मतदानाचेर बहिश्कार घालूं नाकात

भांगरभूंय | प्रतिनिधी

वेंचणूक अधिकाऱ्याचो काणकोण चिपळेच्या मतदारांक उलो

भांगरभूंय । प्रतिनिधी

काणकोणः पैंगीण पंचायतीच्या मार्ली प्रभागाच्या चिपळे, काळशी वाठारांतल्या मतदारांनी मतदानाचेर बहिश्कार घालपाचो निर्णय घेतला. सरकारान ताची गंभीर दखल घेतल्या. काणकोणचो मामलेदार तशेंच वेंचणूक अधिकारी मनोज कोरगांवकार हांणी चिपळे वाड्याचेर वचून मतदारांची भेट घेतली आनी तांचे कडेन चर्चा केली. घटनेन ज मतदानाचो हक्क दिला, ताका पाळो दिवपाचो तांणी उलो मारलो. ह्या वाठारांतल्या मतदारांनी जे मुद्दे उपस्थीत केल्यात, ताका आतां खूब उशीर जाला. सेगीत तीन वेंचणुकांनी त्या प्रभागांत अनुसूचीत जाती जमाती खातीर राखीव दवरून भोवसंख्य आशिल्ल्या मतदारांचेर अन्याय जाला. मतदान केंद्र काळशी, चिपळे, बादेगाळ, तिर्वण ह्या वाठारा पसून 16 किलोमिटर अंतराचेर आसा. आयज मेरेन वेंचून आयिल्ल्या प्रतिनिधींनी ह्या वाठारा कडेन केन्नाच लक्ष दिवंक ना. परतून परतून वीज पुरवण बंद जावप, उदकाची समस्या, अश्यो साबार समस्या ह्या वाड्या वयल्या मतदारांनी वेंचणूक अधिकारी कोरगांवकार हांचे मुखार मांडल्यो. त्यो सगळ्यो तांणी आयकून घेतल्यो आनी त्यो सोडयतलो जाल्यार आतां खूब कळाव जाला, अशें सांगलें. वेंचणूक जाहीर जावचे आदीं ते खातीर यत्न करपाक जाय आशिल्ले. विधानसभा आनी पंचायतींच्या वेंचणुकांची पद्दत वेगळी आसा. पंचायत वेंचणुकां संबंदांतलो निर्णय राज्य वेंचणूक आयोग घेता. तुमच्यो मागण्यो ग्रामसभे मुखार मांडात. तेच वांगडा तुमची तिडक मतदानांतल्यान उक्तयात, पूण मतदानाचेर बहिश्कार घालूं नाकात, अशें तांणी सुचयलें.

घडये मतदान करतलेः कोरगांवकार

आपणें चिपळेच्या सगळ्या मतदारांचें मन वळोवपाचो यत्न केलां. चड करून मतदान करपा खातीर मतदार तयार जातले, असो विस्वास वेंचणूक अधिकारी मनोज कोरगांवकार हांणी उक्तायला.