भांगरभूंय | प्रतिनिधी
‘रेड डाखा’ म्हणून वळखपी तांबड्या रंगाचे केळीचें पीक पयलेच फावट गोंयांत हाडलें हेमंत सामंतान
फोंडें: गोंयचे मातयेंत विवीध पिकां घेतात. फाटल्या कांय वर्सां सावन शेतकी मळार व्हड उदरगत करपाक विवीध शेतकार तशेंच बागायतदारांनी व्हड योगदान दिलां. स्वताच्या वा हेरांच्या जाग्यार पीक घेवपाचो आंकडो दर वर्सा वाडतूच आसा. पूण शेतकी मळ चालीक लायतना समाजसेवा करपी व्यक्ती हाताच्या बोटार मेजपा इतले मुखार येतात. तातूंत कोणशे-निरंकाल हांगचे मनान खूब श्रीमंत आशिल्ले तशेंच उत्कृश्ठ बागायतदार म्हणून फामाद आशिल्ले हेमंत सामंत हांचें नांव कोणूच विसरपाक शकचेना.
हेमंत प्रभाकर सामंत हे 59 पिरायेचे जावन आसा. ते सदांच आपले बागायतींत पासय मारून कामगारांक उर्बा दितात. तांचे बागायतींत व्हडा प्रमाणात मिरी, माडयो, माड, केळी आनी हेर पिकां घेतात. तांकां 92 पिरायेचे तांचे बापूय प्रभाकर सामंत हांचें म्हत्वाचें मार्गदर्शन मेळ्ळां. प्रभाकर सामंत हांकां कांय वर्सां पयलीं उत्कृश्ठ बागायतदार म्हणून तेन्नाचे मुख्यमंत्री दिगंबर कामत हांचे हस्तुकीं भोवमान केल्लो. उपरांत हेमंत सामंत हांणीय बागायतींत विंगड विंगड पीक घेवन कांय नव्या बागायतदारांक उर्बा दिवपाचें काम केलें. ‘रेड डाखा’ म्हणून वळखपी तांबड्या रंगाचें केळीचें पीक गोंयांत सगळ्यांत पयलीं हेमंत सामंत हांणी घेतलें. फाटल्या 4-5 वर्सांनी राज्यांतल्या हेर बागायतदारांक ‘रेड डाखा’ केळीचीं झाडां उपलब्ध करून हें पीक वाडोवपाचो यत्न हेमंत सामंत हांणी केला. फुडल्या कांय वर्सांनी गोंयच्या बाजारांत तांबड्या रंगाचीं केळीं विक्री खातीर उपलब्ध जातलीं.
बापूय प्रभाकर सामंत हांणी ह्यान पयलीं एकाच वर्सा 500 किलो मिरवेलीची लागवड केल्ली. बापायन घेतिल्ल्या पिका परस दुप्पटीन मिरवेलीचें पीक घेवपा खातीर हेमंत सामंत यत्न करतात. अंदूं तांणी 600 किलो परस चड मिरीचें पीक घेतलें. फुडाराक एक हजार किलो मिरवेलीचें पीक घेवपा खातीर यत्न चालू आसात. सध्या तांचे बागायतींत खुबशे बिगर गोंयकार कामगार काम करतात. म्हत्वाचें म्हळ्यार बागायतींत नवे प्रयोग करपाचो यत्न सतत हेमंत सामंत हांणी केला. ताका लागून बापायचें तशेंच कृषी अधिकार्यांचें मार्गदर्शन उपेगी आसा.
उत्कृश्ठ बागायतदार आशिल्लेे हेमंत सामंत हांची तीन खेपो गोवा बागायतदार बाजार खरेदी – विक्री संस्थेंत संचालकपदार नेमणूक जाल्या. उपाध्यक्ष म्हणून तांणी बरी कामगिरी केल्ली. सध्या संचालक म्हणून काम करतना संस्थेंत म्हत्वाची सुवात तांणी निर्माण केल्या. तशेंच हेमंत सामंत हे एक तबला वादक जावन आसात. वेळ मेळटा तेन्ना तबल्यार हात भोंवडावपाक हेमंत सामंत फाटीं फुडें पळयनात.
अंदूंच्यान हेमंत सामंत हांणी नर्सरी सुरू केल्या. तातूंत विवीध तरेचे माड, आंब्याचीं झाडां आनी हेर तरेचीं झाडां तांणी बागायतदरां खातीर विक्रेक दवरल्यांत.
बेतोडा पंचायत वाठारांत हेमंत सामंत हांणी एक समाजसेवक म्हणून वळख निर्माण केल्या. फाटल्या 33 वर्सां सावन बेतोडा पंचायतीचे दरेके ग्रामसभेंत हाजीर रावपाचो विक्रम तांणी केला. गांवच्यो तशेंच पंचायत वाठारांतल्या समस्यांचेर तांचें लक्ष आसता. ताका लागून दरेक ग्रामसभेंत ते 20 परस चड प्रस्न हाजीर करून पंचायत वाठारांतली उदरगत चालीक लायता. लोकांचो उदकाचो प्रस्न सोडोवपाचो ते यत्न करतात. समाजसेवा करतना हेमंत सामंत हांणी केन्नाच राजकारणांत प्रवेश करूंक ना.
हेमंत सामंत हांकां क्रिकेटची आवड. तांकां क्रिकेटची कॉमेन्ट्री सांगपाक पंचायत वाठारांत मानाचें आमंत्रण दितात. समाजाच्या बर्या खातीर तांणी पंचायत वाठारांत दिल्लें योगदान चड म्हत्वाचें. राजकारणा परस तांणी समाजसेवा करपाचेर चड म्हत्व दिलां.
कांय म्हयन्यां पयलीं राज भवनाचेर आयोजीत केल्ले कार्यावळींत हेमंत सामंत हांकां राज्यपाल पी. पी. श्रीधरन पिल्लय हांचे हस्तुकीं उत्कृश्ठ बागायतदार म्हणून भोवमान केलो.
हेमंत सामंत हांणी, बापायचे इत्से प्रमाण बागायती सांबाळळ्ळ्या. बागायती हें स्वावलंबी जावपाचें म्हत्वाचें साधन. स्वताच्या जाग्याचो वापर करतना नवे प्रयोग करपाची संद मेळ्ळी. येस निश्चीत आसा पूण येसाची पायरी चडटना खुबश्या आडखळींक तोंड दिवचें पडटा, अशें तांणी सांगलें.
बापूय, घरकान्न आनी पूत ओंकार हांच्या सहकार्यान शेतकी मळार व्हड येस मेळयलां. तरणाटे सरकारी नोकरेच्या फाटल्यान धांवतात. पूण स्वताचे पडींग जागेचो तांणी केन्नाच विचार करूंक ना. ताका लागून नोकरी मेळूंक नाशिल्ल्यान खुबशे तरणाटे चुकीचो निर्णय घेवन कुटुंबीयांच्यो अपेक्षा भंग करतात. आयज स्वावलंबी जावपा खातीर स्वताचो निर्णय घेवन जाग्याचो योग्य वापर करप गरजेचें अशें हेमंत सामंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
