भांगरभूंय | प्रतिनिधी
-पूर्व प्राथमीक, प्राथमीक 8.74 जाल्यार उच्च प्राथमीक 11.12 रुपयापणजी : विद्यार्थ्यां खातीर माधान्ह आहार (मदले सुटयेतलें खाण) करपा खातीरचो दर सरकारान वाडयलां. हाका लागून मदले सुटयेंतलें खाण तयार करपी आप मजत गट तशेंच पालक-शिक्षक संघाक थाकाय मेळ्ळ्या. पूर्व प्राथमीक तशेंच प्राथमीक विद्यार्थ्यां खातीरचो नवो दर 8 .74 रुपया जाल्यार उच्च प्राथमीक विद्यार्थ्यां खातीरचो दर 11.12 रुपया केला. हे विशींचो आदेश शिक्षण खात्यान जारी केला.
हाचे पयलीं पूर्व प्राथमीक आनी प्राथमीक विद्यार्थ्यां खातीर मदले सुटयेंतल्या खाणाचो दर 8 रुपया आशिल्लो. तशेंच उच्च प्राथमीक विद्यार्थ्यां खातीरच्या मदले सुटयेंतल्या खाणाचो दर 10 रुपया आशिल्लो. पूर्व प्राथमीक आनी प्राथमीक विद्यार्थ्यां खातीरच्या खाणाचो दर 74 पयशें वाडयला जाल्यार उच्च प्राथमीक विद्यार्थ्यांच्या खाणाचो दर 1 रूपया 12 पयशानी वाडयला. ही दरवाड 1 डिसेंबर 2024 सावन लागू जाल्या. आदेश मात मंगळारा जारी केला. मदले सुटयेंतल्या खाणाचे पदार्थ आनी हेर अटी सारक्योच आसा.
प्रधानमंत्री पोशण येवजणे खाला 8 वी मेरेनच्या विद्यार्थ्यांक मदले सुटयेंत खाण दिवपाची येवजण आसा. सगळ्या राज्यांनी ही येवजण आसा. चिकी, पुलांव, भाजी अशें पदार्थ मदले सुटयेंतल्या खाणांत दितात. खाणाचे दर वाडोवचे, अशी आपमजत गटांची मागणी आशिल्ली. पालक- शिक्षक संघ तशेंच आपमजत गट मदले सुटयेंतल्या खाणाची पुरवण करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
