भांगरभूंय | प्रतिनिधी
घरांत वाद सोडोवप म्हणल्यार फकत शांत स्वरांत उलोवप न्हय; समजून घेवन वागप, स्वताचो अहंकार कुशीक दवरप.
घर म्हणल्यार निखटे चिरे आनी शिमीटाच्या चार वण्टींचो आलाशिरो न्हय; मनशाच्या भावनांनी, संबंदांनी, अपेक्षांनी आनी अपूर्णतायेन एकठांय दवरिल्लो तो जिवो स्वास. केन्ना ह्या स्वासांत कोमलताय आसता जाल्यार घरांतल्या मनश्या मदीं संवादांतल्यान भासाभास, वाद निर्माण जाता. तिडक, आंबट- गोड चिबडाचे रोसा सारको मोग, घरा भोंवतणीचे आशिल्ले फुलते रातराणीच्या परमळा भशेन घरभर पातळटा. पूण जंय मोग आसता थंय वैचारिक मतभेदूय आसतात. पूण कुटुंबाची वळख वादाच्या अभावांत न्हय, तर काळजांत रिगुन वीख जावंचे पयलीं वाद शांततायेन सोडोवपांत आसता. ‘कुटुंबीक मतभेद घरांत उरपाक जाय’ हो आदल्या जाण्ट्या पिळग्यांचो सल्लो, तर आर्विले व्यस्त, ताणभरीत जिणेंत तो भोव मोलाचो, तितलोच गरजेचो, हें सत कोणूच न्हयकारपाक शकनात.
मतभेद निर्माण जावपा फाटल्यान जायतीं कारणां आसतात. सान दिसपट्ट्या गजालीं पसून ते व्हडले निर्णय घेवपा मेरेन खंयच्याय सुवातेर मतभेदाची किट पेटूं शकता. केन्ना अर्थीक अडचणी, कामाचो ताण, भुरग्यांच्या फुडाराचो हुस्को, आनी थकिल्लें मन आनि कुड ह्या गजालींनी घरांतलें वातावरण भरिल्लें आसता. अशा वेळार एक सादें उतर लेगीत धारदार कोयतेन वार केल्ले भशेन जाणवता. अशा खिणाक घरगुती वाद भायर पडपाक लागतात तेन्ना संबंदांचें बळगें ल्हवू ल्हवू उणें जाता. कारण घरा भायल्या लोकांनी पुराय सत्य केन्नाच पळयिल्लें नासता, देखून फकत तांकां आयकल्ले गजालींत आपली मजरिजवणेंची सोय दिसता. मागीर घरांतल्या गजालींची भायर चर्चा जावंक लागता तेन्ना कुटुंबांतले एकचाराचे बुन्यादीक वेर वता.
जायते फावटीं वाद घालपाचो विशय फालतू आसता. जेवणांत मीठ कमी पडलां, भुरगीं शिकनात, वेळार काम जायना, लायट बंद करूंक ना, पूण ह्या सान दिसपी गजालीं आड जायत्यो भावना आसतात. मनशाच्या संबंदांची गुंतागुंत पळयल्यार दरेकलो आपलेंच तें शंबर टक्कें खरें म्हणपाची ताची प्रवृत्ती आनी ताका खर विरोध करतल्याक वैयक्तीक हल्लो मानपाची वृत्ती निर्माण जाता. हें सगलें चालू आसतना भायल्यांचो हस्तक्षेप तापिल्ल्या वातावरणाचो फायदो घेवपाक तांतून तेल घालून आनीक चड उजो पेटयता. घरगुती वेव्हाराचे नाजूक धागे भायल्या कोणाकूच खबर नाशिल्ल्यान तांच्या टिका आनी सल्ल्यान परिस्थिती आनीक गुंतागुंतीची जावंक लागता. घराच्यो चार वण्टीं फकत कलात्मक सजावटीचें आवरण न्हय; तर तें भावार्थाचें कवच. त्या वण्टींनी आयकल्लीं वायट उतरां भायर जगार वचपाक फावना, कारण तीं उतरां काळजाच्या खऱ्या भावनांनी न्हय तर कांय खिणाक रागांतल्यान येतात. पूण एकदां भायर सरल्या उपरांत तीं उतरां सदां खातीर लोकांच्या यादींनी उरतात.
घरांत भितर वाद जालो तरी फकत थोड्याच उतरांनी शांतताय स्थापन करूं येता. पूण मनांतल्या घट्ट दोरये वयलें संतुलन भायलो संवसार केन्नाच समजूंक शकना. ताका लागून समजून घेवचे बदला ते जुविजा भशेन न्याय करपाक फुडें येतात. नात्यांत माफी, संवाद आनी समजूत हो वाद मिटोवपाचो खरो उपाय. पूण हें कुटुंबांतले वांगडी एकामेकांक वेळ दिवन एकामेकांल्यो अडचणी आयकतात तेन्नाच शक्य जाता. खंयच्याय नात्यांत ‘आमी’ हें उतर ‘हांव’ म्हणपा परस चड उजार जाता थंय मतभेदांचे आकार आपसूक ल्हान जातात. चार वण्टीं भितर उलयतना आवाज केन्नाच भायर पावपा इतलो व्हडलो नासता; पूण एकदां भायर सरतकच ताचो आकार दोब्रात जाता. देखूनच वादाच्या वेळार थांबून विचार करप म्हत्वाचें. विशय नाजूक, म्हत्वाचो तर ताका दावणेंक बांदपाक फावना.
कुटुंब म्हणल्यार दोश- उणाव दाखोवपाची सुवात न्हय; मोगान विणिल्लें कपयाळें पांघरून एकामेकांक समजून घेयत दिसरात सारपाची ती सुवात. भायल्या मनशाची प्रतिक्रिया कांय खिणां पुरती आसता जाल्यार कुटुंबीक संबंद सदां खातीर. आमी घरां भितरल्या मर्यादांच्या नेमांक पाळो दिवप भोव गरजेचें. खर वत, पावस, वादळ हाचे पसून आमची राखण करतात त्यो वण्टी भावनांच्या वादळां पासूनय राखण करुंक शकतात. घरांतले वाद घरांत सुटावे जाल्यार नात्याचें मोल रागाच्या जाग्यार मोगाच्या उजवाडान रुपांतरित जावंक शकता. घरांत वाद सोडोवप म्हणल्यार फकत शांत स्वरांत उलोवप न्हय; समजून घेवन वागप, स्वताचो अहंकार कुशीक दवरप. वाद सोडोवप हें कर्तव्य म्हणून न्हय, तर नातें सांबाळपाचे खोशे खातीर करचें. कारण जेन्ना कुटुंबांतले वांगडी घट्ट उबे रावतात तेन्ना भायल्या चेपणाचो परिणाम जावंक शकना. कुटुंबांतलो मोग, संवाद आनी विस्वास तिगून उरल्यार, कितलोय व्हडलो वाद जालो तरी तो चार वण्टीं भितर शांत जातलो आनी घर परत एक फावट घरगुतीपणान पर्जळीत जातलें.
———————-
सुदिन वि. कुर्डीकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
