भांगरभूंय | प्रतिनिधी
जिरिबाम, खबरां संस्था: मणिपूरच्या जिरिबाम जिल्ह्यांतल्या जाकुराडोर कारोंग हांगा ११ नोव्हेंबराक सुरक्षा दळ आनी बंडखोरां मदीं फारपेट जाल्लो. हातूंत सुरक्षा दळान १० बंडखोरांक मारले. मरण आयिल्ले सगळे कुकी समाजांतले आशिल्ले. हे घडणुके उपरांत सुरक्षा दळान हांगा रावपी मेतैई समाजांतले कांय लोक बेपत्ता जाल्यात अशें सांगिल्लें. तांचें अपहरण जालां आसूं येता, असोय दुबाव आशिल्लो.
मंगळारा जाकुरधोर वाठारांत दोन जाण्ट्यांच्यो अर्दवट जळिल्ल्यो कुडी सांपडल्यो. त्या दोगांयचीय वळख अजून पटूंक ना. ३ बायलो आनी ३ भुरग्यां सयत ६ जाण अजूनय बेपत्ता आसात अशें अधिकार्यांनी सांगलें.
मरण आयिल्ले स्वयंसेवक आशिल्ले
कुकी संघटनांनी खंयच्याच आकांतवाद्याक वा बंडखोरांक मरण येवंक ना, असो दावो केला. सगळे कुकी गांवांतले स्वयंसेवक आशिल्ले. मंगळारा घडिल्ली घडणूक पळोवन सीआरपीएफान शिबिरा भायर सरूंक फावना अशेंय तांणी सांगलें.
आयजीपी ऑपरेशन्स आयके मुइवाह हांणी संघटणांचो दावो न्हयकारलो. मरण आयिल्ल्या सगळ्यां कडेन अत्याधुनीक शस्त्रां आशिल्लीं अशें तांणी सांगलें. ते सगळे हांगा अराजक निर्माण करपाक आयिल्ले. हाचे वयल्यान ते सगळे बंडखोर आसात हें सिद्ध जाता.
सीआरपीएफचेर कुकी समाजान केल्ले टिप्पणीचेर तांणी सांगलें, पुलीस आनी सुरक्षा दळ भारत सरकारा खाला काम करतात. ते सदांच वेगवेगळ्या एजन्सीच्या मार्गदर्शना खाला काम करतात. पुलीस, सीआरपीएफ सारक्यो सुरक्षा एजन्सी आपलें कर्तव्य चालू दवरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
