भांगरभूंय | प्रतिनिधी
धर्तरेवेलो दर एक खीण हो नित्य नवो आसता. दर नवो दीस हो दोन दिसां मदलो खरो तर एक दुवो आसता. दोन तारखां मदलो
फरक खूब कितें तरी वेगळे घडोवन हाडटा. दर दिसा प्रत्येकाचे जिणेंत नवी फांतोड घेवन येता. नवीं फांतोड, नवें वर्स धुमधडाक्यांत मनोवपाक मनशाक एक निमित्त जाय आसता इतलेंच. उमेदीचोच एक भाग तो. जिणेत संकल्प करपाक 31 डिसेंबराचीच वाट पळोवप कितलें बरोबर? आमचे तकलेत खिणाखिणांक एक सारकें नवे- नवे विचार येत आसतात, केन्ना -केन्ना तांतलें कांय फळादीक जातात, कांय थंयच्या थंय विरून वतात.
सकारात्मक विचार तकलेंत येवपाक आमच्या मनां भितर सकारात्मक वृत्ती आसची पडटा. मनीसपण आशिल्याचेंच तकलेंत सकारात्मक विचार येतले. दुश्ट मनशाचे तकलेत नकारात्मकतेचोच किडो हुळहुळटलो. आयच्या जमान्यांत बऱ्या चारित्र्याचे, धुतल्या तांदळा सारके मनीस मेळपाक कठीण, चुकून कोणूय मेळत, साप्प ना अशें ना. प्रत्येक दीस हो दर एकल्याचे जिणेत कितें ना कितें तरी घेवन येताच. संद प्रत्येकाचे दार खटखटायता, पूण आमीच जागृत आसनात वा आमच्या आळशेपणाक आमी बळी पडटात. आमीच खंय तरी कमी पडटात. जे कोण संदीक दार काडटा तेंच मुखार पावतात. मेळिल्ले संदीचे भांगर करपाची कळाशी आसची पडटा.
आमचे तकलेंत जल्माक येवपी सकारात्मक विचाराची आमी पूर्तताय करीत जाल्यार आमकां वेगळो असो संकल्प करपाची गरज पडचीना. जिद्द, चिकाटी, ध्यास आनी आत्मविश्वास आसत जाल्यार केदोय व्हड हावेस तडीक व्हरूंक शकतात. आनी तुजेर आयिल्या केद्याय व्हड संकटाक तूं तोंड दिवंक शकता. मनशान सदांच आपले काळीज पारदर्शी दवरपा खातीर खर यत्न करपाक जाय. भायर एक आनी भितर एक अशा वृत्तीन वागूंक फावना. 99% लोक हो चडसो सुवार्थी आनी म्हेळ्या काळजाचो. हांच्या काळजांनी फकत दुस्वासाचो कोयर भरिल्लो आसता. ही काळजां निवळ करपाक जाय. कशें आसता आपल्या वायट बऱ्या विचारांचीच आमकां फळां भोगची पडटात. हे आमी विसरूंक फावना. आमी वर्तमानांत कशें वागतात ताचेर आमचो फुडार आदारिल्लो आसता. आमी केन्ना केन्ना दुस्वासान विनाकारण दुसऱ्या आड कट, कारस्थानां रचून ताची बदनामी करूंक सोदतात आनी आमी आमकां शूर समजतात. पूण सगळ्यांचे विधीलिखीत आदींच बरयिल्लें आसता. आमी फकत निमित्त. जें कितें घडपाचें आसा तें कोणूच आडावंक शकना.
थोड्याक विनाशकाले विपरीत बुद्धी, म्हणजे फोंडांत वचपाची बुद्द येवजता ताका कोण कितें करतलो? देवाचो फुडो हो सदांच सत्या वटेन आसता. आमी अर्धमान आनी असत्यान वागतले आनी देवाची भजनां गायतले म्हूण देव पावचोना.
मनशाच्या मनांत एकदा घमेंड आनी दुस्वास रिगलो काय मनीस असूर जाता. मागीर आपल्या सयत सगळ्यांचोच गोबर करता. अशा मनशांची वान्साच खोटी आसता. तें समाजाक घातक. मनशान निर्भिड, स्वाभिमानान जगपाक जाय आनी सडेतोड उलोवपाक जाय. कायलोळ्यो करून उपकारना. खऱ्याक खरे आनी वायटाक वायट म्हूण सांगपाची धमक जाय, सदांच सत्या वटेन रावचें. फटिंगपणाक, असत्याक तेको दिवंक फावना. दुश्टपणां तर निखालस नाका.
