भांगरभूंय | प्रतिनिधी
मध्य प्रदेशाचे मुख्यमंत्री मोहन यादव हांचो निर्णय
भोपाळ, खबरां संस्था ः मध्य प्रदेशाचे मुख्यमंत्री म्हणून सोपूत घेतले उपरांत डॉ. मोहन यादव हांणी फक्त 7 वरांत 7 खर निर्णय घेतल्यात. हातूंत खंयच्याच धर्मीक थळा वेल्यान अजान वा भजन व्हड आवाजात करपाक मेळचें ना असो सगळ्यांत व्हडलो आदेश जारी केला.
धर्मीक सुवातींनी धर्मिकताय आसूंक जाय. लावडस्पीकर आनी खंयच्याय प्रकारच्या आवाज दिवपी उपकरणाचेर थारायिल्ले मर्यादे परस चड व्हड आवाजान वाजोवपाचेर तात्काळ बंदी आसतली. हे खातीर तांणी खासा पंगड तयार करून मोहीम हातांत घेवची अशी सुचोवण्यो सरकारी वेवस्थेक दिल्यात.
मंत्रीमंडळाचे पयले बसके उपरांत तांणी पयलेच खेपे हे संबंदीच्या फायलीचेर सय केली आनी सरकारांतल्या गृह विभागाचे अतिरिक्त मुखेली सचिव डॉ. राजेश राजौरा हांणी हो आदेश जारी केलो.
उज्जैनांतल्या महाकालेश्वराचे दर्शन घेतल्या उपरांत मुख्यमंत्री डॉ. मोहन यादव सरळ मंत्रालयांत गेलो. थंय ऑफिसांत पूजा करून ताणें पदाचो ताबो घेतलो. उपरांत मंत्रीमंडळाची बसका आपयली. तातूंत उपमुख्यमंत्री जगदीश देवरा, राजेंद्र शुक्ला हांचे वांगडा मुख्य सचिव वीरा राणा आनी हेर अधिकारी हाजीर आशिल्लें.
मांस आनी नुस्त्याच्या उक्ते विक्रीचेर बंदी
आपल्या दुसऱ्या खर आदेशांत मुख्यमंत्र्यान राज्यांत खंयच परवानगी नासतना मांस आनी नुस्तें विकपाचेर पुराय बंदी घालची अशें सांगलां. तांच्या आदेशा प्रमाण अन्न सुरक्षीतताय आनी मानक कायदो 2006 चें उल्लंघन करून नितळसाण नाशिल्ल्या मांस आनी नुस्त्याची उक्ते विक्रीचेर बंदी घालतले. 15 दिसां भितर मोहीम करुन अशीं दुकानां बंद करतले. धर्मीक थळां लागसार मांसाची विक्री करपाचेर बंदी घालतलें. नगरविकास आणि गृहनिर्माण विभागान सगल्या जिल्ह्यांच्या जिल्होधिकाऱ्यांनी बेगोबेग कारवाय सुरू करची असो आदेश जारी केला. हातूंत पुलिसांची मजत घेवची. मुख्य सचीव वीरा राणा हाचो दर दिसा नियाळ घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
