भांगरभूंय | प्रतिनिधी
पणजी ः भारतांतल्या ग्रामीण कामगारां खातीर म्हत्वाचें पावल उबारून ग्रामीण उदरगत मंत्रालयान 27 मार्चाक एक अधिसुचोवणी जारी केल्ली. जारी केल्ले अधिसुचोवणे प्रमाण, महात्मा गांधी राष्ट्रीय ग्रामीण रोजगार हमी कायद्या (मनरेगा) खाला पगार दरांत सुदारणा करपाची घोशणा केली. 1 एप्रील सावन सुदारीत दर लागू जातले.
केंद्र सरकारान अधिसुचोवणी दिल्ल्या प्रमाण, गोंय राज्या खातीर महात्मा गांधी राष्ट्रीय ग्रामीण रोजगार हमी येवजणे खाला दिसपट्टो पगार 378 रुपया आसतलो. केंद्रीय ग्रामीण उदरगत मंत्रालयाच्या आदल्या अधिसुचोवणेंत हे संबंदी दुरुस्ती केल्या. हरियाणा आनी सिक्किमाच्या कांय वाठारां उपरांत हो पगार देशांतलो तिसरो चड पगार आसा. मजगतीं, केंद्र सरकाराचे ‘मनरेगा’ येवजणे खाला राज्यांत सुमार 8 हजार कामगार काम करतात. तांकां सगळ्यांक हाचो फायदो जातलो.
मजगतीं, मनरेगा कायद्या खाला अकुशळ कामगारांक 2024-25 अर्थीक वर्सा खातीर देशभरांत चडांत चड 10.56 टक्क्यांनी पगार वाडपाची अधिसुचोवणी केल्ली. तेन्ना जारी केल्ले अधिसुचोवणेंत गोंयांतल्या अकुशळ कामगारांचो पगार दर दिसाक 322 रुपया वयल्यान 356 रुपया मेरेन वाडयल्लो. हाचे पयलीं तो 315 रुपया वयल्यान 322 रुपया मेरेन वाडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
