मतदार वळेरेंतल्यान भायल्यांक भायर मारात

भांगरभूंय | प्रतिनिधी

आरजीपी मुखेली मनोज परब हांची मागणी

भांगरभूंय । प्रतिनिधी
पणजीः भायल्यांची मतां मेळोवपाक भाजप बिहार, राजस्थान, ओडीशा दीस मनयता. दुसरे वटेन बेकायदेशीर मतदारांची नांवां भायरावपाची मागणी करपी निवेदन भेटयता. प्रदेशाध्यक्ष दामू नायक हांणी भायल्या मतदारां आड कागाळ दाखल करुन तांची नांवां मतदार वळेरेतल्यान काडचें, अशें आव्हान रेव्ह्युलेशनरी गोवन्स पक्षाचे (आरजीपी) मुखेली मनोज परब हांणी दिलां.
पणजे पक्षाचे कचेरेत जाल्ले पत्रकार परिशदेत श्री. परब हांणी भायल्या लोकांनी बेकायदेशीर रितीन मतदार वळखपत्र तयार केल्ल्याचो मुद्दो हातांत घेतलो.
थिवे मतदारसंघातले घोटणेचो व्हाळ आनी लाला की बस्ती तशेंच सांताक्रुज मतदारसंघातल्या बायरो बुथात बहुसंख्य मतदार हे गोंया भायले आसात. तांचीं नांवा मतदार वळेरेंत आसात. जायत्या मतदारांचें वळखपत्रात घर क्रमांक नात. जाल्यार काय जाणांक बेकोयदो रितीन घर क्रमांक दिल्यात आनी एकाच घर क्रमांकाचेर 50 परस चड मतदार वेगवेगळ्या आडनांवांचेर नोंद जाल्यात, असो दावो श्री. परब हांणी केलो.
सद्या भायल्यांक मतदार वळखपत्र दिवन तांची संख्या वाडयल्या आनी नीज गोंयकार हिंदू, क्रिस्तांव आनी मुस्लिम हे सद्या अल्पसंख्यांक जाल्यात. कांय भाजपाच्या आमदारांक जिखून येवपा खातीर हांचें बेसांव जाय देखून हे तांकां मतदार करपाक तेंको दितात. मारवाड्यांनी गोंयकारांक नोकऱ्यो दिवच्यो हे मुख्यमंत्र्यांचें विधान जेन्ना आंगलट आयलें तेन्ना एक स्टंट म्हूण वेंचणुक आयोगाक बेकायदेशीर नांवां मतदार वळेरेंतल्यान भायरावपाचे निवदेन दिलें, असो गंभीर आरोप श्री. परब हांणी केलो.
2021 सावन आमचे वावुरपी हे लोकां आड कागाळी दाखल करून मामलेदारां कडेन सुनावणी घेतात. गोंयभर चडश्या जाणांची मतदार कार्डां आमी रद्द करपाक लायलीं. आमी एक लाख अशीं नांवां वेचणुक आयोगां कडेन दिल्लीं जेन्ना भारताचे उप वेंचणूक आयुक्तान तीं पळोवन भिरांत उक्तायिल्ली. हे करताना मामलेदार कचेरेंत आमच्या वावुरप्यांक कांय स्थलांतरीतांनी धमक्यो लेगीत दिल्ल्यो, अशें श्री. परब हांणी सांगलें.
भाजप प्रदेशाध्यक्षा कडेन सगळ्यो यंत्रणा आसात तशेंच हजारांनी कार्यकर्ते तांच्या मेळाव्यांक हजर आसात. देखून प्रदेशाध्यक्ष दामू नायक हांणी हे आव्हान स्विकारचें. आमी पुराव्यां सयत जीं नांवां दाखयल्यात त्या लोकांआड कागाळ दाखल करून तांची मतदार वळखपत्रां रद्द करचीं. हे खातीर आमी एक सप्तकाची मुजत दितात, अशें श्री. परब हांणी पत्रकार परिशदेंत सांगलें.