मतदारांनी घणसाबैल जावचे न्हय

भांगरभूंय | प्रतिनिधी

पंचायतींत रस्त्यार पडिल्ली काडी लेगीत एका जाग्या वयल्यान दुसरे सुवातेर व्हरपा खातीर थळाव्या आमदाराची वा मंत्र्याची परवानगी जाय अशें आतां सगल्यांक खबर आसा.

गोंयांत जिल्हो पंचायत फक्त एक शोपीस. फाटल्या वीस वर्सांत सरकारान हे संस्थेक कसलोच हक्क दिवंक ना. ताका दिल्लो अर्थीक निधीय 25-30 लाखां मेरेन मर्यादीत आसा. तरी लेगीत हे खेपे जिल्हो पंचायतीची वेंचणूक खूब गंभीरतायेन लडत आसात अशें दिसता. हडफाडेंची बर्च नायट क्लबाची वायट घडणुकेची फाटभूंय पळोवन ही वेंचणूक मात्शी गंभीर जाल्या आसुये.
सध्याचे कांय आमदार जिल्हो पंचायत वेंचणुकेंतल्यान ह्या पदाचेर पावल्यात, ताका लागून सत्ताधारी आमदार जिल्हो पंचायतीचे वेंचणुकेंत असो उमेदवार उबो करपाचो येत्न करतात की जो तांचे म्हत्व उणें करून तांचे तकलेर बसतलो. हो एक मुद्दो कुशीक दवरून हजारांनी कोटी भौशीक पयशे खर्च करून ही वेंचणूक घेवप म्हणल्यार भौशीक निधीची नाशाडी. आतां मतदार हे वेंचणुकेचो कसो उपेग करतले आनी हे वेंचणुकेंतल्यान राजकी पक्ष खंयचीं गणितां मुखार दवरतले हाचेर थोडो विचार करुया.
गोंयांत कायदो आनी सुवेवस्था काबार जाल्या हें आतां स्पश्ट जालां. बर्च शोकांतिका उपरांत एक एक करून नायट क्लब आनी हेर आस्थापनां सील करपाक लागल्यांत हीं हाचीं जिवीं उदाहरणां. पर्यावरणाक आनी समाजीक वेवस्थेक हानिकारक अनियमीत गजाली नियमीत करपा खातीर एक एक कायदो दुरुस्ती सरकारान हाडल्या. आतां आमी कारवाय केल्या असो धोल बडयतात. ही घडणूक घडली ना जाल्यार कायद्यांत दुरुस्ती हाडून ह्या सगल्या क्लबांक नियमीत करून ‘म्हजो नायट क्लब’ अशी येवजण हाडपाक फाटीं उरचे नासले.
पंचायतींत रस्त्यार पडिल्ली काडी लेगीत एका जाग्या वयल्यान दुसरे सुवातेर व्हरपा खातीर थळाव्या आमदाराची वा मंत्र्याची परवानगी जाय अशें आतां सगल्यांक खबर आसा. पंचायत वाठारांतल्या सगल्या बांदकामां खातीर ते कायदेशीर आसूं वा बेकायदेशीर, पंच, सरपंच आनी थळाव्या आमदाराचो आशिर्वाद जाय पडटा. देखून आतां ‘तो मी नव्हेच’ हो खेळ खेळपी राजकारण्यांचेर कोणूच विस्वास दवरचो ना. सरकाराचेर नियंत्रण दवरपाक विरोधी पक्ष पुरायपणान अपेशी थारला. गोंयच्या लोकां आड आनी राज्या आड घेतिल्ल्या जायत्या निर्णयां आड रस्त्यार देंवून सरकाराक हे निर्णय फाटीं घेवन लावपाक विरोधी पक्षाचो एकूय फुडारी येसस्वी जालो ना.
जिल्हो पंचायतीच्या निमतान सरकाराच्या बेकायदेशीरपणाच्या धोरणा आड गोंयांत आवाज उठोवपाची आनी मतदारांक शिटकावणी दिवपाची बरी संद विरोधी पक्षाक मेळ्ळी. पूण विरोधी पक्षाच्या सगल्या फुडाऱ्यांक हे संदीचो फायदो घेवंक जमलें ना. आयज गोंयाक कणखर, सक्षम आनी निसुवार्थी फुडारपणाची गरज आसा. गोंयचें पर्यावरण तिगोवन दवरतना गोंयची उदरगत करतना गोंयच्या सैमाचो इबाड जावचो ना अशी नदर आसपी फुडारी जिल्हो पंचायत वेंचणुकेंतल्यान उदेल्लो जाल्यार आयची जिल्हो पंचायत वेंचणूक व्हड येशस्वी मानपाची. पूण दुर्दैवान असो खंयचोच जिल्हो पंचायत उमेदवार ह्या कामाक योग्य दिसना.
अशे परिस्थितींत 2027 वर्साचे वेंचणुकेंत लोकांनी कोणा कडेन पळोवचें? पर्यावरणा खातीर झगडपी आनी गोंयच्या हिता आड येवपी गजालींक विरोध करपी कांय संघटणांनी हे खातीर व्हड येत्न केल्यात. पूण सुवार्थाक लागून कुड्डे जाल्ले विरोधी पक्षाचे फुडारी साबुदीर आयले नात आनी फुडाराक येतले अशी अपेक्षा ना. आयज राज्यांत प्रचलीत आशिल्ल्या बेलगाम सत्तेक विरोध हे वेंचणुकेंतल्यान उक्तावपाक जाय. पूण हे खातीर विरोधी पक्ष मतदारांक बरे पर्याय दिवंक शकलो ना.
अशे परिस्थितींत मतदारांनी हाचेर विचार करून निर्णय घेवप गरजेचें जालां. जंय अमर्यादीत जमनीचें रुपांतर जालां, लोकांचे इत्से आड, लोकांच्या हिता आड, पर्यावरणाच्या हिता आड, सगल्या भौशीक भावनांक पांय मारून, सरकार प्रकल्प हाडपाचो येत्न करता वा प्रकल्प हाडला, अशा सुवातेर तरी लोकांनी मतदानांतल्यान आपली खर विरोधाची भावना उक्तावपाची गरज आसा. स्वताचो, कुटुंबाचो सुवार्थ, मंत्र्याचो भंय, पक्षा कडेन लागींपण हे सगले मतभेद कुशीक दवरून फक्त गोंयचें हीत मतींत दवरून लोकांनी मतदान केल्यार उरिल्ल्या एका वर्सान सरकाराच्या निर्णयांत खूब बदल दिसतलो. शंबर टक्के साक्षरतायेचें प्रमाण आशिल्ले गोंयचे मतदार बुदवंत, सुसंस्कृत आनी परिस्थितीची जाणविकाय करून मतदान करतले हें दाखोवपाची ही संद. अशें जालें ना जाल्यार गोंयचे मतदार असहाय्य, दाव्याक बांदिल्ले घणसाबैल आनी कितें घडटा तें कळना अशें नाटक करपी समाज अशें चित्र उदेतलें.
प्रचाराक भोंवपी उमेदवारांच्या फाटल्यान आशिल्लें तरणाट्यांचें सैन्य आनी उमेदवारी पत्र भरपा खातीर शेंकड्यांनी हाजीर आशिल्ले समर्थक हांचो विचार करीत जाल्यार ही अपेक्षा दवरप हे बाबडेपणाचें लक्षण आसा हें जाणून लेगीत हें बरप बरयलां.

गणपत वि. सिद्धये
9764148006