मनीसपणा भायली कृती

भांगरभूंय | प्रतिनिधी

प्रवेश शुक्लान केल्या तसली घडणूक परत परत घडत रावली जाल्यार समाजाक उक्ती वेर वतली आनी हें आमच्या म्हान देशा खातीर धोक्याचें थारतलें.

मनशाक मनशा प्रमाण वागोवपाक जाय. दादलो आनी बायल होच कितें तो मनीसजाती मदलो भेद. तांचो रंग, उंची, जाडी, कुडीची ठेवण वेगळी आसता, अर्थीक, समाजीक स्थितींतूय (जी मनशानूच तयार केल्या.) फरक आसता. इतलेंच. मात, आमी मनशांनी पुराण काळा पसून पारंपरीक कामां वयल्यान (कर्तृत्व, गुण नदरे आड करून) जाती जल्माक घाल्यात आनी कोण सकयलो, वयलो ताचें गणीत मांडलां. आयज हो वेगळोचार उणो जायत आसा. पूण कांय लोकां मदीं अजून दुसऱ्यां विशी दुस्वास, तिडक, तुच्छ भावना आसा. चडशे ती मनांत दवरता, मात थोडे संद मेळ्ळी काय दाखयतात. तापयतना दुद ओतचें, तशी ती वयर येता. हालींच मध्य प्रदेशांतल्या सिधी वाठारांत एक घडणूक घडल्या. तिचो व्हिडियो व्हायरल जाला. तो पळयल्यार जनावर पसून लजेन तोंड सकयल घालतलें.
ही हिन दर्जाची कृती करपी व्यक्ती आपूण भाजपा आमदाराचो प्रतिनिधी अशें सांगता. ताचें नांव प्रवेश शुक्ल. अनुसुचित जातीच्या दशमत रावत हांचे तकलेर, तोंडार तो मुततना दिसता. किळस हाडपी हें दृश्य. हो व्हिडियो व्हायरल जालो आनी सगलेच भियेवन कलकल्ले. तातूंत राजकी फुडारी, वावुरपी, पुलीस आनी हेर सरकारी कर्मचारीय आशिल्ले. पत्रकारांनी संपर्क केलो तेन्ना थोड्यांनी हो व्हिडियो तीन वर्सां आदलो अशें सांगलें. तर दुसऱ्या वरिश्ठ अधिकाऱ्यान तो दोन वर्सां आदलो असो दावो केलो. आपली दादागिरी दाखोवपाक, लोकां मदीं भिरांत निर्माण करपाक आपणें हें कृत्य केलें, अशें शुक्लान सांगलां खंय. शुक्लाच्या बऱ्या मागप्यांनी रावत हांचे कडल्यान रोखडेंच प्रतिज्ञापत्र बरोवन घेतलें. तातूंत म्हणलां, ‘प्रवेश शुक्लाची प्रतिमा पिड्ड्यार करपाक हो व्हिडियो व्हायरल केला. तो बोगस आनी फटीचो. ताणें अशें कांयच करूंक ना. आदर्श शुक्ला आनी ताच्या वांगड्यांनी म्हाका पयश्यांचें हांयस दाखोवन प्रवेशा सारक्या फुडाऱ्याक बदनाम करपाक हें केलां.’ ताचेर रावत हांची सही आसा.
मात मामाक (मुख्यमंत्री शिवराजसिंह चौहान. तांकां मामा म्हणटात.) भाच्यांच्यो ह्यो करामती कळटकच तांणी रातयां आदेश दिले आनी शुक्लाक मध्यानरातीं 2 वरांचेर पुलिसांनी अटक केली. ताका राष्ट्रीय सुरक्षा कायद्या खाला अटक केल्या. मुखार कितें जातां तें पळोवपाचें!! रोखड्योच वेंचणुको आसात, हें मतींत घेवन राज्य सरकार अॅक्शन मोडाचेर आयलें. बुलडोझर धाडून शुक्लाचें घर मोडलें. मात विरोधकांच्या म्हणण्या प्रमाण, घराच्या मुखार बांदिल्लो बेकायदेशीर भाग तितलो मोडला. शिवराजसिंह हांणी रावत हांकां आपल्या बंगल्याचेर आपयले. वांगडा पत्रकारूय आशिल्ले. हाताक धरून सिंहासना सारक्या कदेलाचेर बसयले. आपूण सकयल बसले आनी तांचे पांय तबकांत दवरून स्वताच्या हातांनी धुवले. ते पुसून तांच्या खांदार शाल, गळ्यांत फुलां हार घालो आनी मिठाय भरयली. होय व्हिडियो व्हायरल जाला. तांची ही कृती नाटकी, अशें विरोधकांक दिसता. तरीय हे घडणुके विशींचो लोकांच्या मनांत आशिल्ली तिडक उणी जाल्या अशें दिसना. कारण 3- 4 दीस जावन पसून शुक्लाच्या व्हिडियोचेर उब्यो- आडव्यो प्रतिक्रिया येत आसात.
शुक्लाक कायद्यान कितें ख्यास्त आसा ती मेळटलीच, पूण ह्या व्हिडियोंत दिसता ती ताची वृत्ती समाजाक खूब घातक. दुस्वासाचें मागीर तिडकींत रुपांतर जाता आनी तें समाजा खातीर अति भिरांकूळ थारता. आमकां भारतीयांक हाचो अणभव आसा. प्रत्येकान हें मतींत दवरूंक जाय. ही अहंकारी वृत्ती मनशाक फोंडांत घालता. सगलें कितें आपणाकूच मेळचें, आपलेंच, आपल्याच मनशांचें आसचें, हेर लोकांक कांयच मेळचें न्हय, शक्य आसा जाल्यार ते ना नपयत जावचे… असो विचार करपी हजारांनी लोक आसात, ते हेच वृत्तीचे. हो अहंगंड बाळगप चुकीचें. संविधान विरोधी तें. संविधानान आमच्या देशांत सगल्यांक समान हक्क दिल्यात. जगपाचो अधिकार दिला. विवीधतायेंत एकता आशिल्लो आमचे सारको देश संवसारांत चुकूनच सांपडटलो. हें भावपण आमी सगल्यांनी आमचे कृतीन सांबाळून दवपाक जाय. प्रवेश शुक्लान केल्या तसली घडणूक परत परत घडत रावली जाल्यार समाजाक उक्ती वेर वतली आनी हें आमच्या म्हान देशा खातीर धोक्याचें थारतलें.