भांगरभूंय | प्रतिनिधी
नवी दिल्ली, खबरां संस्था ः दिल्लीचे आदले उपमुख्यमंत्री मनिष सिसोदिया हांची 17 म्हयन्या उपरांत बंदखणीतल्यान सुटका जाली. दिल्लींतल्या कथित सोरो धोरण भानगड संबंदीत भ्रश्टाचार आनी मनी लॉन्ड्रिंग प्रकरणांत आम आदमी पक्षाचे फुडारी मनीष सिसोदियाक सर्वोच्च न्यायालयान शुक्रारा (9 ऑगस्ट) जामीन दिलो. न्यायाधीश बी. आर. गवय आनी न्यायाधीश के. व्ही. विश्वनाथन हांच्या खंडपिठान ह्या प्रकरणांत निकाल दिलो. हाचे आदीं 6 ऑगस्टाक न्यायालयान सिसोदिया हांच्या याचिकाचेर आपलो निर्णय राखून दवरिल्लो.
फाटल्या वर्सा 26 फेब्रुवारीक सीबीआयन सिसोदियाक अटक केल्ली. हाचे उपरांत 9 मार्चाक परतून मनी लॉन्ड्रिंग प्रकरणांत ईडीन तांकां अटक केली. सीबीआय आनी ईडी ह्या दोनूय प्रकरणांत सिसोदियाक आतां जामीन मेळ्ळा.
सर्वोच्च न्यायालयान सिसोदियाक तीन अटींचेर जामीन दिला. पयली अट म्हणल्यार तांकां 10 लाख रुपयांचो बॉण्ड भरचो पडटलो. हाचे भायर तांकां दोन जामीनय सादर करचे पडटले. आनी तिसरी अट तांकां तांचो पासपोर्ट सरेंडर करचो पडटलो.
सिसोदिया देड वर्सां सावन बंदखणींत
सीबीयान सिसोदिया हांकां दिल्ली उत्पादन शुल्क धोरण तयार करप आनी अनियमीत चालीक लावपाच्या प्रकरणात 26 फेब्रुवारी 2023 दिसा अटक केल्ली. सीबीआय एफआयआर संबंदीत मनी लाँड्रिंग प्रकरणांत तांकां 9 मार्च 2023 दिसा ईडीन अटक केल्ली. सिसोदियान 28 फेब्रुवारी 2023 दिसा दिल्ली मंत्रीमंडळाचो राजिनामो दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
