भांगरभूंय | प्रतिनिधी
पर्येंच्या श्री भुमिका उच्च माध्यमीक विद्यालयांत ’वेळेचें वेवस्थापन’ विशयाचेर व्याख्यान
केरी-सत्तरी: विद्यार्थ्यांनी दरेका सेकंदाचो उपेग करून येस मेळोवचें. मनाची शक्त घटमूट आसल्यार आमी कसलेंय कार्य साध्य करपाक शकतात, असो उलो विद्या प्रबोधिनी महाविद्यालयाचे प्राचार्य डॉ. भुषण भावे हांणी मारलो. पर्यें सत्तरी हांगच्या श्री भुमिका उच्च माध्यमीक विद्यालयाच्या पालक शिक्षक संघा वतीन हांचें प्रा. भावे हांचें ’वेळेचें वेवस्थापन’ विशयाचेर व्याख्यान जालें.
ह्या वेळार माचयेर विद्यालयाचे प्राचार्य यशवंत सावंत, उपप्राचार्य रावसाहेब राणे, विद्यालयाच्या पालक शिक्षक संघाचे अध्यक्ष वामन बापट, उपाध्यक्ष गोविंद पार्सेकार, सचीव रत्नदीप वेरेंकार, सहसचीव विनायक माजीक, वांगडी प्रमिला गांवस आनी हेर मानेस्त हाजीर आशिल्लीं.
कार्यावळीची सुरवात विद्यालयीन प्रार्थना गीतान जाली. पालक शिक्षक संघाचे अध्यक्ष वामन बापट हांणी सगळ्यांक येवकार दिलो.
विद्यालयाचे प्राचार्य यशवंत सावंत हांणी प्रास्तावीक केलें. हातूंत तांणी पालक शिक्षक संघाच्या कार्याचो आढावो घेतलो. रावसायब राणे हांणी प्राचार्य भुषण भावे हांची वळख करून दिली.
भारतीय वेळेची संकल्पना ही चक्रीय आशिल्ल्यान ती आमच्या पुर्वजांची भेट. दरेका विद्यार्थ्यान वेळेचें नियोजन करून आपली कला आनी कुशळटायेक वाव दिवपाक जाय. दरेकल्यान आपल्या सदांच्या कामाची वळेरी करची आनी दरेक गजाल नोंद करून दवरची. खंयचेंय काम करतना फाटींफुडें जावचें न्हय, अशें भावे हांणी फुडें सांगलें.
विद्यालयाच्या पालक-शिक्षक संघा वतीन प्राचार्य भावे हांकां यादस्तीक भेटोवन भोवमान केलो. कार्यावळीचें सुत्रसंचालन शिक्षक तशेंच पालक शिक्षक संघाचे सचीव रत्नदीप वेरेंकार हांणी केलें. सहसचीव विनायक माजीक हांणी उपकार मानले.
हे व्याख्यान कार्यावळीक विद्यार्थी, पालक आनी शिक्षकांचो बरो प्रतिसाद मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
