भांगरभूंय | प्रतिनिधी
नवी दिल्ली, खबरां संस्था: मतदार वळखपत्र आधारा कडेन जोडणीविशीं प्रचलीत कायदो आनी सर्वोच्च न्यायालयाच्या आदेशां प्रमाण कृती करतले, अशें वेंचणूक आयोगान स्पश्ट केलां. हे विशीं ह्या मळावेले तज्ज्ञ तशेंच आधार प्राधिकरणा कडेन बेगीनूच चर्चा सुरू करतले अशें स्पश्ट केलें.
वेंचणूक आयोगान मंगळारा दिल्लींत केंद्रीय गृहसचीव, कायदो मंत्रालय तशेंच म्हायती तंत्रज्ञान सचीव तशेंच आधार प्राधिकरणाच्या मुखेल कार्यकारी अधिकार्यां कडेन चर्चा केली. मतदार वळखपत्र आधारा कडेन जोडपी प्रक्रिया सुरू जावंक नाशिल्ल्याची जाप राज्यसभेंत सरकारान एप्रील २०२३त दिल्ली.तशेंच हे खातीर कसलीच कालमर्यादा ना. जांणी आधार जोडणी करूंक ना तांचीं नांवां मतदार वळेरेंतल्यान काडचे ना अशें सरकारान ह्या वेळार स्पश्ट केल्लें.
फकत भारताच्या नागरिकाकूच घटनेप्रमाण मतदानाचो हक्क मेळटा. जाल्यार आधारान मनशाची वळख स्थापीत जाता. हाका लागूनच घडणुके प्रमाण मतदान वळखपत्र आधाराक जोडटले, अशें थारायिल्ल्याचें वेंचणूक आयोगान नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
