भांगरभूंय | प्रतिनिधी
पूण, आतां लडाय करतलो जाल्यार फकत कृष्ण आनी बलरामूच मथुरेंत आशिल्ले. ताणें रागाचे भिरकेंत आपल्या सैन्याक सबंद मथुरेंक उजो लावपाक सांगलो.
१ लीड कृष्णायण
कृष्ण आनी बलरामान मथुरा सोडून वचपाची येवजण केले उपरांत कृष्ण वृंदावनांत गेलो. ताणें मुखेल यादवांची एक बसका घेतली आनी आपली येवजण तांकां सांगली. जरासंधाचें सैन्य परत परत येवन तांकां त्रास दितलें आनी तातूंत वृंदावनांतल्या यादवांक जीव व्हगडावचे पडटले. फाटल्या लडायांनी खुबशे यादव तरणाट्यांचे जीव गेल्यात हें कृष्णान तांच्या लक्षांत हाडून दिलें. यादवांचो कृष्णाचेर पुराय विश्वास आशिल्लो. कृष्णान केल्ली अचाट कर्तुबा तांणी पळयिल्लीं. ते खातीर तांणी कृष्णाचे येवजणेक मान्यता दिली. दुसरे वटेन बलरामानूय मथुरेंतल्या यादवांक मथुरा सोडपाक तयार केले. कृष्ण आनी बलरामान यादवांची मनां वृंदावन आनी मथुरा सोडून वचपाक राजी केलीं. पूण केन्ना, खंय आनी कशें वचपाचें हाचे विशीं तांकां पुराय कल्पना दिली ना.
शंखोदर जुंव्याचेर वचून स्थायीक जावपाचें, हें थारतकच कृष्णान आपले वांगडा कांय मुखेल यादव, कांय हुशार तरणाटे, कांय घरा बांदपी कारागीर घेवन बलरामा सयत ते दिकेची वाट धरली. वाटेंत ते सांदिपनी मुनी आनी पुर्नदत्ताक मेळ्ळे. कृष्ण आनी बलराम शंखोदर जुंव्यार वतात हें कळना फुडें पुर्नदत्तूय थंय येवपाक तयार जालो. ताणें सांदिपनी मुनी कडल्यान ते खातीर परवानगी घेतली. आश्रमांत पावतकच कृष्णाक ताचो इश्ट सुदामा आपले शिक्षण सोंपोवन पोरबंदरात आपल्या घरा गेला हें कळ्ळें. ती रात आश्रमांत काडटकच ते सगळे मागीर परत शंखोदर जुंव्याचे वाटेक लागले.
कांय दिसांनी ते पोरबंदरांत पावले. थंय पावतकच ते सुदामाक मेळ्ळे. कृष्णाक पळोवन सुदामाक खूब उमेद जाली. एक रात ताचे कडेन रावून कृष्ण आनी बलरामान फुडली वाट धरली. आतां तांचे वांगडा सुदामा आनी फाटले खेपेक वांगडा घेतिल्ले दोन तरणाटेय आशिल्ले. कांय दिसांनी ते शंखोदर जुंव्या कडेन पावले. थंय पावतकच सगळ्यांत पयली तांणी फाटले खेपेक तांचे वांगडा आयिल्ल्या व्हडेंकाराक सोदून काडलो. ताचे मजतीन तांणी थंयचेच घरां बांदपी कारागीर आनी मानाय एकठांय केले. कृष्णान ताका ताची येवजण सांगली. एके वटेन रानां, कुशीक न्हंय आनी न्हंयेचे देगेर शेत करपाक मेळटा असली जमीन, अश्यो सुवाती पळोवप आनी थंय यादवांक रावपाक घरां आनी तांची गोरवां दवरपाक गोठे बांदून उबे करप हें काम तांणी जाता तितले बेगीन करपाचें अशें कृष्णान तांकां फर्मायलें.
शंखोदर जुंवो ल्हान आशिल्ल्या कारणान थंय फकत कुष्ण, बलराम आनी मुखेल यादव हांकांच घरां बांदपाची अशेंय ताणें सांगलें. हेर यादवांची घरां आलतडी आसतलीं हेंय तांच्या लक्षांत हाडून दिलें. घरां आनी गोठे कशे पद्धतीन बांदूक जाय हें कृष्णान मथुरेंतल्यान व्हेल्या कारागीरां कडेन उलोवन थारायलें आनी हेरां कडल्यान थारयले प्रमाण काम करून घेवपाची जापसालदारकी तांचेर सोंपयली. सगळ्या कामार देखरेख करपाक कृष्णान सुदामा वांगडा गेल्या तरणाट्यांक सांगलें. एकदा सगळें थारतकच कामाक रोखडीच सुरवात जाली. शंखोदर जुंव्याचे आलतडी आनी पलतडी अशी दोनूय वटांनी घरां आनी गोठे उबे रावपाक लागले. काम कशें चल्लां हे पळोवपाक कृष्ण आनी बलरामाक वच्चे पडूंक लागलें. ते खातीर तांचे परत परत व्हड्यांत बसून हे वटेन ते वटेन वचप जाताले. त्या व्हडेकाराक तर दिसभर हेंच काम करचें पडटालें.
