भांगरभूंय | प्रतिनिधी
आतां खंयचोय कामाचो दीस पळयात, सांजेच्या साडेपांच वरां उपरांत शारांतल्या रस्त्यांचेर मुखेल करून चार रस्त्यांचेर कितें घडटा? सगले वटेन येवपी गाडयो, स्कुटरी, क्लासांक गेल्लीं भुरगीं
ना रहे वो पुराने सुनहरे दिन, ना रहीं वो सुनी सडकें… अशें एके गाडयेचे जायरातींत म्हणिल्लें. व्हडलेशें चेंपें घालून उक्त्या कॅडिलेक गाडयेंत बसून पदां म्हणत वचपी आमचे सुपरस्टार आतां फक्त केन्ना केन्नाय पोरण्यां पदांच्या चॅनलाचेर दिश्टी पडटात, नाजाल्यार फक्त आमच्या चितनांत उरतात. त्या वेळार रस्त्यार कांय बोटार मेजपा इतल्यो गाडयो आसताल्यो. रस्तेय बी माणकुले जावं पूण घटमूट आसताले. गाडयेन भोंवप म्हणल्यार एक मनरिजवणो असो सोबीतसो अणभव आसतालो.
आतां खंयचोय कामाचो दीस पळयात, सांजेच्या साडेपांच वरां उपरांत शारांतल्या रस्त्यांचेर मुखेल करून चार रस्त्यांचेर कितें घडटा? सगले वटेन येवपी गाडयो, स्कुटरी, क्लासांक गेल्लीं भुरगीं, तांचीं व्हडलीं- व्हडलीं बॅगां आनी खांचींतल्यान स्कुटरीक वाट काडपी तांचीं मम्मा वा डॅडा. जण एकल्याक घरा पावपाची ताकतीक आसता. मनांत कितलेशेच विचार. भुरग्यांच्यो परिक्षा, रिणाचे हप्ते हांगाच्यान ते दुसरे दिसाच्या टिफीना मेरेन. अशें म्हणटात की विचार खूबच बळिश्ट आसात. विचारांक भोवतेक काणयो सत्यांत हाडपाचें बळ आसता. (संदर्भ पुस्तक: पावर आॅफ सबकाॅन्शियस मांयड- डाॅ. जोसफ मर्फी, द सिक्रेट- रोंडा बर्न) ह्या सगल्या रस्त्यां वयल्या लोकांचे इतले शेंकड्यांनी विचार थंय आनी एक भावनीक ब्लाॅक बी तयार करता काय? ‘थिंक अॅण्ड ग्रो रिच’ ह्या पुस्तकाचे सुरवातेक थाॅमस एडीसन हांचे उदारण दिवन बरोवपी नेपोलियन हिल हांणी मनांतल्या विचारांचो प्रभाव सांगला.
महाराष्ट्रांत भोंवतना रस्त्यांचे कडेनी कांय बोर्ड दिश्टी पडटात. ‘अती घाई संकटात नेई’- प्रत्येकान आपूण सगल्यांत बिझी आशिल्ले भशेन रस्त्यार वावुरतना आपल्या वांगडा रस्त्यार दुसरेय जाण बी आसात, हाचें भान दवरलें जाल्यार? एके कडेन वाचिल्ले, ‘अती स्वार्थ ही अधोगतीची सुरुवात’. गाडी चलयतना ‘हांव पयलीं, तूं रस्त्यार पड नाजाल्यार फोंडांत पड, म्हाका लागना’ हे सुवार्थी विचार आसतात ते खूब फावटी दुसऱ्यांच्या जिवार येवपाक शकता, जो सांबाळून गाडी चलयता ताच्या. रस्त्या वयले बुराक आनी व्हडले फोंड चुकयतना गाडी वा स्कूटर रस्त्याच्या दुसरे वटेन केन्ना पावली ते समजना आनी दुसरे वटेन येवपी वाहनाक केन्ना तेंकली हेय कळपाक कळाव जाता. येरादारी पुलीस मुखार आसात म्हूण हेल्मेट नासल्यार कच्च करून मदींच ब्रेक मारून फाटीं पळयनासतना यु टर्न मारपी कांय सभागे आसतात. फाटल्यान येवपी मनशाक कशें कळपाचें की हो गाडी भर रस्त्यार घुंवडावपाचो आसा?
गाडी जेन्ना थारायतात वा थारिल्ली गाडी रस्त्यार हाडटात तेन्ना फाटीं फुडें पळोवन सारको सिग्नल दिवप, सायड लायटीचो वेळर वापर करप, ब्रेक लायट पेट्टा काय ना तें पळोवप… ह्यो कांय भोव गरजेच्यो गोश्टी जावन आसात. तशें सायड लायटीचो वापर गाडी घुंवडायतनाच न्ही तर गाडी घुंवडावचे थोडो वेळ पयलीं करचो, जामे करून फाटले चलोवपी सादूर जावचे. ह्यो ल्हान- सान पूण मोलादीक गजाली येरादारी सुरळीत जावपाक मजत करतात. थोड्यांक सायड लायट मारपाक पसून कमीपणां दिसता कांय अशें जाणवता. धस्स करून गाडी खंयचेय वटेन घुंवडावप म्हणल्यार व्हडलें झेताचें काम केलें काय?
