भांगरभूंय | प्रतिनिधी
मध्य प्रदेशान 19 वर्सां पिराये सकयले कूच बिहार क्रिकेट मॅचीच्या पयल्या दिसा गोंया आड खेळटना 5 विकेटी वगडावन 274 धांवड्यो केल्या. मॅचीक कालच्यान पर्वरीच्या क्रिकेट अकादमीच्या मैदानाचेर सुरवात जाली.
मध्य प्रदेशा वतीन अमन सिंग सोलंकीन 113 धांवड्यांची खेळी केली. तशेंच तीन म्हत्वाच्यो भागिदारी केल्यो. 202 बॉलांक तोंड दितना ताणें 17 चवके मारले.
ते पयलीं मध्य प्रदेशाची बरी सुरवात जाली ना. पूण, उपरांत अमनान तिसरे विकेटी खातीर सक्षम पुरोहिता वांगडा 107 धांवड्यांची भागिदीर केली. ते उपरांत चवथे आनी पांचवे विकेटी खातीर वळेरेन 61 आनी 59 धांवड्यांची भागिदारी करून पंगडाक बरे स्थितींत हाडलो.
चवथे विकेटी खातीर माधव तिवारी आनी पांचवे विकेटी खातीर सोहम पटवर्धन हाच्या वांगडा भागिदारी केली. गोंया वतीन फरदीन खानान दोन विकेटी घेतल्यो.
थोडे भितर धांवतकटोः मध्य प्रदेश, (पयलो डाव) 90 ओव्हरींनी 5 बाद 274 धांवड्यो ( सक्षम पुरोहीत 66, अमन सिंग सोलंकी 113, माधव तिवारी 36, सोहम पटवर्धन खेळटा 32, फरदीन खान 2-73, पुंडलीक नायक आनी यश कसवणकार दरेकी 1 विकेट).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
