भांगरभूंय | प्रतिनिधी
पणजीः केंद्रीय अर्थमंत्री निर्मला सीतारमण हांणी सादर केल्ल्या अर्थसंकल्पांत 12 लाख रुपया मेरेन उत्पन्न आशिल्ल्या व्यक्तींक आयकरांतल्यान सूट मेळपाची घोशणा केल्या. हाका लागून मध्यमवर्ग सशक्त जातलो. हाका लागून चड बचत जातली आनी गुंतवणूक वाडटली. सशक्त मध्यमवर्ग म्हणल्यार सशक्त भारत अशी प्रतिक्रिया मुख्यमंत्री डॉ. प्रमोद सावंत हांणी दिली.
प्रधानमंत्री नरेंद्र मोदी हांच्या फुडारपणा खाला अर्थमंत्री निर्मला सीतारमण हांणी सादर केल्ल्या विकसीत भारत 2025 अर्थसंकल्पाक आपूण पुराय मनान येवकार दितां. ह्या अर्थसंकल्पांत विकसीत भारताच्या चार विभागा खाला बायलां सशक्तीकरण, तरणाट्यांचें सशक्तीकरण, अन्न सुरक्षा आनी गरीब कल्याण साध्य करपा खातीर धा उदरगत उपायांची रुपरेशा दिल्या. हाका लागून बळिश्ट आनी समृद्ध भारताची वाट मेकळी जातली, अशें मुख्यमंत्र्यांनी सांगलें.
शेतकी उदरगत, ग्रामीण समृध्दी, समावेशक वाड, एमएसएमईक आदार, रोजगार निर्मिती, कामगार गुंतवणूक, उर्जा स्रोत सुरक्षीत करप, निर्यात वाडोवप हांचे वरवीं अर्थवेवस्था घटमूट करपाचेर अर्थसंकल्पांत भर दिला. अर्थसंकल्पांत कर, वीज क्षेत्र, शार उदरगत, खणकाम, अर्थीक नियमन आनी निर्गत उर्बा ह्या मळार परिवर्तनकारी सुदारणा सादर केल्यात, अशें मुख्यमंत्र्यांनी सांगलें.
पर्यटनांतल्यान चलपी अर्थीक वाड, रोजगार निर्मिती, बोट बांदप, नुस्तेमारी आनी नवनिर्माण हातूंत खाजगी मळांचो वांटो वाडोवपाकूय प्राधान्य दिलां. मुळाव्या साधनसुविधांनी गुंतवणूक करप आनी मनीस संसाधन सशक्त करप हाचेर लक्ष केंद्रीत करपी हो अर्थसंकल्प कर्तव्याची आमची वचनबद्धताय परतून स्पश्ट करता. आमच्या सामुहीक यत्नांक लागून भारताक विकसीत भारत 2047 च्या दिश्टीकोना कडेन व्हरतले, अशी आस्त मुख्यमंत्र्यांनी उक्तायल्या.
विकसीत भारताचें ध्येय पुराय करतलों: प्रधानमंत्री
हो अर्थसंकल्प सामान्य नागरीक, विकसीत भारताचें ध्येय पुराय करतलो. ह्या अर्थसंकल्पाक लागून गुंतवणूक आनी वापर वाडटलो. जनतेचो अर्थसंकल्प तयार केल्ले खातीर आपूण अर्थमंत्री आनी ताच्या पंगडाक परबीं दिता. दरेका भारतीयांच्या सपनांक पुराय करपी हो अर्थसंकल्प आसा. आमी तरणाट्यां खातीर खूबशीं मळां उक्तीं केल्यांत. हें विकसीत भारताच्या ध्येयाक चालना दितलें, हो अर्थसंकल्प एक शक्तीवर्धक आसा, अशें प्रधानमंत्री नरेंद्र मोदी हांणी म्हणलां.
मध्यमवर्गियांची अर्थीक स्थिती सुदरपाक मजतः शाह
मध्यमवर्गीय हो सदांच प्रधानमंत्री नरेंद्र मोदी हांच्या काळजांत आसता. 12 लाखांच्या उत्पन्ना मेरेन शुन्य आयकर लागतलो. प्रस्तावीत कर सवलत मध्यमवर्गियांची अर्थीक स्थिती सुदरावपाक मजत करतली. सगळ्या लाभार्थ्यांक परबीं, अशी केंद्रीय गृहमंत्री अमीत शाह हांणी प्रतिक्रिया उक्तायल्या.
गुळयेन जाल्ल्या घाव्याचेर मलम लावपा सारकोः राहूल गांधी
हे अर्थसंकल्प गुळयेच्या घाव्याचेर मलम लावपा सारको आसा. सरकार वैचारीक नदरेन खाकनवाळ जालां. अर्थीक वेवस्तेंत व्हड बदल करपाची गरज आसा, अशें विरोधी पक्ष फुडारी राहूल गांधी हांणी म्हणलां.
चेंबराच्यो खूबश्यो मागण्यो मान्यः श्रीनिवास धेंपो
अर्थीक उदरगतीक चालना दिवपा सयत शेती, एमएसएमई, अन्न प्रक्रिया उद्देगाक तेंको दिवपी हो अर्थसंकल्प आसा. टीडीएसांत समानताय हाडप, करां पासून थाकाय अश्यो खूबश्यो मागण्यो गोवा चेंबरान केल्ल्यो, त्यो मान्य जाल्यात. मध्यमवर्गियांक गुंतवणुकेक उर्बा दिवपा वांगडाच खर्च करपाक घटाय दिवपी हो अर्थसंकल्प आसा, अशें गोवा चेंबराचे अध्यक्ष श्रीनिवास धेंपो हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
