भांगरभूंय | प्रतिनिधी
भांगरभूंय । प्रतिनिधी
बेळगांवः धर्मगुरू, माद्री आनी हेर फुडाऱ्यांचो आसपाव आशिल्ल्या बेळगांवच्या किरिस्तांवांच्या एका शिश्टमंडळान राष्ट्रपती द्रौपदी मुर्मू आनी पंतप्रधान नरेंद्र मोदी हांका एक निवेदन सादर करपाक दिवंन तातूंत मणिपूर दंगलीच्या पिडेस्तांक तशेंच कुस्तीम्हासंघाच्या आदल्या अध्यक्षा आड आंदोनल करपी बायल कुस्तीगिरांक न्याय दिवपाची मागणी केल्या.
बेळगांव जिल्ह्याची अतिरिक्त उपायुक्त के टी शाथाला हिचे कडेन हें निवेदन दिवंन तें राष्ट्रपती आनी प्रधानमंत्र्याक धाडपाक तांणी सांगला. शिश्टमंडळांत कॅथोलीक असोसिएशनाची अध्यक्ष क्लारा फर्नांडीस, फादर जॉनी, फादर विजय मेन्डेत, बेळगांव डायोसिशन पीआरओ लुईस रॉड्रिग्ज, सेंट जोसेफ कॉन्व्हेन्टाचो वेवस्थापक सिस्टस नातालिया, रोस अब्राहम हांचो आसपाव आशिल्लो.
इशान्ये कडल्या मणिपूर राज्यांत मानवी हक्कांची जी पायमल्ली चल्ल्या आनी मालमत्तेचें जें लुकसाण जाला ताचो किरिस्तांव समाजाक धपको बसला. दंगलीक लागून जाय त्या जाणाक जीव वोगडावचो पडला आनी हजारांनी लोक बेघर जाल्यात, भोवसंख्या मणिपुरी आनी अल्पसंख्यांक कुकी- झोमी जमाती हाचें मदीं जाल्ले हे दंगली वेळार 317 चर्ची आनी 70 शाळा इमारींत उजो लायलो. 75 किरिस्तावांक तातूंत मरण आयलां. ह्या सगल्यांक न्याय मेळोवन दिवपाची मागणी निवेदनांत केल्या.
राष्ट्रीय कुस्ती म्हासंघाचो आदलो अध्यक्ष ब्रिजभूषण शरण सिंह हाचे आड लिंगीक अत्याचारा खातीर दिल्लींत आंदोलन करपी बायल कुस्तीगिरांच्यो मागण्यो मानून घेवंन तांका न्याय दिवपाचीय मागणी ह्या निवेदनांत केल्या.
कर्नाटका सयत देशांत हेर कडेन किरिस्तांवाक जावपी मारपेट करतल्यांचेर कारवाय करपाची मागणी निवेदनात केल्या. भारतीय संविधानांत धर्मीक स्वातंत्र्य दिलां मात देशांत काय कडेन किरिस्तांवांक लक्ष्य करतात अशें निवेदनांत नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
