भांगरभूंय | प्रतिनिधी
नवी दिल्ली, खबरां संस्था : लोकसभा वेंचणुकेची मतमेजणी ४ जुनाक जातली. मतां मेजपाचे प्रक्रियेंत कसलेच तरेचो गैर प्रकार जावचे न्हय हे खातीर ‘इंडिया’ आघाडींतले पक्ष सतर्क जाल्यात. मतमेजणी केंद्र तशेंच केंद्रां भायल्या यंत्रणांचेर योग्य चेंपण उरतलें हाची जतनाय घेतले. हे विशीं रणनीती थारावपाक १ जुनाक दिल्लींत ‘इंडिया’ची बसका जातली. विरोधकांची रणनीती येसस्वी करपाक देशभरांतल्या नागरी संघटनाय सक्रीय जाल्यात.
मतमेजणी सुरू जातना, प्रक्रिया सुरू आसतना आनी निकाल जाहीर जातना अश्या तिनूय टप्प्यांनी बोवाळ निर्माण जावपाचो भंय विरोधकांनी उक्तायला. देखून दरेका केंद्रांत ‘इंडिया’च्या घटक पक्षांतल्यान सक्षम वेंचणूक प्रतिनिधीची नेमणूक जातली. ह्या प्रतिनिधीक वेंचणुकेच्या यंत्रणे विशीं सगळी म्हायती आसतली. मतां सारकी मेजतात काय ना हाची खात्री अधिकारी करतले. वेंचणूक मशीनांचें सील आनी हेर तंत्रीक गजाली ते तपासतले. मत मेजणेंत गैरवेव्हाराचो दुबाव आयल्यार निशेध करून निमाण्या निकालाचेर सय करप ना अशें धोरण पाळटले. तीन- चार फेरये उपरांत भाजपाचो उमेदवार जिखलो तरी निमाणें मेरेन निरिक्षण करपाची सुचोवणी प्रतिनिधीक दितले. ह्या तंत्रीक पूण म्हत्वाच्या प्रस्नांचेर ‘इंडिया’ बसकेंत खोलायेन चर्चा जातली अशें समजता.
बसकेक कॉंग्रेस पक्षाध्यक्ष मल्लिकार्जुन खरगे, राहुल गांधी, राष्ट्रवादी कॉंग्रेसीचे अध्यक्ष शरद पवार, ‘आप’चे सर्वेसर्वा अरविंद केजरीवाल, समाजवादी पक्षाचे मुखेली अखिलेश यादव, राष्ट्रीय जनता दळाचे तेजस्वी यादव तशेंच द्रमुक, भाकप-माकप, नॅशनल कॉन्फरन्स, पीडीपी, झारखंड मुक्ती मोर्चा आनी हेर सगळ्या घटक पक्षांचे प्रतिनिधी हाजीर रावतले.
मत मेजणीचे प्रक्रिये कडेन सामके खरपणान पळोवपाची गरज आसा. ह्या वेळार एकेका जाग्या खातीर लढिल्ल्यान मतमेजणी वेळार खंयचोच पक्षपात, भेदभाव जावचो न्हय हे खातीर विरोधक दक्ष आशिल्ल्याचें ‘इंडिया’तल्यान फुडार्यांनी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