कांय लोकांक संवय आसता, हाचे ताका आनी ताचे हाका करून आपले काम सादोवन घेवपाचें. अशें वागप समा न्हय. विनाकारण तुमी निश्पाप व्यक्तीक त्रासांत उडयतात. खोट्या मनशाची संगत केन्ना धरची न्हय आनी कट- कारस्थानां रचून कोणाक तरी त्रासात घालपाक हिन पातळीचेर येवन नस्ते फट आरोप करून तें व्यक्तीक बदनाम करचें न्हय. मनशान स्वताक देव समजूचो न्हय. जैसी करनी वैसी भरनी, दिल्ल्या मापान घेवचें पडटा हे कोणेंच विसरूंक फावना. प्रत्येक गजालीक शेवट हो आसतातच. जल्माक आयिल्लो दर जीव मरतातूच. हांगा कोणूच अमरत्व घेवन येवंक ना. आमी दुसऱ्यांच्या चुकांचेर बोट दवरपाक हुशार, आमच्यो चुको कोणेय आमकां दाखोवन दित जाल्यार आमी रोखडेच उसळटात. आमी आमकां केन्ना सुधारतले? आमी धरून चलतात म्हजो सभाव कुसको जाल्यार मुखा वयलो मनीसूय म्हज्या सारखोच आसतलो. हांव जर गुड्डलांसांव करून पयशे खाता जाल्यार दुसरोय तसोच खाता आसतलो अशें गृहीत धरून निश्पाप मनशाचेर फटीचे आरोप करूंक फावना. हांव कामचुकारपणा करता हाचो अर्थ सगळेंच म्हज्या सारकें, अशें आसना. दुश्ट मनीसूच काम करतल्याक विनाकारण त्रास दित आसता. हे मोठे पाप. असली करणी मनशाक सोबना… आनी असल्या दुश्ट प्रवृत्तीच्या मनशाक जे कोण लिपचोरयां मदत करतात तेवूय तितलेंच विश्वासघातकी म्हणचे पडटले. अशें तऱ्हेच्यो घडणुको सर्रास समाजात घडटात. कारण मनीस दिसानदीस सुवार्थी आनी एकमुळो जायत आसा. ताका समाजाचे आनी मानवी मुल्ल्यांचें कांय एक पडिल्लें ना.
कांयजाण तोंडार सामकें गोड- गोड उलयतले आनी फाटल्यान तुजीच बारा वाजयतले. असल्या मनशांची सपनां पडूं नाकात. व्हडल्यो- व्हडल्यो पदव्यो घेतल्यो, पुस्तकां, ग्रंथ वाचले म्हूण कोण पंडित, विद्वान मनीस जायना, मनीस जावपाक ताचे काळीज संवेदनशील आनी मनशाळें आसचें पडटा, प्रेम हो अडेच अक्षरी शब्द आदी समजुचो पडटा अशें संत कबीर म्हण्टा. दुष्टपणा, फटींगपणा, दुस्वासी घमेंडी वृत्ती मात्शी सोडून दियात आनी मात्शे मनीसपणान वागपाक शिकात आनी मनीस जायात. देव तुमचेर बेंसांव घालतलो. खरे म्हणजे कोणाचेरूय अन्याय जाता तेन्ना दर एकल्यान ताचे आड आवाज काडपाक जाय आनी जो कोण अन्याय करता ताका सोलून काडपाक जाय. कारण अन्याय सोंसून घेवपाचो आसना आनी अन्याय करतल्याकय ख्यास्त दिल्या बगर सोडपाक फावना. पूण केन्ना -केन्ना न्याय दिवपीच अन्यायाची बाजू घेता, तेन्ना तकली सण्ण जाता. पयशाच्या बळार अशें घडटा. खरें म्हणजे अधिकारी वर्गान खोलायेन तपासणी करून न्याय करचो आसता. तोच जर गैर वागपाक लागलो जाल्यार कोणे कोणा कडेन न्याय मागपाचो?
काशिनाथ नायक
9158345844
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
