भांगरभूंय | प्रतिनिधी
आरजी, गोवा फॉरवर्डाकडेन चर्चा सुरूच : अमीत पाटकार
पणजी : जिल्लो पंचायत वेंचणुकेंत कांय जागे गोवा फॉरवर्ड आनी आरजीक कॉंग्रेस पक्ष सोडपाचो आसा. जागे वाटपाविशीं मतभेद नाशिल्ल्या मतदारसंघांचे उमेदवार दोन दिसांत जाहीर जातलें, अशें प्रदेश कॉंग्रेस अध्यक्ष अमीत पाटकार हांणी सांगलें. कॉंग्रेसीच्या वेंचणूक समितीच्या बसके उपरांत तांणी ही म्हायती दिली..
कॉंग्रेसीच्या वेंचणूक समितीची बसका आयज जाली. आयज सांजे युतीविशीं आरजी तशेंच गोवा फॉरवर्ड पक्षाकडेन चर्चा जातली. काल सोमारा एक बसका जाल्या, अशें प्रदेश अध्यक्ष अमीत पाटकार हांणी सांगलें.
जिल्लो पंचायत वेंचणूक २० डिसेंबराक घेवपाचो आदेश पंचायत सचिवांनी जारी केला. हे विशीं राज्य वेंचणूक आयोगा कडल्यान अधीसूचोवणी जारी जावंक ना. अधीसूचोवणी जारी जावंंक नासली तरी राजकी पक्षा कडल्यान नेटान तयारी सुरू आसा. आरजी तशेंच गोवा फॉरवर्डा कडेन जागे वाटपाविशी अंतर्गत चर्चा सुरू आसा. जे मतदारसंघ कॉंग्रेसीक मेळटले ते उमेदवार पयलीं जाहीर जातले. जागे वाटपाचो फॉर्म्यूला तशेंच हेर गजालींचेर चर्चा सुरू आसा. आयज सांजे लेगीत बसका जावपाची शक्यता तांणी उक्तायली.
जिल्लो पंचायत वेंचणुकेचेर निर्णय घेवपा खातीर कॉंग्रेसीन समिती स्थापन केल्या. प्रदेश कॉंग्रेस अध्यक्ष अमीत पाटकार, विधीमंडळ फुडारी युरी आलेमाव, उपाध्यक्ष एम. के. शेख, आमदार कार्लुस फेरेरा, आमदार ऍल्टन डिकोस्ता हे समितीचे वांगडी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
