भांगरभूंय | प्रतिनिधी
इंफाळ: मणिपूरच्या बिष्णुपूर जिल्ह्यांतल्या मोइरांग ट्रोंगलाओबी वाठारांत सोमारा रातीं उसरां दहशतवाद्यांनी एका घराचेर बॉम्ब उडयलो. जातूंत ५ वर्सांच्या चल्याचो आनी स म्हयन्यांचे चलयेक मरण आयलें. पुलीस अधिकार्यान सांगलें, जेन्ना घरांत बॉम्ब फुटलो तेन्ना भुरगीं तांचे आवय वांगडा बेडरुमांत न्हिदिल्लीं. तांची आवय जखमी जाली.
थळाव्यांनी हे घडणुकेच्या निशेधान मंगळारा सकाळीं आंदोलन केलें. ह्या वाठारांतल्या एका पेट्रोल पंपा लागसार दोन ऑयल टँकर आनी एका ट्रकाक उजो लायलो. तांणी मोइरांग पुलीस स्टेशना लागसारा टायर लासले आनी एक पुलीस चौकी मोडली.
उपरांत जमावान घडणुके सुवाते पसून १०० मिटर पयस आशिल्ल्या सीआरपीएफ कॅम्पाचेरूय हल्लो केलो. प्रत्युत्तरांत दाखल केल्ले फारपेटींत दोगांक मरण आयलें, पांच जाण जखमी जाले. मणिपूर सरकारान सध्याची कायदो आनी सुवेवस्था परिस्थिती लक्षांत घेवन, इंफाळ पश्चीम, इंफाळ पूर्व, थौबल, काकचिंग आनी बिष्णुपूर जिल्ह्यांत इंटरनेट आनी मोबायल डेटा सेवा ३ दिसां खातीर बंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
