भांगरभूंय | प्रतिनिधी
नवी दिल्ली, खबरां संस्था : सरन्यायाधीश धनंजय चंद्रचूड हांणी तांचे कारकिर्दींत जायत्या म्हत्वाच्या प्रकरणांचेर इतिहासीक अशे निकाल दिल्यात. मागीर तें प्रकरण महाराष्ट्रांतल्या सत्तासंघर्षाचें आसूं, शिवसेना- राष्ट्रवादी मदीं फूट आसूं, शेतकारांच्या आंदोलनाचें आसूं वा हालींच दिल्लो इलेक्टोरल बॉण्ड्स विशींचो निकाल आसूं. सरन्यायाधीश धनंजय चंद्रचूड हांणी खंबीर पणान आनी तटस्थ निकाल दिवन न्याय वेवस्थेचेर सामान्य जनतेचो विस्वास वाडोवपाक मोलादीक भुमिका केल्या. ताका लागून न्या. चंद्रचूड हांचें नांव पुराय देशभर चर्चेंत आशिल्लें. एके मुलाखतींत तांणी आपली न्यायवेवस्थे कडेन पळोवपाची नदर स्पश्ट केली.
न्या. चंद्रचूड हांणी कितें म्हणलें?
सरन्यायाधीशांनी देशांतले न्याय वेवस्थे संबंदी म्हत्वाची भुमिका मांडली. सर्वोच्च न्यायालय, उच्च न्यायालय, जिल्हो न्यायालयांची सगळ्यांत व्हडली तांक म्हळ्यार आमी लोकांची न्यायालयां जावन आसात. राज्यघटनेंत हीं न्यायालयां कित्याक तयार केलीं, हाचो एक हेत आसा. तुमची संपत, सामाजीक पांवडो, जात, धर्म, लिंग वा हेर खंयचेच गजालींचेर भेदभाव करिनासतना आमी न्याय दितात. सर्वोच्च न्यायालया खातीरूय देशांतलो खंयचोच खटलो ल्हान वा व्हड ना. आमी दरेकल्याक एक सारकी वागणूक दितात, अशें तांणी म्हणलें.
सामान्यां वटेन उबें रावप हें आमचें निमाणें ध्येय. आमकां खबर आसा, सत्तेंत कोणूय आसूं, सामान्य नागरिकांक समस्या आसता. मागीर त्यो तांचे सदचे जिणेच्यो आसूं वा खंयच्याय राष्ट्रीय मुद्या विशीं. कायद्याचें राज्य तिगोवन दवरपाक न्यायवेवस्थेचो म्हत्वाचो वांटो आसा. जेन्ना लोकांचो न्यायालयांचेर विस्वास आसता, तेन्ना आमच्या देशाच्या घटनात्मक संरचनेंतली सुवात आनीक घट्ट जाता, अशा शब्दांनी सरन्यायाधीशांनी तांची भुमिका मांडली.
केन्ना केन्ना मध्यान रातचेय ईमेल येतात
मजगतीं, देशांतल्या नागरिकां खातीर न्यायाची निमाणी सुवात म्हळ्यार सर्वोच्च न्यायालय. ह्या न्यायालयाच्या सरन्यायाधीशांनी देशवासीयांक दिल्लो शब्द म्हत्वाचो थारता. ते प्रमाण न्या. धनंजय चंद्रचूड हांणी हे मुलाखतींत केल्लें विधान म्हत्वाचें मानतात. म्हाका देशाक होच संदेश दिवचो आसा, आमी आमच्या न्यायालयीन कारकिर्दींतल्या दरेका खिणांक देशांतल्या सामान्य नागरिकां खातीर उपलब्ध आसात. केन्ना केन्ना मध्यान रातचेय ईमेल येतात. हांव त्या ईमेलांक जाप दिवपाक सदांच उपलब्ध आसता, अशें तांणी म्हणलें.
एकदां मध्यानरातचो म्हाका एक ईमेल आयलो. वैजकी समस्यांक लागून एके बायलेक गर्भपात करपाची परवानगी जाय आशिल्ली. म्हज्या कर्मचार्यांनी म्हाका हे विशीं म्हायती दिली. आमी रोखडीच दुसर्या दिसा घटनापिठाची स्थापना केली. त्या सगळ्या प्रकरणांची सुनावणी जाली. कोणाचेंय घर मोडून उडयतात, कोणाक भायर काडटात, कोणाक बंदखणींत शरण येवपाक जाय पूण ताका गंभीर वैजकी समस्या आसा अश्या सगळ्या प्रकरणांनी न्यायालयांनी आपली भुमिका गंभीरपणान केल्या अशेंय न्या. चंद्रचूड हांणी सांगलें.
बायलांच्या सशक्तीकरणाचें कितें?
आमी जायत्या समस्यांचेर मात केल्या हातूंत दुबाव ना. स्वातंत्र्याच्या काळांत बायलांच्या शिक्षणाची स्थिती आनी आयजची स्थिती पळयल्यार आमी खूब उदरगत केल्या. पूण अजूनय जायतें काम करपाचें आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
