भांगरभूंय | प्रतिनिधी
मणीपूर लिंगीक अत्याचार प्रकरण अजून गाजता. विरोधी ‘इंडिया’ आघाडेच्या खासदारांचें शिश्टमंडळ थंय वचून आयलें. तांच्या मतान, मणीपुरांत वातावरण अजून निवळूंक ना. थंय दोंगरार रावपी अल्पसंख्यांक आनी देंगणांनी रावपी भोवसंख्यांक हांचे मदल्यान उजो वचना. सांज जाली काय फारपेटाचे आवाज आयकूंक येतात. दोन धर्मां मदीं दुस्वास निर्माण जाला. प्रधानमंत्री, गृहमंत्र्यान थंय वचून पळोवणी करुंक जाय, असो विरोधी आघाडेचो आग्रो. ते खातीर तांणी संसदेंचें कामकाज आडायलां. 10 दीस जायत आयले. काल सोमारा कांय मिनटां उपरांत कामकाज तहकूब करचें पडलें. विरोधी पक्ष बहिश्कार घालतात तेन्ना वेळ फुकट वताच, पूण लाखांनी रुपया मातयेंत वतात. हाचो सगल्यांनीच विचार करपाक जाय. देश स्वतंत्र जायत सावन हें चलत आयलां.
मणीपूर प्रकरणाक आतां धर्मीक मोडण मेळ्ळां. कांय जाण रंगीत वक्लां लावन हे घडणुके कडेन पळयतात. देखून बेगीन तोडगो येवपाक जाय. उपचार करीनासतना घांवो तसोच दवरलो जाल्यार गँगरीन जावपाक वेळ लागचो ना. तशें जावप म्हणजे म्हासत्ता जावपाचे दिशेन नेटान वाटचाल करपी आमच्या म्हान देशा मुखार आडमेळें उबें करप. फुडाऱ्यांक हाची जाणीव आसतलीच. तेन्ना मणीपूर प्रस्नाचेर संतुळीत भासाभास जावची.
मणीपुरा वयल्यान काल गोंय विधानसभेंतूय गोंदळ जालो. सात आमदारांक दोन दिसां मेरेन निलंबीत केल्ले. पूण उपरांत हें निलंबन एक दिसाचेर हाडलें. शून्य वराच्या काळांत आमदार जीत आरोलकार हांकां घेराव घालून तांच्या हातांतलीं कागदां ओडून घेतिल्ल्यान सभापतीन ही ख्यास्त दिल्या, अशें सत्ताधारी वांगड्यांचें मत, तर विरोधक म्हणटात, व्हिडियो पळयल्यार कळटलें, त्या वेळार वातावरण गंभीर नाशिल्लें!! विरोधी आमदार काळे कपडे घालून मणीपूर प्रकरणा कडेन केंद्र सरकार लक्ष दिना, अशें म्हणीत निशेध करपाचे तयारेंत आयिल्ले. फलक घेवन मुखार वतकच ‘केंद्र सरकार गंभीर आसा. तुमकां शुक्रारा भासाभास करपाक मेळटली’ अशें सभापतीन तांकां सांगलें. पूण विरोधकांनी चर्चा करपाचो आग्रो धरलो आनी उपरांत तांकां सुरक्षा कर्मचाऱ्यांच्या साह्यान भायर धाडले. निलंबनूय जालें.
संसदेंतूय फाटले 10 दीस मणीपूरा वयल्यान विरोधकांनी भासाभास करपाची मागणी लावन धरल्या. दोनूय सभाघरांचें कामकाज तहकूब जालां. 267 नेमाचेर चर्चा जावंक जाय. प्रधानमंत्री नरेंद्र मोदी हांणी मणीपूर प्रकरणाचेर भाश्य करपाक जाय, अशी विरोधकांची मागणी आसा. ‘ती मान्य जायना. सरकाराक हो मुद्दो टाळपाक जाय’, अशें विरोधकांचें म्हणणें, तर ‘चर्चा करपाक तुमी सभाघरांत तरी येयात, जाय तितली चर्चा करूंया’, अशें सत्ताधारी गटाच्या कांय मंत्र्यांचें मत. ते वटेन राज्यसभेचे सभापती जगदीप धनकड हांणी म्हाका 267 नेमा खाला 65 नोटिसो मेळ्ळ्यात. ह्यो सगल्यो सध्या वाचतां, अशें म्हणटकच बोवाळ जालो आनी ताचो राज्यसभेच्या कामकाजाचेर परिणाम जालो. विरोधक आनी सत्ताधारी मणीपुरा बाबतींत एकमेकांक बोटां दाखयतात, अशें सध्या तरी दिसता. राज्यसभेंत ल्हान भासाभास जाली. पूण विरोधकांचे म्हणणें, व्हडली चर्चा जावची आनी प्रधानमंत्र्यान हाचेर उलोवचें.
गोंय विधानसभेंत आतां शुक्रारा मणीपुराचेर भासाभास जातली अशें जाहीर जालां. मणीपुरांतले बरेच लोक गोंयांत स्थायीक जाल्यात. थंयचें समाजीक वातावरण नेमकें कशें आसा, तें तांकां खबर आसतलें. आमच्या गोंयांत आम्ही सगळे भाव- भाव कशे रावतात. निदान तशें दिसता. भितरल्यान आमकां एकमेकां मदीं दुस्वास दिसताय आसतलो. अर्थांत असले गोंयकार संख्येन खूबच उणे आसतले. कारण राज्यांतल्या प्रत्येक गांवांत सगल्या धर्मांचे लोक भावचारान, मायेमोगान वागतात. तांचे मदीं फूट घालपाचो यत्न कोणें करपाक जायना. दुस्वास पेरतकच राजकी फायदो घडये जावं येता, पूण समाजीक जीण विस्कटून वता. लोकशाय पोकळ जाता. मनशाक हाचो सामाजीक त्रास, मनस्ताप जाता. साद्या कारणां वयल्यान मागीर शांत लोक पसून म्होंवा माल्यार फांतर मारतकच मूस जशे चाळवतात, तशे उंचाबळ जावन केस्तांवां करतात. उत्तर भारतांत हें खूब फावटीं जालां. आमचो देश हो सगल्यांत व्हडलो लोकशाय देश. पूण कांय लोकां खातीर तो बदनाम जाला. मणीपूरांत जें जालें, ताचेर सरकार पक्षान आपलें म्हणणें मांडप गरजेचें. सत्ताधारी, विरोधकांची ताचेर भासाभास जावची. पूण, ती करतना त्या उज्यांत तेल पडून ताचें होमखण जावचें ना, हाचीय जतनाय सगले घेतले, हाची खात्री आसा. कारण आमी गोंयकार शांत, समंजस. हलक्या कानांचे न्हय आमी!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
