भांगरभूंय | प्रतिनिधी
नारी शक्त, युवा शक्त, किसान शक्त आनी गरीब कल्याण ह्या घटकांक न्याय दिवन विकसीत समाज निर्माण करपाचे दिशेन वचपी अर्थसंकल्प अशें मुख्यमंत्री दो. प्रमोद सावंत हांणी अर्थसंकल्पाचें वर्णन केलां. राज्यांत सध्या 40 मतदारसंघ आसात. तातूंत उदरगतीचीं आनी हेर कामां करपाक ह्या अर्थसंकल्पांत दरेकी 40 लाखांची तरतूद केल्या. संबंदीत लोकप्रतिनिधींनी हो पयसो सबका साथ, सबका विकासा खातीर हें घट मतींत दवरून वावराक लागचें पडटलें. एक पयसो पसून व्हांवन वच्चो ना, हाची जतनाय घेवची पडटली. 390 घोशणां मदल्या 388 घोशणांची कार्यवाही सुरू जाल्या. हे प्रमाण 99.49 टक्के जाता. पूण विरोधकांच्या मतान हो अर्थसंकल्प फाटल्या अर्थसंकल्पांतल्यानूच तयार केला. कारण तो फक्त पाव टक्केच चालीक लागला, अशें तांचें मत. 26,855 कोटी रुपयांचो हो अर्थसंकल्प लोकसभा वेंचणुकेचेर दोळो दवरून तयार केला. फिल गूड फॅक्टर, तयार करपाचो हो यत्न अशेंय तांकां दिसता. विरोधकांचीं मतां विचारांत घेवन ह्या अर्थसंकल्पांतली प्रत्येक गजाल फुडल्या अर्थीक वर्सा मेरेन प्रत्यक्षांत हाडपाची कसरत सरकाराक करची पडटली. अर्थात सरकारी यंत्रणेचो प्रामाणीक पालव जाय पडटलो…. आनी समाजांतल्या संबंदीत घटकांचोय!!
आदले मुख्यमंत्री मनोहर पर्रीकार, सभापती राजेंद्र आर्लेंकार हांणी अर्थसंकल्प, सभाघराचें कामकाज कोंकणींतल्यान चलोवपाचो बरो यत्न केलो. हेर राज्यांनी आमदार थंयचे राजभाशेंत उलयतात, तशे गोंयांतूय कोंकणींत उलयतात, पूण तांचो आंकडो तसो उणोच. आतां विधानसभेचें कामकाज सोशल मिडियाचेर, टीव्हीचेर पळोवपाक मेळटा. म्हणटकच गोंयकारांक वेगळें सांगपाक नाका. अंदूंच्या अर्थसंकल्पाचें खाशेलेंपण म्हणल्यार आंकडेवारीचे तक्टे सोडल्यार तो पुराय कोंकणींत बरयिल्लो आनी सभाघरांत मांडिल्लो! ते खातीर सावंत सरकाराक परबीं फावता. सात लाख गोंयकार आमी, यूग नवे फुलयतले, हें बाकीबाबांचें सपन मुख्यमंत्र्यान वाचून दाखयलें. आतां लोकसंख्या 16 लाखांचेर पावल्या आसतली. तरीय नवें आनी बरें यूग फुलोवपाची जापसालदारकी सगल्यांच्याच भुजांचेर आसा.
शिक्षण, कृशी, कुशळटाय, येरादारी ह्या मळां खातीर बरी अर्थीक तरतूद केल्या. कुशळटाय विकासाचेर भर दिवपाचें थारलां. हें म्हत्वाचें. गोंयकार ही कलाकार, कारागिरांची भूंय. तांचे कुशळटायेक संद मेळ्ळ्यार तांकां नोकरी पसून करपाची गरज ना, इतलो दुडू आसा कला मळाचेर. ते नदरेन कितें- कितें करपाक मेळटलें, हाचेर विचार जावंक फावो. गोंयची वळख आशिल्लीं खाणां, वस्तू आयज ना नपयत जायत आसात. तीं कामां आतां भायल्यांच्या हातांत गेल्यात. आपली कला विसरायेर घालून सगलेच जर सरकारी नोकरे फाटल्यान धांवक लागले, जाल्यार गोंयचें कला विश्वूय पुरायपणान परप्रांतीयांच्या हातांत वतलें. राजभाशेक उर्बा, उदरगत आनी संशोधनाची येवजण आंखल्या, कोंकणी भाशेचें दस्तावेजीकरण, एनिमेशन प्रकल्प सुरू जावपाचो आसा. राजभास खात्याक 21.70 कोटी मेळटले. राज्यांतल्या प्रचलीत भाशांच्या जतनाये खातीर 6.69 कोटी रुपया दवरल्यात. हो सगलो पयसो शाश्वत, काळाचे व्हांवतेंत तिगपी कामां खातीरूच वापरपाची गरज आसा. कोंकणी कवी मनोहरराय सरदेसाय आनी विचारवंत रवीन्द्रबाब केळेकार हांची जल्मशताब्दी सरकारी पांवड्यार मनोवपाचो बरो निर्णय जाला. हाचेच वांगडा राजभास दीस, जनमत कौल दीस, कोंकणीचे युगपुरूस शणै गोंयबाब हांची पुण्यतीथ आनी जयंतीय सरकारी पांवड्यार मनोवपाक जाय.
आमच्या गोंयांत कांय विशय आसात, ते सामके संवेदनशील अशे. सरकाराक हाची जाणीव आसा. पुर्तुगेझांनी पांचशें वर्सां पयलीं नश्ट केल्ल्या देवळांचें एक यादस्तीक बांदपाक 20 कोटीं रुपया दवरल्यात. तें देवूळ पर्यटनाचें थळ जावचें. वांगडा किल्लेय जोडूं येतात. कारण तांचोय विकास जावपाचो आसा. पोरण्यां गोंयच्या सेंट झेवियर फेस्ता खातीर सरकारान 10 कोटींची तरतूद केल्या. गोंयच्यो कांय वेंचीक जात्रा, फेस्तां हे राज्य उत्सव जाल्यार वेवसायीक गोंयकारांक फायदोच जातलो. विवीध माध्यमांतल्यान केंद्र सरकारा कडल्यान गोंयाक 1506 कोटींचो निधी मेळटलो. तो वाडोवन मेळटलो हे खातीर सेगीत यत्न जावप गरजेचें. सरकारी कर्मचाऱ्यां खातीर उण्या दरांत घर खरेदीची येवजण परतून चालू जाल्या. ते खातीर 15 कोटींची तरतूद केल्या. खाजगी कर्मचाऱ्यां खातीरूय अशीच एखादी येवजण तयार करूं येता. कारण गोंयांत घर घेवप आयज कल्पने भायलें सपन जालां. मानसीक दुयेंती, दिव्यांग, थळावीं भलायकी केंद्रां हांचे खातीरूय दुडू दवरला. नवीं भलायकी केंद्रांय जातलीं. मात जीएमसी वयलें वजें उणें जातलें, हाचे खातीर खाशेले यत्न जावंक जाय. हें चड म्हत्वाचें.
उदक, वीज, दुयेंसां, येरादारी…. गोंयकारांक दीसपट्टे आदळपी सगल्या प्रस्नांचेर अर्थसंकल्पांत तरतुदी आसतात. त्यो चालीक लागतल्यो आनी मतदारसंघांची सर्वांगी उदरगत जातली अशी आस्त बाळगुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
