्देश कोमरपंत हांचीं घरां श्रमधाम येवजणेंतल्यान बांदपा संबंदांतली फुडली कृती करपाचे नदरेन देवाबागचे धालपुरूस कोमरपंत समाजाचे अध्यक्ष संतू कोमरपंत आनी बुधवंत शाणीत कोमरपंत हांणी देवाबागांतबसका आपयल्ली. ते बसकेंत तवडकार मार्गदर्शन करताले. ह्या वेळार माचयेर कोमरपंत समाजाचे फुडारी बाबू कोमरपंत, संतू कोमरपंत, शाणीत कोमरपंत, भाजपचे काणकोण मंडळ सरचिटणीस दिवाकर पागी, नागेश कोमरपंत हाजीर आशिल्ले.
श्रमधामांतल्यान 100 घरां बांदपाचो निश्चेव केला. आतां मेरेन 36 घरां बांदल्यांत, जाल्यार 4 घरांचें काम चालू आसा. फुडल्या कांय दिसांनी हीं चारूच घरां बांदून पुराय जातलीं आनी तांच्यो चावयो दिवपाची कार्यावळ जातली, अशें तवडकार हांणी सांगलें.
फाटल्या 45 वर्सां आदीं देवाबागच्या धालपुरूस ह्या कोमरपंत समाजाच्या वास्तूचें लेगीत काम समाजांतल्या दरेके व्यक्तीन श्रमदानानूच केल्लें. आतां श्रमधामां वरवीं जावपी दोन घरांचें काम करचे खातीर समाजांतले लोक मुखार सरतले, असो विस्वास संजय कोमरपंत हांणी उक्तायलो. ह्या वेळार बाबू कोमरपंत आनी दिवाकर पागी हांचींय भाशणां जालीं. नागेश कोमरपंत हांणी सुत्रसंचालन केलें जाल्यार संतू कोमरपंत हांणी उपकार मानले. ही बसका येसस्वी करचे खातीर उदय कोमरपंत, दास कोमरपंत आनी दिशेन कोमरपंत हांणी कश्ट घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
