मनशाचो अतिरेक; घडणुकांनी वाड

भांगरभूंय | प्रतिनिधी

मनशान स्वताच्या सुवार्था खातीर जितल्यो सुखसुविधा निर्माण केल्यात ताचे दुश्परिणाम ल्हवू ल्हवू वाडत आसा आनी विनाशाचे वटेन वाटचाल करीत आसात ही सामकी गंभीर आनी हुस्क्याची गजाल आसा.

दिसान दीस जे तरेन अत्याधुनीक सुविधा निर्माण जायत आसात ताचे दुपेटीन विनाशाचीं दारां उक्तीं जाल्ल्यान दुर्दैवी घडणुकांनी व्हड प्रमाणांत वाड जाल्ल्याचें दिसून येता. ही स्थिती फक्त भारतांतच न्हय जाल्यार पुराय संवसारभर दिसून येता. म्हत्वाचें म्हळ्यार संवसारभरांतल्या खूबशा देशांनी 2025 वर्सा भिरांकूळ झुजाची परिस्थिती निर्माण जाल्ल्याचें दिसून येता आनी खूबश्यो भिरांकूळ घडणुको पळोवंक मेळत आसात, आनी ह्या दुर्दैवी घडणुकांची सांखळ सुरूच आसा. म्हळ्यार आयचे परिस्थितींत धरतरे वेलो मनीस, पशुपक्षी आनी पुराय जिवजंतू सामक्या कठीण परिस्थितींत जगत आशिल्ल्याचें दिसून येता.
आमी म्हणटात की मळबांतलो प्रवास (विमान प्रवास) सगल्यांत सुरक्षीत आशिल्ल्याचें जगजाहीर आसा. पूण आयज विमानतळ दुर्दैवी घडणुकांच्या प्रमाणांत लेगीत व्हड प्रमाणांत वाडिल्ल्याचें दिसून येता. 12 जूनाक गुजरातांतलो अहमदाबाद विमान अपघात सामको भिरांकूळ आशिल्लो. विमानान उड्डाण करतकच फक्त 30 सेकंदांत एका मॅडिकल हॉस्टेलाचेर कोसळ्ळें. ह्या विमानांतलें 241 प्रवाशांक मरण आयलें. तशेंच हॉस्टेलांतल्या खूबशा विद्यार्थ्यांक मरण आयलें आनी गंभीर जखमीय जाले. ताका लागून आतां प्रस्न निर्माण जाता की विमानाचो प्रवास बरो काय वायट.
आमी हेलिकॉप्टर सुरक्षीत समजताले. पूण हेलिकॉप्टराच्या अपघाताचें प्रमाण लेगीत वाडलां. हाचें ताजें उदाहरण म्हणल्यार 15 जूनाक केदारनाथ दर्शना खातीर गेल्लें तेन्ना दर्शना उपरांत ते आर्यन एव्हिएशनाच्या हेलिकॉप्टरान गुप्तकाशी कडेन वता आसतना अचकीत हवामान बदल्लें. दाट धुकें आनी आडवेळ्या पावसाक लागून दृश्यमानताय उणी जाल्ल्यान हेलिकॉप्टर रानांत कोसळ्ळें. हातूंत सात प्रवाशांक मरण आयलें. म्हणल्यार सद्याचे परिस्थितींत सैम लेगीत मनशाच्या अतिरेकाक त्राशिल्ल्याचें दिसून येता, आनी ताका लागून दुखेस्त घडणुको घडत आसात. अशे परिस्थितींत प्रस्न उपस्थीत जाता की आमचे खातीर कितें सुरक्षीत आसा आनी कितें सुरक्षीत ना?
पुण्याच्या मावळ म्हालांतल्या नामनेच्या कुंडमळा हांगा 15 जून दिसा पर्यटकांनी व्हड प्रमाणांत गर्दी केल्ली. थंयच्या इंद्रायणी न्हंयचेर आशिल्ल्या 32 वर्सा पोरण्या पुलार तांकी परस चड लोकांनी गर्दी केल्ल्यान पुलाचो मदलो भाग अचकीत कोसळ्ळो. सुमार 35 ते 40 लोक पुला वेल्यान कोसळिल्ल्यान जखमी जाले. चौग जाणांक मरण आयलें आनी स जाणांची भलायकी गंभीर आसा. न्हंयेचो प्रवाह चड आशिल्ल्यान खूबशे जाण व्हांवून लेगीत गेल्ल्याचें सांगतात. अशे तरेन सैम सगल्यांचीच गोची करतना दिसून येता.
