भांगरभूंय | प्रतिनिधी
खांडवा, खबरां संस्था: मध्य प्रदेशांतल्या खांडवांत दुर्गा मुर्ती विसर्जना मजगतीं एक ट्रॅक्टर-ट्रॉली तळ्यांत पडली. ह्या अपघातांत आठ चलयां सयत तेरा जाणांक मरण आयलें. सुमार 20 ते 25 जाण बुडिल्ल्याचें समजता.
हे विशीं पुलिसांनी दिल्ले म्हायती प्रमाण, ही घडणूक खांडवाच्या अर्दला गांवांत घडली. मुर्ती विसर्जना खातीर एका तात्पुरत्या पुलार उबी आशिल्ली ट्रॅक्टर- ट्रॉली तळ्यांत उमथली आनी सगले प्रवासी उदकांत पडले. तांकां वाटावपाक 10-15 जाणांनी तळ्यांत उडक्यो मारली. बिरेस्तारा सांजेवेळार सुमार 5 वरांचेर ही घडणूक घडली. उपरांत जेसीबीचे मजतीन रेस्न्यू ऑपरेशन सुरू केलें. सांजेवेळार 6 वरां मेरेन 11 कुडी तळ्यांतल्यान भायर काडल्यो. उरिल्ल्या बुडिल्ल्यांचो सोद सध्या घेतात.
प्रत्यक्षदर्शी प्रदीप जगधन्ने हांणी सांगलें, ट्रॅक्टर- ट्रॉली जंय पडली थंय सुमार 50 फूट उदक आशिल्लें. आमी णव जाणांक वाटयले. तांकां पंधना हॉस्पिटलांत व्हेले. थंय दोतोरान तिगांक जिवे आशिल्ल्याचें सांगलें. तांकां खंडवा जिल्लो हॉस्पिटलांत व्हेले.
13 मरण आयिल्ल्यांचीं नांवां पटलीं
शर्मिला वडील प्यारसिंह (15), आरती वडील प्यारसिंह, दिनेश वडील शांतिलाल (13), उर्मिला रेलसिंग (16)
गणेश वडील तेरसिंह (20) ,किरण रेमसिंग (16), पाटली कैलाश (25), रेव सिंग मुंशी सिंह (13), आयुष वडील भारत (9). संगीता वडील ज्ञानसिंह (16), सानू वडील थावरसिंह (16) , सोनू वडील रिझू (18), मंजुला वडील मांगीलाल (17)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
