मतदार पडताळणे वयल्यान ओगीच वाद !

भांगरभूंय | प्रतिनिधी

वेंचणूक आयोगा सारकिल्ल्या संस्थांचेर आमी निराधार आरोप करून लोकशाय घटमूट करतात असो कोणे समज करून घेतलाच जाल्यार तांकां कितें सांगतले?

सध्या विरोधकांनी वेंचणूक आयोगाची बदनामी करपाची एक व्यापक कार्यावळ हातांत घेतल्या. हाचे वयल्यान असो निश्कर्श काडूं येता की वेंचणुकेच्या मळार सत्ताधारी भारतीय जनता पक्षा कडेन सर्त करपाची तांक वा धैर्य नाशिल्ल्यान तांकां घडये दुसरो पर्याय ना. बिहारांत वर्साचे अखेरेक जावपी विधानसभा वेंचणुकेचे फाटभुंयेर वेंचणूक आयोगान थंयच्या मतदारांची पडताळणी करपा खातीर सुरू केल्ल्या वावराचेर काँग्रेस, राष्ट्रीय जनता दल आनी हेर विरोधी पक्ष इतले आक्रमक जाल्यात की सर्वोच्च न्यायालयान योग्य स्पश्टीकरण दिल्या उपरांत लेगीत तांची एकंदर भुमिका बदलूंक ना, अशें दिसता. कोणे तरी वेंचणूक आयोगाची सामकी बदनामी करूनच वेंचणूक जिखपाक मेळटली असो मंत्र राहुल गांधी आनी तांच्या इंडी वांगड्यांक दिला आसतलो अशें मानलें जाल्यारुच तांणी घेतिल्ले हे भुमिकेक तेंको दिवप शक्य आसा.
नाजाल्यार हो गट सध्या देशाक चुकीची वाट दाखोवपाक सक्रीय आसा अशें कोणेंय गृहीत धरलें जाल्यार तें चुकीचें थारचें ना. महाराष्ट्र विधानसभा वेंचणुकेंत अपेस आयिल्ल्यान वेंचणूक आयोगाक दोश दिवपाचे सतत यत्न यशस्वी जावंक नात वा कोणेच ताची खाशेली दखल घेवंक ना. पूण तातूंतल्यान धडो घेवन तांणी हेर कांय पद्दती आपणावन भाजपाक कात्रेंत धरपाचो यत्न केला आसलो तरी घडये कांय हाताक लागपाची शक्यताय आसूं येताली. पूण तशें करीनासतना बिहार वेंचणुके खातीरय तीच पुरायपणान झरिल्ली कॅसेट तांणी लावची, हाचे वयल्यान तांचे कडेन आतां भाजपा कडेन लढपाक ताचे भायर कांय शिल्लक उरूंक ना, अशेंच चित्र दिसता.
वेंचणूक आयोगाचेर थेट हल्लो करपाक राहुल गांधी केन्नाच थकनात. पयर ओडिशांत जाल्ले ‘संविधान बचाव’ सभेंत उलयतना राहुल गांधीन भाजप महाराष्ट्रा सारकी बिहार विधानसभा वेंचणुकेंत फटींगपण करपाचो यत्न करता आनी ते खातीर वेंचणूक आयोगाचो वापर करता, असो आरोप केलो. तेन्ना खरें म्हणल्यार बिहारांत चालू आशिल्लें मतदार पडटाळणेचें काम बंद करपाक सर्वोच्च न्यायालयान स्पश्टपणान न्हयकार दिल्लो हाचें भान दवरून तांणी उलोवपाची गरज आशिल्ली. पूण सुसंगत उलोवपाचे, जाल्यार ते राहुल गांधी कसले? काँग्रेसी सयत सगळ्या विरोधी पक्षांनी बिहारांत वेंचणूक आयोगान चालू आशिल्लें मतदार पडटाळणेचें काम थांबवपाचो इतलो यत्न केल्लो की हें काम असंवैधानीक आसा असो देशाचो लागींलागीं समज जाल्लो, पूण वेंचणूक आयोगाचें हें काम पुरायपणान घटनात्मक आसा अशें सांगून सर्वोच्च न्यायालयान तें स्थगीत करपाक न्हयकार दिलो, तेन्नाच जायत्यो गजाली भायर सरल्यो. राहुल गांधी आनी आतां ताचे लागींचे जाल्ले राजदचे तेजस्वी यादव सयत सगळे विरोधी पक्ष वेंचणूक आयोगाच्या मतदार पडटाळणी कामाचेर अयोग्य वाद उपस्थित करून आयोगाची बदनामी करपाची एकूच कार्यावळ चालीक लायत आसात. बिहारा उपरांत हेर कांय राज्यांनी विधानसभा वेंचणुकेच्या वेळार हेंच चित्र दिसल्यार अजाप दिसपाचें कारण ना.
