भांगरभूंय | प्रतिनिधी
इ स्लामाचे निमाणे पैगंबर – मुहंमद (शांती आनी आशीर्वाद आसूं) हांचो जल्मदीस आयज 28 सप्टेंबराक मनयतात. मनशांचेर आमच्या रचणाराची दया म्हणल्यार, जशें ताणें आमचे कुडीचे गरजे खातीर जेवण दिलें, तशें संदेश, मार्गदर्शना वरवीं आमच्या आत्म्याक अन्न पुरवण केली. जाका लागून आमी आमच्या सर्वशक्तिमान प्रभूक जोडटात, ताका समजून घेतात. आमच्या जिविताचो उद्देश जाणून घेतात. आदम, नूह, अब्राहम, मोजेस, जेजू हे थोडे संदेश्टे जे लोकांच्या जीवितांतलो काळोख पयस करून दिव्य मार्गदर्शनान आमचेर उजवाड घालपाक आयले. मुहंमद हो संदेश्ट्यांच्या ह्या दुव्यांतलो निमाणो. संदेष्टे हे ईश्वराचे उल्लेखनीय धर्मीक प्रतिनिधी, जांचो कसलोच सुवार्थी हेतू नासता. तांचें जिवीत फकत लोकांक त्या म्हान ईश्वराच्या सुवादीन हाडपाच्या कामा भोंवतणी घुंवता आनी हेर कोणाच्याच न्हय. तांकां ईश्वर लोकां मदल्यान वेंचून काडटा, कारण फकत मनीसच मनशां खातीर आशिल्ल्या दैवी संदेशाचीं तत्वां वेव्हारीक रितीन दाखोवंक शकता, कश्ट सोंसून आनी ती चालीक लावपाक संघर्श करपाक शकता, जें एका आंज्याक वा ईश्वराक नेमून शक्य जायना. कित्याक तर ते मनशाच्या दुबळेपणांतल्यान मुक्त आसात.
मुहंमद हांकां पिरायेच्या 40 व्या वर्सा पैगंबरपण मेळ्ळें. ते मक्का- तांच्या जल्मस्थानांत रावताले. तांचे कडेन संदेश्टो जावपाचे सगळे गूण पयलीं सांगिल्ले प्रमाण आशिल्ले. पुराय अरबस्तानांतलो सगळ्यांत पुण्यशील, सत्यवादी आनी विस्वासपात्र म्हूण तांकां वळखताले. त्या काळांत सगळ्या तरांच्या वायटांचें केंद्र आशिल्ल्या अरब राज्याची परिस्थितीचो हुस्को करून ते हिरा गुंफेंत एकांतांत बसून ईश्वराची भक्तीती करीत आसताना तांच्या पैंगबरपणाची सुरवात जाली. कुराणाचे श्लोक तांचे कडेन अवतरित जावपाक सुरुवात जाली. ती ईश्वरी वाणी, जी पैगंबराचेर अवतरित जाली. पैगंबरपण मेळ्ळे उपरांत मरणा मेरेन सुमार 23 वर्सां तांणी पैगंबर म्हूण आपलें कर्तव्य प्रामाणीकपणान पाळ्ळें आनी कुराणाचो संदेश लोकां मेरेन पावयलो. स्वताय ताचे पालन केलें. विशेश म्हणल्यार कोणाक जबरदस्ती करिनासतना!
तांची निस्वार्थ सेवा हे घडणुकेन समजतली. सुरवातीच्या दिसांनी मक्कांतल्या फुडाऱ्यांनी तांचे कडेन वचून तांकां आपलो संदेश सोडून दिवपाचो प्रस्ताव दवरलो. तशें केल्यार पयशे, जमीन, फुडारपण, बायलां दिवपाचें आस्वासन दिलें. पूण संदेष्ट्यान अशें म्हणत तिरस्कार केलो कि “हांव सोपूत घेता, हें सोडून दिवपाच्या बदलाक ते म्हज्या उजव्या हातांत सूर्य आनी दाव्या हातांत चंद्र दवरल्यार पसून हांव केन्नाच थांबचो ना, जो मेरेन एक तर ईश्वर म्हाका जैत दिना वा हांव ताची राखण करतना नाश जाय मेरेन’’ (अल मगाझी, ले. इब्न इशाक (1/154)
ईश्वराचो पैगंबर म्हूण मक्काच्या 13 वर्सांत ताका बहिश्कार, देशांतल्यान धांवडावप आनी शारिरीक हिंसाचाराची धमकी मेळ्ळी, अशी गवाय पैगंबराच्या जिविताचे नोंदींतल्यान मेळटा. निमाणें तांकां जल्मभूंय सोडून मदिना शारांत स्थलांतर करचें पडलें. थंय तांणी आनी अनुयायांनी कुराणाच्या सकयल दिल्ल्या श्लोकाचेर आदारून सर्वशक्तिमानान थारायिल्ल्या मार्गान वचपाक शांततायेचें राज्य तयार केलें.
