भांगरभूंय | प्रतिनिधी
मथुरा, खबरां संस्था ः 14 म्हयन्यां आदीं जयपूरांतल्यान अपहरण केल्ल्या अडेज वर्सां पिरायेच्या चल्याक मथुरांतल्यान सुरक्षीतपणान पुलिसांनी सोडयलो. उपरांत त्या भुरग्याक ताच्या आवय-बापायच्या ताब्यांत दितना पुलीस स्टेशनांत एक विचित्र परिस्थिती निर्माण जाली. जाका लागून सगळेच अजाप जाले. त्या भुरग्यान अपहरण केल्ल्या मनशाक वेंग मारुन रडपाक सुरवात केली. ताणें आपल्या आवय- बापायक सोडून अपहरण करप्या कडेन रावपाचो हट्ट केलो. अपहरण करपी उत्तर प्रदेशाचो पुलीस हेड कॉन्स्टेबल आसून तो खाड आनी केंस वाडोवन फरारी जाल्लो.
14 जून 2023 दिसा जाल्लें अपहरण..
पुलिसांनी दिल्ले म्हायती प्रमाण, 14 जून 2023 दिसा जयपुर शारांत अपहरण जाल्ल्याची एका बायलेन कागाळ दाखल केल्ली. 14 जून दिसा तांच्या 11 म्हयन्यांच्या भुरग्यांक कान्हा उर्फ पृथ्वी हाका चार जाणांनी तांच्या घरांतल्यान व्हेलें. त्या चारांतल्या एकल्याक कुटुंबांतले लोक वळखताले. ताचें नांव तनुज चहर. तनुज हो युपी पुलिसांत हेड कॉन्स्टेबल आसा. सध्या ताची नेमणूक अलीगड जिल्ह्यांत आसा. आरोपींनी कुटुंबांतल्या लोकांक मारपेट करून भुरग्याचें जबरदस्तीन अपहरण केल्लें.
जयपूर पुलिसांनी गुन्यांव नोंद करून आरोपींक धरपाक एक पंगड तयार केलो. युपी सयत जायत्या राज्यांनी पुलिसांनी धाड घाली, पूण ताची मातूय खबर मेळ्ळी ना. जयपूर पुलिसांनी अलीगड पुलिसां कडेन संपर्क केलो तेन्ना तनुज ड्युटीचेर गैरहाजीर आशिल्ल्याचें कळ्ळें. ताका निलंबीत केलो आनी तनुज चहर हाची म्हायती दिवप्याक 25 हजार रुपयांचें इनाम जाहीर केलें.
साधूच्या वेशांत पुलीस पंगड तनुजाकडेन पावलें…
तनुज चहरान खाड वाडयलां आनी साधवाचे कपडे घालून तो रावता, अशी म्हायती जयपुर पुलिसांक पांच दिसां पयलीं मेळ्ळी. वृंदावनच्या परिक्रमा मार्गाचेर आनी यमुनाच्या खादर वाठारांत तो एके झोपडपट्टींत रावता. जयपूर पुलिसांच्या पंगडान साधूचो भेस केलो. भजन गायत गायत पंगड आरोपी रावता थंय पावलो. पूण, तनुजाक ते कळ्ळें. तो भुरग्याक घेवन शेतांत धांवलो. पूण, 27 ऑगस्टाक सुरीर पुलीस स्टेशन वाठारांतल्यान तनुज चहर हाका पुलिसांनी धरलो. आनी भुरग्याक सुरक्षीत सोडोवन जयपूर हाडलो.
मजगतीं, पुलिसांचे चवकशेंत आरोपी तनुज हांणी सांगलें की ताका भुरग्याची आवय आवडटा. ताणें तिचेर एकठांय रावपाचो दबाव हाडलो. पूण तिका ते मान्य नाशिल्ल्यान तिच्या पुताचें अपहरण केलें. ताणें केन्नाच खंडणी मागली ना. तो त्या भुरग्याचे आवयक फोन करून तिका पटोवपाची धमकी दितालो. ह्या हट्टीपणाक लागून तनुजान नोकरीय सोडली. पुलिसांक टाळपा खातीर आरोपी वेगवेगळ्या नंबरांतल्यान फोन करतालो. तशेंच तो वारंवार आपली सुवात बदलत आशिल्लो आनी तो आपलें रूपय बदलतालो. आतां तो भुरगो ताचेच कडेन रावपाक सोदता, अशें पुलीस स्टेशनांत दिसून आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
