भांगरभूंय | प्रतिनिधी
केपें सरकारी म्हाविद्यालयांत लिप्यांतर कार्यशाळेचें आयोजन
भांगरभूंय । प्रतिनिधी
केपें: लिप्यंतरण आनी अणकार हांकां लागून साहित्य वाचकवर्गांचो विस्तार जाता अशें नामनेचे कोंकणी साहित्यीक, अनुवादक, कोशकार मुकेश थळी हांणी सांगलें. हे यत्न वल्ली क्वाड्रोस, शैलेन्द्र मेहता आनी हेरांच्या यत्नांक लागून आयज व्हड प्रमाणांत आनी गतीन जावपाक लागल्यात ही कोंकणी खातीर एक समाधानाची गजाल आसा अशें तांणी मुखार सांगलें.
कोंकणी भाशा मंडळ, आशावादी प्रकाशन आनी सरकारी कला, विज्ञान आनी वाणिज्य म्हाविद्यालय, केपें हांच्या जोड पालवान मंगळारा केपें कॉलेजींत लिप्यंतरणाचेर खास कार्यशाळा आयोजीत केल्ली. ताच्या समारोप सत्रांत थळी उलयताले. रंगतरंग ह्या पुस्तका खातीर साहित्य अकादेमीचो पुरस्कार फावो जाल्ले खातीर मुकेश थळी हांचो सत्कार जालो.
नाटक हो सगल्यांत कठीण साहित्य प्रकार आनी तो कित्याक हें सांगतना थळी हांणी नाटकांत सादरीकरण मूल्य संतुलीत प्रमाणांत जाय आसता. जातूंत नेपथ्य, आवाजा येवजण, उजवाडा येवजण आनी हेर तंत्रीक आंगांचो आस्पाव आसता. हो रंग परिणाम सुसुत्र आनी एकवटीत रुपांत रंगमाचयेर मंचीत आनी आविश्कृत जावंक जाय अशें थळी हांणी सांगलें.
प्रा. दीपराज सातोर्डेकार हांणी थळी हांची वळख करून दिली.
डॉ. चंद्रलेखा डिसोझा, डॉ. जयंती नायक, वल्ली क्वाड्रोस, ग्वादालूप डायस, विन्सी क्वाद्रूश हांचींय उलोवपां जालीं. शैलेन्द्र मेहता हांणी सुत्रसंचालन केलें.
सकाळच्या सत्रांत लिप्यंतरणाचीं मुळावीं तत्वां, लिप्यंतरणा खातीर तंत्रगिन्यानाचो वापर आनी असायनमेंट लिप्यंतरण ह्या विशयाचेर मार्गदर्शन जालें. तातूंत विद्यार्थ्यांक लिप्यंतरणाच्या वेगळ्यावेगळ्या तासां विशीं शिकूंक मेळ्ळें. लिप्यंतरण केल्ल्या कांय कोंकणी पुस्तकांचें मुकेश थळी आनी हेर मानेस्तांचे हस्तुकीं प्रकाशन जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