कानाक मोबायल लावन, स्कूटरीच्या तोंकार बसून एका हातान ज्या हातांत स्कुटरीचो मुखा वयलो ब्रेक आसता अशें कांय जाण पळोवपाक मेळटात. मदींच कच्च करून फुडलो ब्रेक मारतगेर कितें जातलें तें आनी आनीक सांगपाक जाय? मागीर मोबायल एके कडेन, स्कूटर एके कडेन आनी हो एके कडेन… येरादारीक ब्रेक लागता तो वेगळोच.
येरादारी पुलिसांक टार्गेट दितात अशें आयकूंक येता. तालांव मारपाचें टार्गेट. तें तालावांचें आसपाक जाय काय येरादारी सुदारपाक हातभार लावपी लोक वाडोवपाचें? मनशाचो जीव खूब सवाय जाला. त्याच वांगडा दुसऱ्यां विशीं बरें चिंतप वा दुसऱ्याचें सारकें आयकून घेवप हेंय बी कमी जायत आसा. गरज आसा ती एका मनशान दुसऱ्याक सांबाळून घेवपाची आनी मनीसपण जतन करपाची. आयजकाल मोटारसायकलीं परस स्कूटरी रस्त्यार चड दिश्टी पडटात. बायलांक चलोवपाक सोंपी वा मुखार कितेंय दवरपाक मेळटा ही गजाल खरी. पूण गियराचे मोटारसायकलीचेर जो कंट्रोल आसता तो स्पीडीन वचपी स्कुटरीचेर आसत? ई बायक तर सूंऽऽऽ करून केन्ना राँग सायडीच्यान गेली तें कळच ना. एका तेंपार मुखरल्यान जर व्हडली गाडी येता जाल्यार स्कुटरवाले जिवाक सांबाळून सवका कुशींतल्यान वताले. हालीं कितें जाता?
तिळसांजचो काळोख जातकच जर कोण स्कुटरीन कितें कामाक भायर सरलो जाल्यार खुबश्या वाठारांनी पांच- स सुण्यांचें भिरें फाटीक लागता. मागीर स्कुटर चलोवप्याक फास्ट वचप काय थंयच रावप हेंच समजना. ह्या बोवाळांत तो पडपाची शक्यताय वाडटा. आयजकाल गाडयेचो हाॅर्न मारप्यार लेगीत सुणी वा गोरवां कुशीक सरनात. गाडी येवन तेंक म्हणसर तशींच रावतात. तांच्या तकलेंत कितें चलता काय? रस्तो हो सुणीं- गोरवां खातीर, फोडपा खातीर काय येरादारी खातीर?
सोशल मिडीयाचेर कोणय गाडी घेवन भोंवडी करता आनी पळोवपी म्हणटा, आमीय बी या मरे. परिणाम? येरादारी वाडप. आजकाल भाड्याच्यो गाडयो गोंयभर दिश्टी पडटात.चडशे फावट पर्यटकांक गोंयचे रस्ते खबर आसनात म्हणून ते गुगल मॅप पळयत गाडयो चलयतात. चलयतना ते सैम पळयतात. रस्तो चुकलो म्हूण मदींच गाडी थारायतात. येरादारी आनी लोकांच्या सुरक्षेचो विचार केलो जाल्यार एक एड आॅन फिचर म्हणल्यार रेंट अ कारी वांगडा ड्रायव्हर कम गायड अशें जर करीत जाल्यार थोडे लोक कामाक लागतले तें जालेंच त्या भायर गाडी हातांत बशिल्ली आशिल्ल्यान बरी येरादारी जावपाक हातभार लागतलो तशेंच जे पर्यटक गाडयेंत आसतात तेय बी सुरक्षीत. बरे भशेन गोंय पळयात तेंय बी वेळ वगडायनासतना.
आमचे सिंगापूर भोंवणेंतलो एक मोलादीक अणभव सांगता. आमी रस्तो क्राॅस करपाचो आसतना मदींच सिग्नल ग्रीन जालो. फुडल्यान येवपी गाडयेक वचपाचो तो सिग्नल आशिल्लो. पूण ती गाडी सवकाश रावली आनी तुमी पयलीं वचात अशी गाडी चलोवप्यान खूण केली. ही गजाल चिंतनात घट उरली. उदरगत, विकास जो आसा तो मानसीक पांवड्याचेर जाल्यार चड बरें न्हय? ही जी गजाल थंय पळयली ती भारतांतल्या रस्त्यांचेर जायत काय?
– आदर्श विलास सिनाय कुडचडकार
9823251212
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