करता करता एक वर्स जालें. कृष्णान थारायिल्ले प्रमाण शंखोदर जुंव्याच्या वाठारांत एक नवो सुंदर गांव उबो जालो. कृष्णान ह्या गांवांचें नाव द्वारका अशें दवरलें. द्वारकेंत उदकाची जाय तितली पुरवण आशिल्ली, शेत करपाक जमीन, गोरवां चरोवपाक मळां आशिल्लीं, जळवाक रान आशिल्लें आनी सगळ्यांत महत्वाचें म्हणल्यार मथुरेंतल्यान येवपी यादवांक रावपाक घरां आनी तांच्या गोरवांक गोठे तयार जाल्ले. कृष्ण, बलराम आनी तांच्या वांगडा आयिल्ले यादव द्वारका गांव पळोवन सामके खोशी जाले. कृष्णान मागीर मथुरेंत परतुपाचें थारायलें. कांय यादव तरणाट्यांक ताणें मथुरा आनी वृंदावनांतल्यान येवपी लोकांची वेवस्था करपाक द्वारकेंतूच रावपाक सांगलें. हे सगळे जातकच तांणी द्वारका सोडली आनी मथुरेची वाट धरली. वाटेत तांणी सुदामा आनी ताच्या इश्टांक पोरबंदरांत पावयले. फुडें अवंतीपूरांत पावतकच पुर्नदत्ताक सांदिपनी मुनींच्या आश्रमांत सोडलो. अशें करीत करीत कृष्ण आनी बलराम परत मथुरेंत पावले.
कृष्ण मथुरेंत ना, तो खंयतरी पयस गेला हें कळिल्ल्यान जरासंधान परत आनीक आपलें सैन्य मथुरेंत धाडूंक नाशिल्लें. पूण जेन्ना कृष्ण मथुरेंत परत आयला ही बातमी कळ्ळी. तेन्ना जरासंधान मथुरेंचेर घुरी घालपाची व्हडली तयारी केली. हे फावटी कृष्णाक कसोय करून धरून हाडप आनी तें जमले ना जाल्यार ताका सोंपोवनूच परत येवप असो निर्णय जरासंधान घेतिल्लो. ते खातीर ताणें स्वता आपल्या सैन्या वांगडा वचपाचें थारायलें. मथुरेंत पावतकच जरासंधाचें सैन्य आपणांक धरपाक मथुरेचेर घुरी घालतलें हें कृष्णाक खबर आशिल्लें. राजगृहा सावन मथुरेक पावपाक जरासंधाच्या सैन्याक कितले दीस लागतले. हाचो हिशोब करून कृष्ण आनी बलरामान, वृंदावन आनी मथुरेंतल्या यादवांक इल्ले इल्ले करून द्वारकेंत धाडून दिले. ह्या यादवांक वाट दाखोवपाक कृष्णा वांगडा द्वारकेक गेल्ले तरणाटे आशिल्लेच. जरासंधाचे सैन्य मथुरेचे शिमे मेरेन पावता म्हणसर वृंदावन आनी मथुरा सोडून वचपाची इत्सा आशिल्ले सगळे लोक द्वारकेचे वाटेर आशिल्ले. कांय लोक द्वारकेंत पाविल्ले लेगीत. तांणी आपल्या नव्या घरांनी रावपाक लेगीत सुरवात केल्ली. कृष्ण आनी बलराम हे दोगूय सगळे यादव द्वारकेची वाट धरिसर मथुरेंतूच राविल्ले.
आनी मागीर एक दीस जरासंध ताचें सैन्य घेवन मथुरेचे शिमेर पावलो. थंय ताणें आपलो तळ ठोकलो. थंय पावतकच ताका मथुरेंतले यादव आपणांक भियोवन मथुरा सोडून पळून गेल्यात आनी फकत कृष्ण आनी बलराम राजवाड्यांत रावातात हें कळ्ळें. जरसंधाक भयंकर तिडक मारली. ताच्या सैन्याक आतां कांय कामूच उरुंक नाशिल्लें. दुसरे म्हणल्यार हे फावटी जरासंधान आपले मजतीक कालयवन राजाक ताच्या सैन्या सयत हाडिल्लो. कालयवन राजाची कृष्णा कडेन दुश्मनकाय आशिल्ली. तिचो कृष्णाक बुद्द शिकोवपाक उपेग जातालो अशें जरासंधाक दिसतालें. पूण, आतां लडाय करतलो जाल्यार फकत कृष्ण आनी बलरामूच मथुरेंत आशिल्ले. ताणें रागाचे भिरकेंत आपल्या सैन्याक सबंद मथुरेंक उजो लावपाक सांगलो. आपल्या सैन्याच्या एका पंगडाक ताणें कृष्ण रावतालो त्या राजवाड्या भोंवतणी नदर दवरपाक धाडलो. उजो लागल्या उपरांत कृष्ण आनी बलराम भायर आयले जाल्यार तांकां थंयच मारून उडोवचे अशेंय जरासंधान फर्मायलें.
अनिल नायक
9049079789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