‘संविधानाची बचाव’चो सांगोड कोणा कडेन आनी कसो घालचो हाचें सोयरसुतक कोणाकूच ना, मागीर ती काँग्रेस आसूं वा हेर खंयचोय पक्ष, पूण वेंचणूक आयोगाक निमाणें लक्ष्य करपाचें आसा हें मात थारलां. बिहार वेंचणुके आदीं चर्चा जातली अशी अपेक्षा आसली तरी वेंचणूक आयोगाचेर हल्लो करपा बगर विरोधी पक्षांच्या अजेंडाचेर दुसरो कसलोच विशय ना. वेंचणूक आयोग गरजे भायर, अघटित वा अयोग्य अशें कांयच करीना, पूण विरोधा खातीर विरोधाच्या तत्वाचेर हो खेळ खेळटा. ह्या प्रकरणाची सुनावणी सर्वोच्च न्यायालयांत चालू आसतना त्याच दिसा कांय राज्यांनी रस्त्यार आडमेळीं हाडून न्यायवेवस्थेचेर चेपण हाडपाचो यत्न जालो, पूण कांयच साध्य जालें ना. हाचे उपरांत लेगीत वेंचणूक आयोगा आड वाजपी तुणतुणें बंद जालें ना, हाचे वयल्यान लोकांक गोंदळांत घालपा बगर तांकां कांयच साध्य करपाची इत्सा ना अशें दिसता. काँग्रेसीचो राजकी आदार दिसानदीस उणो जायत आसा तेन्ना वास्तवाक सरळ तोंड दिवप तांच्या हितांचें थारपाचें, पूण राहुल आनी तांचे सल्लागार चुकीचे दिकेन भरकटत वचपाक लागल्यात. आतां वेंचणूक आयोगाक दोश दिवन कितेंय साध्य जावपाचें आशिल्लें जाल्यार तशें करपाक कसलीच हरकत नासली, पूण वेंचणूक आयोगाच्या इमारतीच्या वण्टींचेर आपली तकली मारत रावले जाल्यार फकत तकली फुट्टली हें तांकां कोणे तरी सांगचें पडटलें.
बिहाराची एकंदर समस्या वेगळी आसा हें समजून घेवप म्हत्वाचें. बिहारांतल्यान कामाधंद्या लागून हेर राज्यांनी स्थलांतरीत जावपी लोकांचो आंकडो खूब व्हड आसा हाचोय हांगा विचार करचो पडटलो. तरी लेगीत बिहारांत मतदारांची संख्या प्रमाणा भायर वाडल्या अशें दिसता आनी ताचे फाटल्यान आशिल्लीं कारणां विरोधकांक बरी खबर आसून लेगीत मतदार पडटाळणेक विरोध जाता. हाचे वयल्यान नेमके कितें समजूंक जाय होय एक प्रस्नच आसा. बांगलादेशांतल्यान व्हड प्रमाणांत अवैध घुसखोरी कडेन आडनदर करपाक मेळचें ना. अस्तंत बंगाल आनी ईशान्य राज्यां भशेन बिहार आनी झारखंडांतय व्हड प्रमाणांत घुसखोरी दिसून येता. खरे आनी बनावट मतदार सोदून काडप वेंचणूक आयोगा खातीर म्हत्वाचें जालां. अवैध घुसखोरी करपी लोक थंय मतदार जाल्यात जाल्यार तांकां सोदून काडपाचें काम आयोगाक करचें पडटलें आनी ताचेर गरजे भायर वाद निर्माण करून कितेंय साध्य जातलें अशी कोणाकूय अपेक्षा आसल्यार तें चुकीचें. 2003 वर्साय वेंचणुकेचे फाटभुंयेर मतदार पडटाळणी जाल्ली आसतना आतांच आयोगाक आरोपींच्या पांजऱ्यांत घालप कितलें योग्य आसा हाचोय विचार करचो पडटलो. खरें म्हणल्यार सर्वोच्च न्यायालयान मतदार पडटाळणेक पांचवी बावटो दाखयले उपरांत हें सगळें नाटक थांबपाक जाय आशिल्लें, पूण तें घडलें ना हें दुर्दैवी. वेंचणूक आयोगा सारकिल्ल्या संस्थांचेर आमी निराधार आरोप करून लोकशाय घटमूट करतात असो कोणे समज करून घेतलाच जाल्यार तांकां कितें सांगतले?

वामन प्रभू
9823196359