भांगरभूंय | प्रतिनिधी
कृष्णायण
(खोट बसना फुडें तो जागो जालो, तितले म्हणसर कालयवनान दुसरी खोट घालपाक आपलो पांय वयर उखलिल्लो. मुचकुंदान ताचो तो पांय आपल्या दोनूय हातांनी घट्ट धरलो आनी तो घुंवडायलो तसो कालयवन सकयल पडलो. … आतां मुखार..)
आपल्यार खोट मारल्या हाची मुचकुंद भयंकर तिडक आयिल्ली. तेच तिडकीन ताणें खाटीचे कुशीक आशिल्ली तरसाद उखल्ली आनी सकयल पडिल्ल्या कालयवनाचे मानेचेर घुंवडायली. कालयवनाचो जीव केन्ना गेलो हें ताचें ताकाच कळ्ळें ना. इतले म्हणसर थंय मुचकुंदाचे शिपाय धांवून आयले. शिपायांनी ताका कितें घडले तें सगळें सांगलें. भायर कालयवनाचो सारथी ताची वाट पळयता अशेंय सांगलें. मुचकुंदान मागीर आपल्या शिपायांक कालयवनाचे प्रेत ताच्याच रथांत व्हरून दवरात आनी त्या सारथ्याक रथ घेवन ताच्या राज्यांत परत वच अशें सांगपाक सांगलें. ते प्रमाण कालयवनाचे प्रेत घेवन सारथी परत गेलो.
दुसरे वटेन, कालयवन राजवाड्यांत भितर गेला हाची खातरी जाले उपरांत, कृष्ण आनी बलराम लिपिल्ले सुवाते वयल्यान भायर आयलें. ते मागीर थंय आनीक रावूंक ना. आपल्या रथांत बसले आनी तांणी द्वारकेची वाट धरली. अशें तरेन कृष्णान भायले भायर मुचकुंदा कडल्यान कालयवनाक मारून उडयलो.
कांय दिसांनी कृष्ण आनी बलराम द्वारकेंत पावले. थंय पावतकच द्वारका वसोवपाच्या कामाची सगळी सूत्रां कृष्णान आपल्या हातांत घेतली. मथुरा आनी वृंदावनातल्यांन आयिल्ल्या यादवांची ताणें, ते थंय पावचे पयलीं बांदून दवरिल्ल्या घरांनी रावपाची तजवीज केली. शेतां खातीर सुवाती आंखून दिल्यो. ज्या यादवांक पेंवपाक बरें येता तांका शंख आनी मोतयांचे शिंपले एकठांय करपाचें काम दिलें. आनी तांची भायल्या देशांतल्यान तारवां घेवन येवपी वेपाऱ्यां लागीं गांठ घालून दिली. ते यादव मागीर मोतयांचो वेव्हार करूंक लागले. ते खेरीज बलरामान नारायणी सेनेंत नवीन भरती केली आनी तांकां लडायेचें प्रशिक्षण दिवपाक सुरवात केली. लागसारच्या रानांनी तारवां बांदपाक जाय आशिल्ले फावो सारकें लाकूड मेळटालें. ते खातीर कृष्णान कांय यादवांक तारवां बांदपाचो वेवसाय करपाक सांगलें. सात्यकी आनी कृतवर्मा हांणीय आपले सैनिकांचे पंगड तयार केले. ते खातीर आनीक कांय यादवांक काम मेळ्ळें. जरासंधा सारको शत्रू द्वारके वटेन येता बी जाल्यार तें कळपाक कृष्णान भोंवतणच्या सगळ्या राज्यांनी खाशेले मनीस नेमले. शत्रू कडल्यान द्वारकेंतल्या लोकांचे रक्षण जांवचें हे खातीर द्वारके भोंवतणी किल्ल्या प्रमाण वणत उबी करपाचें कामूय कृष्णान हातांत घेतलें. अशें तरेन कृष्णान मथुरा आनी वृंदावनातल्यान आयिल्ल्या सगळ्या यादवांक कसल्यान कसल्या तरी कामात गुंतवोन दवरले.
ल्हवू- ल्हवू यादवांनी आपल्या नवीन राज्यांत जम बसयलो. वेपार करपाक लागिल्या यादवांक खूब येस मेळ्ळें. कांय यादव द्वारकेंतल्यान भायल्या देशांत म्हाल व्हरून विकप आनी थंय सावन म्हाल हाडून हांगा विकप, असो वेव्हार करूंक लागले. तांकां मेळटा तें येस पळोवन मथुरा आनी वृंदावनांतल्यान पयली येवंक नाशिल्ले यादव द्वारकेंत येवन रावपाक लागले. दुसऱ्या राज्यांतल्या वेपाऱ्यांनीय द्वारकेंत येवन बस्तान ठोकलें. द्वारकेंतल्या दर्यांत मेळपी मोतयांक भायल्या देशांनी खूब मागणी आशिल्ली. ताचोच फायदो त्या वेवसायांत आशिल्ल्या यादवांक मेळ्ळो. ह्या सगळ्या वेव्हाराक तारवांची गरज लागताली. ते खातीर तारवां बांदपी यादवांचो धंदो नेटान चलपाक लागलो. ह्या सगळ्या गजालींचो परिणाम म्हणल्यार द्वारकेचो आंवाठ वाडपाक लागलो. यादवांची भरभराट जावन तांकां उपाट सूख मेळपाक लागलें. अशे तरेन कृष्णान यादवांक आनी द्वारकेक गिरेस्तकायेच्या उंचेल्या पांवड्यार व्हरुन दवरली.
मुखार चलता
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