‘आमी ह्या मनशांक धर्तरेचेर अधिकार दिल्यार ते प्रार्थना चालू दवरतले, आनी गरिबांक दान दितले, बऱ्याक आज्ञा दितले आनी वायट करपाक बंदी घालतले’ (कुराण 22:41).
मदीना ह्या नव्या इस्लामी राज्यांत पैगंबरान तयार केल्ल्या संविधानांत बिगर मुसलमानांच्या हक्कांची राखण फुडल्या उतरांनी केल्ली : “ज्या मनशा कडेन करार केला (म्हळ्यार धिम्मीय) हांचेर अन्याय करता वा ताच्या खंयच्याय हक्काक आळाबंदा हाडटा, वा ताचेर ताका सोंसपा परस चड लादता वा ताच्या तयार कबलाती बगर ताचे कडल्यान कितेंय घेता, हांव कयामताच्या दिसा (हिशोबाच्या दिसा ) ताचो विरोधक जातलों’ (हदीस अबू दाऊद).
जिझ्या कर हो बिगर मुसलमानांचेर एकमेव कर आशिल्लो आनी त्या राज्यांतल्या मुसलमानांचेर जावपी करा परस तो संख्या आनी रक्कम हातून उणो आशिल्लो. बिगर मुसलमानांनी आपल्या नागरी, राजकी स्वातंत्र्याची राखण आनी परकी हल्ल्याच्या बदलाक मुसलमान राज्याचे मुक्त नागरिक म्हणून दिल्ली रकम हाका जिझ्या म्हणटाले. पैगंबर आनी तांचे अनुयायी मदिनाक गेले तरीय मक्काचे फुडारी तांचे कडेन झुजाचो कट रचताले. तेन्ना ईश्वरान पैगंबराक मर्यादा हुपनासतना वायट शक्तीं कडेन झुजपाची आज्ञा दिली. झुजाचे नेम अशे आशिल्ले: कोणाक उज्यांत उडोवप ना, झुजांत वांटेकार नाशिल्ल्या मनशाक वा जखमी मनशाक कसलोच त्रास करचो न्हय, बंदींक मारूंक जायना, दुस्मानाच्या राज्यांत लूटमार करची न्हय, मेल्ले कुडीक विकृत करप ना, जो मेरेन दुस्मान करार पाळटात तो मेरेन प्रामाणीकपणान पाळचो. जो मेरेन दुस्मान ताचें उल्लंघन करिना तो मेरेन ताका मारप ना. उल्लंघन केल्यार ताका शिटकावणी दिवन झुजाची घोशणा करप आनी मागीरूच ताचेर हल्लो करचो.
संदेष्ट्या खातीर कायद्या मुखार सगळे समान आशिल्ले. एक फावट एका प्रतिश्ठीत कुटुंबांतले बायलेक चोरी प्रकरणांत अटक जाली. ही केस पैगंबराच्या मुखार हाडली आनी तिका चोरीची ख्यास्त दिवची न्हय अशी शिफारस केली. पैगंबरान जाप दिली: ‘तुमचे आदीं जियेल्लीं राश्ट्रां ईश्वरानं नश्ट केल्लीं, कारण तांणी सामान्य मनशांक तांच्या गुन्यांवांक लागून ख्यास्त दिली आनी आपल्या मानेस्तांक तांच्या गुन्यांवांक लागून ख्यास्त दी नासतना सोडले; म्हजो जीव हातांत धरपी ताची (ईश्वराची ) सोपूत घेता की मुहंमदाची धूव फातिमा हिणें हो गुन्यांव केलो जाल्यार लेगीत हांव तिचो हात कापून उडयतलों.’
व्ययहार आणि शिकवण जाणुनूच मायकल एच. हार्ट हाणें इतिहासीक व्यक्तींच्या विश्लेशणांत मुहंमदाक मुखार दवरला. कारण ते धर्मीक आनी धर्मनिरपेक्ष दोनूय पांवड्यार येशस्वी जाल्ले. देखून तांकां मनीसजातीचे उपकारी अशें म्हण्टात.
नझराना दरवेश
8975074456
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
