भांगरभूंय | प्रतिनिधी
जिवितांतल्यो कांय गजाली मोबायल, टॅब, कंप्युटर वा हेर डिजिटल उपकरणांत डीलीट करूंक मेळटात, तश्यो मेळनात. अशीच एक गजाल म्हजे तकलेंतल्यान कशीच डिलीट जायना, तशाची तश्शी आसा. म्हाका ती गजाल कालूच घडल्या अशें दिसता!
हायस्कूलांत नियुक्ती जावन दोन वर्सां जाल्लीं. एक दीस सकाळीं णववे यत्तेंत शिकपी हुशार भुरगो घुंवळ आनी ओंकारी जावन दुयेंत जालो. ताका रिक्षेंत बसोवन कुडचड्यार तांच्या फामिलेच्या दोतोरा कडेन व्हेलो. ताच्या घरच्यांकय कळयलें. दोतोरान तपासून अदमास येना म्हणून काकोडेच्या सरकारी हॉस्पिटलांत व्हर म्हणून सांगलें. हॉस्पिटलांत तपासून दोतोरान मडगांव हॉस्पिसियोंत व्हर म्हणून सांगलें. व्हर म्हणून सांगलें खरें, पूण अॅम्बुलन्साचो ड्रायव्हर खंय आसा कोणाक खबर नाशिल्लें. तो मोबायलाचो काळ नाशिल्लो. म्हणटकच ताका सोदप कठीण आशिल्लें. इतले म्हणटासर हॉस्पिटलांत आमचो एक शिक्षक पावलो.
हांवें कुडचडें बस स्टॅण्डा वचून टॅक्सी हाडली. दाव्या हातांत सलायन बाटली भायर उंच धरून गाडये फुडें बसलों. ताका हॉस्पिसियोंत व्हरून दाखल केलो. दोतोरान तपासून पळयलें. कितें जालां तें निदान जावंक शकलें ना. दोतोरान निरिक्षणा खाला दवरला म्हणून सांगलें. म्हणटकच दनपरां आमी दोगूय शिक्षक हॉटेलांत वचून इल्लें जेवन आयले.
हॉस्पिटलांत पावत जाल्यार भुरग्याची भलायकी इबाडत आशिल्ली. घरचीं रडूंक लागिल्लीं. तांकां शांत करपाचो यत्न केलो. आतां भशेन तेन्ना अॅम्बुलन्सी नाशिल्ल्यो. शिवाय दोतोरान बांबोळे व्हरपाची शिफारस वा गरजबी परगटांव नाशिल्ली. इतल्यान भितरल्यान घरच्यांचो व्हडल्यान रडपाचो आवाज आयलो. भितर वचून पळयत जाल्यार विद्यार्थ्याचो दुयेंस आनीं जिविताचो खेळ सोंपिल्लो!
मरणाचें कारण कळूंक नाशिल्लें. तें कळूंक दुसरे दीस पोस्टमॉर्टम करया म्हणलें. पूण दुसरे दीस दसरो आशिल्ल्यान आपल्या भुरग्याच्या आंगाक शस्त्र लावंक बापूय तयार नाशिल्लो. निमणे संस्कार तांच्या मुळाव्या घरा कारवाराक करपाचें थारलें. भुरग्याचें कुटूंब सांवड्ड्यां बिराडाक रावतालें. पार्थिव रातचें बिराडाक दवरूं मेळनाशिल्लें. म्हणटकच पार्थिव रातभर मॉर्गांत दवरपाची गरज आशिल्ली.
चार- पांच वरांचेर आमचो शिक्षक गेलो. उपरांत ताच्या घरच्यांकय घरा धाडलीं. पार्थिव मॉर्गांत दवरून हांव फाटल्यान येतां म्हणून सांगलें. काळोख जायत आयिल्लो. तेन्ना मॉर्ग हॉस्पिटला फाटल्यान उंच अडगळीचे सुवातेर आशिल्लें. थंय मेरेन वचपाचे वाटेर भोवतेक काळोख आशिल्लो. म्हणटकच बायलमनीस कर्मचारी प्रेत उखलून मॉर्गांत घालपा फाटींफुडें जांवंक लागलीं. हांवें म्हळें, चला एके वटेन हांव धरतां, दुसरे वटेन तुमी धरात.
