भांगरभूंय | प्रतिनिधी
प्रभाकर गांवकारः लोकसभा वेंचणुके आदीं डिमिटेशन समितीची स्थापना
भांगरभूंय । प्रतिनिधी
मडगांवः लोकसभा वेंचणुके आदीं डिमिटेशन समिती स्थापन करतले आनी एसटी समाजाक राजकी आरक्षण दिवपाची प्रक्रिया सुरू जातली. एसटी समाजांतले खूबशे पंच, जिल्हो पंचायत वांगडी आनी आमदार लेगीत आसात. ताका लागून मतां खातीर राजकी आरक्षणाची येवजण आखूंक ना, अशें भाजप एसटी मोर्चाचे अध्यक्ष प्रभाकर गांवकार हांणी सांगलें.
दक्षीण गोंय जिल्हो भाजप कार्यालयांत भाजप एसटी मोर्चा वतीन पत्रकार परिशद घेतल्ली. ह्या वेळार प्रभाकर गांवकार हांचे सयत उपाध्यक्ष अँथनी बार्बोझा, खुशाली वेळीप हाजीर आशिल्ले.
गांवकार हांणी सांगलें, एसटी समाजाक राजकी आरक्षण मेळचें म्हूण गोंयच्या शिश्टमंडळान केंद्रीय गृहमंत्री अमीत शाह हांची भेट घेतली. तातूंत मुख्यमंत्री डॉ. प्रमोद सावंत हांच्या फुडारपणा खाला आदिवासी समाजांतले आमदार, विवीध संस्थांच्या प्रतिनिधींचो आस्पाव आशिल्लो.
केंद्रीय मंत्री शाह हांकां एसटी आरक्षणाचो प्रस्न आडकून उरिल्ल्याची मुख्यमंत्री डॉ. सावंत हांणी म्हायती दिली. तेच खातीर डिलिमिटेशन समिती स्थापन करपा संबंदांत बुधवारा जावपी केंद्रीय मंत्रीमंडळाचे बसकेंत हो विशय घेतले, अशें आस्वासन दिलां. भाजप सरकाराच्या यत्नांक लागून आदिवासी समाजाक एसटी दर्जो मेळ्ळो. एसटी समाजा खातीरच्यो येवजण्यो लेगीत भाजप सरकारानूच केल्यात. जाल्यार आतां राजकी आरक्षण लेगीत भाजप सरकारूच मेळोवन दितलें. डॉ. प्रमोद सावंत, केंद्रीय मंत्र्यां कडल्यान मेळिल्ली आस्वासनां पुराय जातलीं आनी मोदी की गॅरंटी प्रमाण आरक्षण लेगीत मेळटलें, असो विस्वास गांवकार हांणी उक्तायलो.
एसटी समाजाक राजकी आरक्षण मेळोवपाक खातीर जाल्ल्या कळावा विशीं उलयतना सांगलें, राजकी आरक्षण मेळोवचे खातीर कांय प्रक्रिया पुराय करपाची गरज आसता. जनगणना जावंक नाशिल्ल्यान कांय प्रमाणांत आडखळी येतात. कायद्या प्रमाण राजकी आरक्षण मेळपाची गरज आसा. हे आदीं योग्य फाटपुरवण करतना कांय उणाव उरिल्ले आसूं येतात. पूण आतां सगळ्या गजालींचो वेळावेळार फाटपुरवण करून हो प्रस्न सोडयतात. अँथनी बार्बोधा हांणी सांगलें, केंद्रीय ग़हमंत्री अमीत शाह हांचे भेटी उपरांत शिश्टमंडळांतल्या सगळ्यांक हो प्रस्न सुटावो जातलो, असो विस्वास आसा. शाह हांणी लेगीत एसटी समाजाचो हक्क दिवपाक 20 वर्सां कळाव जाल्ले खातीर खंत उक्तायली. 2027 चे विधानसभा वेंचणुके आदीं एसटी समाजाक राजकी आरक्षण मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
