भांगरभूंय | प्रतिनिधी
भुरगीं म्हणल्यार देवा घरचीं फुलां, अशें साने गुरूजीन म्हणलां. मात, सगल्याच भुरग्यांचे बाबतींत अशें म्हणपाक मेळचें ना. कारण भुरगीं हीं कुचकुचीत पयसो करपाचें एक साधन, असो विचार करपी शेंकड्यांनी नागरीक आमच्या देशांत आसात. तो विचार कृतींत हाडपाकूय ते फाटीं रावनात. हें मनीसपणा भायलें काम, त्या भुरग्याचे आवयक कितें दिसतलें, त्या भुरग्याक कितें भोगतलें, आपूण करता तो व्हडलो गुन्यांव हाचेंय भान तांकां आसना. पयशां खातीर हे राकेस आमच्या भारता सारक्या संस्कृतीमोगी, संवेदनशील देशांत आसात, हाचें वायट दिसता. दोन दिसां पयलीं सीबीआयन भुरग्यांचो वेपार करपी एके व्हडले टोळयेक अटक केल्या. सध्या सात जाणांक बेडयो घाल्यात. उरिल्ल्यांचो सोद चालू आसात. अटक जाल्ले सगले दिल्ली शारांत रावतात. सुत्रधार हरियाणांतलो. उत्तर प्रदेश, मध्य प्रदेश, पंजाब, झारखंड, हरियाणा, दिल्ली, छत्तीसगढ, महाराष्ट्र, कर्नाटक अशा 15 परस चड राज्यांनी हो गट सक्रीय आशिल्लो. हातूंत गोंयचो आसपाव आसा काय ना तें कळपाचें आसा. दरेका भुरग्याक देड ते दोन लाखांक विकत घेवन (कांय भुरगीं चोरून) तीं भुरगीं नाशिल्ल्या जोडप्यांक चार ते स लाख रुपयांक ही टोळी विकताली. मुळाव्या तपासांत तांणी 50 भुरगीं विकल्यांत अशें दिसून आयलां. अटक जाली तेन्ना हे टोळये कडेन तीन भुरगीं आशिल्लीं. एक दोन दिसांचें तर दुसरें १५ दिसांचें.
ही टोळी भुरगीं खंयच्यान हाडटाली, ताचो तपास सीबीआय करता. तीं वेगवेगळ्या माध्यमांतल्यान तांकां विकत घेतालीं. कांय भुरग्यांक गरीब आवय- बापूय स्वता विकतालीं. म्हणजे पोटाचे भुकेक भारतीयांक स्वताच्या भुरग्यांक विकचें पडटा. 21 व्या शेंकड्यांत ही परिस्थिती? खंय व्हरून दवरला भारत आमचो? कांय आंकवार चलयो बाळंत जातकच समाजाचे लजे खातीर भुरग्यांक विकतात. तांचे कडेनूय हे टोळयेचो संपर्क आसा. टोळयेच्यो कांय बायल वांगडी सरोगेट मदर म्हूणय काम करतात. म्हणजें भुरगें विकपा खातीरूच जल्माक घालप. सोशल मिडियाचेर जायरात घालून ही टोळी भुरगीं विकतालीं. हे पद्दतीन दोन भुरगीं विकतना हे टोळयेचे दोन वांगडी सांपडले. म्हणजे आधुनिक प्रसार माध्यमांचो हो असल्या कामा खातीर वापर. आतां हाचीं पाळामुळां खणून काडटना आनीक कितें कितें भायर सरता आनी तें कितले भिरांकूळ आसा, तें पळोवपाचें. जांचीं भुरगीं शेणल्यांत, तांणीय आपापल्या राज्यांतल्या सीबीआय कार्यालया कडेन, पुलिसां कडेन संपर्क सादून चवकशी करपाक जाय. कारण बसस्टॅण्ड, रेल्वे स्टेशनां वयल्यान भुरगीं चोरपाचे प्रकार अदींमदीं घडटात. सीसीटीव्ही कॅमेऱ्यांनी पसून ते दिसल्यात.
ही टोळी भुरगीं निपुत्रिक कुटुंबांक भुरगीं विकताली. दुसरो प्रकार भुरगीं चोरून तांचो चड करून भीक मागपाक, शिंदळकी करपाक वापर करप. स्लमडाॅग मिल्योनॅर सिनेमांत हो प्रकार दाखयला. हो आॅस्कर पुरस्कार मेळिल्लो सिनेमा आयलो तेन्ना भारताची बदनामी जाली, म्हूण कांयजाणांनी खर टिका केल्ली. केंद्र सरकाराच्या अहवाला प्रमाण, 2022 वर्सा वट्ट 83,350 भुरगीं शेणिल्लीं. तातूंतल्यो 62,946 चलयो. म्हणजे 75 टक्के. हें प्रमाण दरवर्सा वाडटा. सगल्यांत चड दरेकी 10 हजार चलयो अस्तंत बंगाल आनी मध्य प्रदेशांतल्यान गायब जाल्यात. ताचे उपरांत राजस्थान, तामिळनाडू आनी बिहाराचो क्रमांक लागता. दरेकी पांच हजार. दिल्ली, ओडिशांतल्यान दरेकी चार हजार चलयो शेणल्यो वा गायब जाल्यो. बालविवाह, शिंदळकी, वावराडी ह्या कारणांक लागूनय चलयांक गायब करतात. थोड्यो मोगांत पडून पळून वतात आनी मागीर त्रासांत पडटात. चले, चलयांक हुबारून व्हरपाचो प्रकार उत्तरप्रदेश आनी महाराष्ट्रांतूय घडटा, अशें केंद्राचो अहवाल सांगता.
भुरग्यांचो हो वेपार आडावपाक सगल्यांत पयलीं जागृताय गरजेची. खास करून शाळा, बाजारां, रेल्वे स्टेशनांचेर हें जावंक जाय. सरकारा वांगडाच एनजीओ, महिला मंडळांनीय ते खातीर फुडाकार घेवंक जाय. गरिबी सोंपली, सगल्यांक नोकरी, काम- धंदो मेळ्ळो जाल्यार हें भुरगीं गायब जावपाचें प्रमाण थोडें तरी उणें जातले. चडशीं भुरगीं 14 ते 18 वर्सां पिरायेचीं आसात. ताका लागून जुंवानपणाच्या हुंबऱ्याचेर पांय दवरपी भुरग्यांचेर बारीकसाणेन लक्ष दवरपाक जाय. फक्त पालकांनीच न्हय, तर समाजानूय. पुलिसांक तपासा विशीचें प्रशिक्षण दिवंक जाय. शाळा, बाजारांत, बसस्टॅण्ड, रेल्वेस्टॅण्डांचेर सीसीटीव्ही, खाजगी वेशांतले पुलीस आसप गरजेचें. भुरगीं हो आमच्या देशाचो फुडार. तो असो इबाडपाक दिवंक फावना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