शवागाराचें दार उगडटकच सुकिल्ल्या रगताचो वास आयलो. कारण मेल्ल्या मनशाचें पोर्टमॉर्टेम थंयच करताले. त्या मेजाचेर रगताचे दाग आशिल्ले. वयर काचेच्या जारांत वखदांत मनशाचे तरेतरेचे अवयव राखून दवरिल्ले. थोडे भितर सांगपाचें जाल्यार, रातचे वेळा ते सुवातेर खबर नाशिल्ल्या मनशान वचप कठीणच आशिल्लें म्हणल्यार जाता.
मुखार एक व्हडलो रेफ्रिजरेटर कसो आशिल्लो. तातूंत भोवतेक बेवारशी प्रेतां दवरताले. हांवें एक खण उगडलो. भितर प्रेत आशिल्लें. चार पांच खणांत प्रेतां आशिल्लीं. एक रितो खण सांपडलो. जड मनान तातूंत विद्यार्थ्याचें प्रेत दवरून खण बंद केलो ! म्हजे खातीर हो एक खुबूच व्हड अणभव आशिल्लो. पूण ह्या अणभवान म्हाका फुडारा खातीर घटमूठ केलो. म्हज्या मनांतलो भंय गेलो.
साडे आठांची निमणी बस धरून मडगांव सावन घरा आयलों. न्हाले उपरांत जेवपाक बसलों, पूण उणी पोटांत वचनाशिल्ली. न्हिदपाक गेल्यार दिसभराचो देखाव दोळ्यां मुखारल्यान कसोच वचना.
दुसरे दीस प्रेत सांवड्ड्यां हाडून मागीर कारवार व्हरून अंत्यसंस्कार जाले.
आमच्या गांवचो एक भुरग्यांचो दोतोर परदेशांत आसतालो. तो कांय दिसां खातीर गोंयां आयला हें आयकल्लें. म्हणटकच विद्यार्थ्याचो धाकलो भाव भयण आनीं बापायक घेवन हांव बसीन दोतोरागेर गेलों. दोतोराक सगळी हकीकत सांगली. भावाच्या मरणाचें वा दुयेंसाचें कारण कळूंक शकलें ना. म्हणटकच धाकट्या भावा भयणीक बी तशेंच कितें दुयेंस आसा काय म्हणून दुबाव काडपाचो प्रयत्न केलो.
बापायची मिळकत बेताचीच आशिल्ली, तरी पुता खातीर कितलो खर्च केला तो सांग. तो कोणाच्या रीण उरूं जायना म्हणून बापूय एकसारको फाटी लागिल्लो. हांवें म्हळें, जशें बापूय पुताचें नातें आसता, तशेंच आमचें बी शिक्षक विद्यार्थ्यांचेंय आसता, अशें म्हणून ताका शांत केलो.
पांच म्हयन्या उपरांत आपोवणें दिनासतना ताणें म्हज्या लग्नाच्या आदले दीस आयदनांची भेटवस्तू धाडून दिवन आपल्या पुताक म्हज्या रिणांतल्यान मेकळो करून आपलें बी समादान करून घेतलें !
कांय वर्सां उपरांत म्हज्या वांगडा आशिल्ल्या शिक्षकाचो पन्नासावो जल्मदीस आशिल्लो. एका आदल्या विद्यार्थ्यांन एका खबरांपत्रांत ताचेर लेख बरयल्लो. तातूंत ताणें हे गजाली बद्द्ल बरयल्लें, तो शिक्षक त्या दुयेंत विद्यार्थ्याक दोतोरागेर आनी इस्पितळांत घेवन गेलो. ताचे प्राण वतकच तो ढसा ढसा रडलो खंय!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
