मनीसजात सुखी जावं

भांगरभूंय | प्रतिनिधी

जिंदगी और मौत ऊपर वाले के हाथ है जहांपनाह, जिसे न आप बदल सकते हैं न मैं, हम सब तो रंगमंच की कठपुतलियां हैं, जिनकी डोर ऊपर वाले के उंगलियों में बंधी है। कब कौन कैसे उठेगा, ये कोई नहीं बता सकता।…. आनंद सिनेमांतलो हो डायलाॅग. जीण व्हडली आसपाक जाय, लांब न्हय, अशेंय तातूंत म्हणलां. मात, आमच्या कट्टुलांत हें वचना. आमी हांगा चार दिसां खातीर आयल्यात. केन्ना कितें जावन ही धर्तरी सोडची पडत हें सांगपाक जायना. तरीय आमी एकमेकांचो दुस्वास करतात. दुसऱ्यांक कायमचे काबार करपाक सोदतात. भ्रश्टाचार, भेदभाव, हिंसाचार, द्वेष, कट- कारस्थानां करतात. मागीर चोंब्यान आसल्यार विचारपाक नाका. काडीपैलवान पसून बळिश्टाक शाणपणां सांगता.
हालींच कांय क्रिस्तांव धर्मगुरूंनी हिंदू देव, छत्रपती शिवाजी महाराज हांचे विशीं केल्लीं विधानां बरींच वादग्रस्त थारलीं. हिंदुत्ववादी संघटनांनी हाचेर हरकत घेतली. एके संघटनेन चर्ची लागसार विजयादुर्गेची मुर्तीची प्रतिश्ठापना केली. गोंय तशें शांत, पूण दोनूय वटेनच्या लोकांनी वादग्रस्त विधानां करूनय प्रकरण हाता भायर वचूंक ना. गोंयांत दोन धर्मां मदीं एकचार दिसता, तो सहसा दुसऱ्या राज्यांनी दिसना. थंय जो बळिश्ट तो दुबळ्याचे कान पिळटा. मणीपुरांत कितें जालें, तें सगल्यांनी पळयलें. अजून हो धाकटुलो प्रांत दुस्वासान धगधगता. गोंयांत हिंदू, क्रिस्तांव, मुस्लिमां मदीं भावचार आसा. कांय राज्यांनी कसलीय घडणूक घडली काय लोक आक्रमक जावन दंगल घडोवन हाडटात, तशें गोंयांत जाल्लें दिसना. हें भावपणाचें वातावरण आमी कायम तिगोवपाक जाय…तसो आमचे मदीं मोग, मायपास तिगून आसा. दुस्वासान खदखदतात ते कांय सुवार्थी मूठभर अपुरबुद्द.
हीं दुस्वाशी प्रकरणां वाडत आसात, तें पळोवन मुख्यमंत्री डाॅ. प्रमोद सावंत हांणी अशीं विधानां करप्यांक जाहीर शिटकावणी दिल्या. दरेकल्याक आपले आवडीच्या देवाची पूजा करपाचो, ताका आदर्श मानपाचो अधिकार आसा. खंयच्या धर्माचें समर्थन करपाचें वा तत्वज्ञानाचेर विस्वास दवरपाचो हो जाचो – ताचो प्रस्न. धर्मा आड दुस्वास पातळावन वातावरण अशांत करपी दोनूय वटेनच्या लोकांचेर खर कारवाय करतले, अशी शिटकावणी तांणी दिल्या. दुसरेच दीस कार्डिनल फिलीप नेरी फेर्रांव हांणी धर्मगुरूंक शिटकायल्यात. दुसऱ्या धर्मा विशीं वादग्रस्त विधानां करप तांणी टाळचें. नाजाल्यार चर्चमातेक संबंदितांचेर कारवाय करची पडटली, अशें तांणी म्हणलां. आतां ह्या दोनूय फुडाऱ्यांचें सगल्यांनी आयकपाक जाय.
आमी ह्या संवसारांत चार दिसां खातीर आयल्यात. मागेमोगान रावप व्हडलेशें कठीण न्हय. पूण आमचे मदल्या कांय जाणाक मनीसपणाची हत्या करपाक मुखार सरचेंशें दिसता. मागीर बाॅम्बस्फोट, हिंसाचार….!! हातूंत जांची कांयच चूक ना तें मरतात. एकल्यान गाय कापली काय दुसरो वासरू कापपाक धांवता. ‘आँख के बदले आँख’ केल्यार संवसार दृश्टीहिन जातलो, हें आमी विसरतात. अफगाणिस्तान, सिरिया सारकी परिस्थिती येवप हें मनीसजात, खास करून बायलां, दीन- दुबळ्यां खातीर वायट. सगलेच कडवे जाले जाल्यार आमचो देश महासत्ता कसो जातलो? एक लाकूड तोडूं येता. पूण ताचो भोरो तोडप कठीण. देश वयर काडपाक सगल्यांक सांगाताक घेवन आमी मुखार वचूंक जाय. सगल्यांनी ह्या देशा खातीर योगदान दिलां, हें विसरूंक फावना. उलोवपा खातीर खूब विशय आसात. दुसऱ्याच्यो धर्मीक भावना दुखावतल्यो अशें खर, फटकळ उलोवपा परस देश उदरगतीच्या तेंमकार व्हरपाक कितें करूं येता, ताचेर उलयल्यार बरें, अशें तुमकां दिसना? वांगडा प्रत्येकान कृतीय करची. कवी अटलबिहारी वाजपेयी आपले एक कवितेंत म्हणटात, ‘कौरव कौन, कौन पांडव, टेढ़ा सवाल है। दोनों ओर शकुनि का फैला कूटजाल है।’ आमचे फाटल्यान तो ‘बरो मनीस’ आशिल्लो इतलें पसून लोकांनी म्हणल्यार खूब जालें. पूण समाजीक वातावरण पळयल्यार प्रत्येका मुखार आयज व्हडलीं प्रस्नचिन्नां उबीं रावल्यांत. तीं ना जावन समेस्त मनीसजात सुखी जावं.