22 एप्रील 2025 दिसा पहलगाम हांगासरल्या शांत सुवातेर पयर्टक आनंद घेत आसतना अचकीत आतंकवाद्यांनी पर्यटकांचेर हल्लो केलो. हातूंत 28 जाणांची क्रुरतायेन हत्या केली. म्हणल्यार आयचे परिस्थितींत एकांतवास लेगीत कठीण जाला. तेच प्रमाण दिसान दीस रेल्वेचे लेगीत अपघात वाडिल्ल्याचें दिसून येता. हालींच मुंबयं लोकल ट्रेनीचो अपघात जालो. हातूंत खूबशा जाणांक आपलो जीव व्हगडावचो पडलो. ताका लागून सद्याचे परिस्थितींत मनीसजाती खातीर खंयचीच सुवात सुरक्षीत नाशिल्ल्याचें दिसून येता.
आतां तर नोकरेचे सुवातेर वतना, घरा भायर सरतना, चलून वतना लेगीत आमी सुरक्षीत आसात काय नात हाचोय दुबाव येवंक लागला आनी हुस्को वाडूंक लागला. हाचे पेल्यान वचून आमी विचार करीत जाल्यार देवदर्शन वा भोंवप हें सद्या म्हारग पडूंक लागलां. ताका लागून प्रस्न निर्माण जाता की ‘जाये तो जाये कहां!’ आतां तर इझ्रायल आरपारचे अशें समजतात. ताका लागून तिसऱ्या म्हाझुजाचें वातावरण तयार जालां. कारण युक्रेन-रशिया संघर्श सुरूच आसा. तेच बरोबर खुबश्या देशांत गृहझुजान भडको घेतिल्ल्याचें दिसून येता. सद्याचें झूज हें सादें उरिल्लें ना. बॉम्ब, ड्रोन, मिसायल अशे तरेन अत्याधुनीक शस्त्रास्त्रांचो वापर जाता. सद्याचे परिस्थितींत युक्रेन-रशिया, इराण-इझ्रायल हांच्या झुजाक लागून सगली कडेन उज्याचें सांवट दिसून येता. हाका लागून लाखांनी लोकांक मरण येत आसा. तशेंच अर्थीक लुकसाण लेगीत व्हड प्रमाणांत जातना दिसून येता. म्हळ्यार मनीसजाती खातीर सद्याचो काळ सामको बिकट, गंभीर आनी घातक स्थितींत आयला. आयज धरतरेर जायत आशिल्ली मनशाच्या अतिक्रमणाक लागून पालसणां कोसळप, ज्वालामुखीचो उद्रेक, सुनामी, भुंयकांप, ढगफुटी, चड पावस, चड गरमी, चड शीं आनी आतां झुजाक लागून निर्माण जाल्ली परिस्थिती हाका लागून सगली कडेन लुकसाणूच जायत आशिल्ल्याचें दिसून येता.
मनशान स्वताच्या सुवार्था खातीर जितल्यो सुखसुविधा निर्माण केल्यात ताचे दुश्परिणाम ल्हवू ल्हवू वाडत आसा आनी विनाशाचे वटेन वाटचाल करीत आसात ही सामकी गंभीर आनी हुस्क्याची गजाल आसा. ह्या पुराय घटनाक्रमा वेल्यान लक्षांत येता की जमीन, उदक, मळब आयज मनशाक लागून विनाशाचें कारण जायत आसा आनी हाका लागूनच भिरांकूळ आनी दुर्दैवी घडणुको जातना दिसून येतात.

रमेश लांजेवार,
9921690779