भांगरभूंय | प्रतिनिधी
मथुरा, खबरां संस्था : गोंयांत तशेंच हेर राज्यांनी अश्टम कशी मनयतात हें सगळ्यांक खबरूच आसतलें. पूण अंदूं मथुरेक जल्माश्ठम आगळे वेगळे तरेन मनोवपाचो निर्णय देवस्थान समितीन घेतला. अंदूंचो श्रीकृष्ण जल्मोत्सव चांद्रयान ३ आनी इस्रोच्या शास्त्रज्ञांक समर्पीत केला.
श्री कृष्ण जल्मस्थान मंदिरांत जावपी उत्सव भारतीय अंतराळ संशोधन संस्थेच्या (इस्रो) शास्त्रज्ञांक समर्पीत केला. उत्सव चांद्रयान-३ हे संकल्पनेचेर मनयतले. जातूंत बिरस्तारा रातच्या वेळार भगवान श्रीकृष्ण ‘प्रज्ञान-वस्त्र’ घालून ‘सोमनाथ पुष्प बंगल्यांत’ बसतले. ह्या वेळार देश आनी ‘हिंदू राष्ट्रा’चे उदरगतीचो संकल्प घेवन हो उत्सव मनयतले.
श्री कृष्ण जल्मस्थान सेवा संस्थानाचे सचीव कपिल शर्मा आनी वांगडी गोपेश्वर नाथ चतुर्वेदी हांणी हे विशीं म्हायती दितना सांगलें, अंदूं भगवान श्रीकृष्णाच्या ५२५० वे जयंती निमतान जल्मस्थानाची सजावट, ठाकुरजींचे कपडे, मेकअप आनी हेर गजालींचेर विशेश लक्ष दिलां. देव दर्शनाक येवपी भक्तां खातीर देवूळ सकाळीं ५.३० ते सकाळीं १.३० मेरेन उक्तें आसतलें. जल्माश्टमीची सुरवात देवळांत धोल आनी शेनाय वाजोवन जातली. सकाळीं अभिशेक सुवाळ्याक दरेका भक्ताक ‘चरणामृत’ दितले. तशेंच श्री कृष्णाच्या जल्मस्थाना कडेन वचपी तीन सुवातांचेर तात्पुरत्यो ‘क्लोक रूम’ उबारतले. हांगा भाविकांक आपलें सामान दवरपाक मेळटलें, अशें तांणी सांगलें.
चांद्रयान ३ च्या येसाचो सगळ्या भारतीयांक अभिमान आसा. चांद्रयानान चंद्राच्या दक्षीण ध्रुवाचेर पावून इतिहासीक विक्रम केला. इस्रोच्या येद्या व्हडल्या येसाक लागून पुराय देश तोखणाय करता. दरेक शास्त्रज्ञांची जिद्द, त्याग आनी मेहनतीक आदरांजली म्हणून अंदुचो हो जल्मश्टमीचो उत्सव चांद्रयान ३ आनी इस्रोच्या शास्त्रज्ञांक समर्पीत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
