भांगरभूंय | प्रतिनिधी
इम्फाळ, खबरां संस्थाः मणिपूरच्या हिंसाग्रस्त जिरिबाम जिल्ह्यांत फाटल्या सप्तकांत बेपत्ता जाल्ल्या तिगांच्यो कुडी शुक्रारा सांपडले उपरांत नागरिकां मदीं पातळिल्ली तिडक राजधानी इम्फाळ मेरेन पावली. मरण आयिल्ल्यांक न्याय मेळचो अशी मागणी करपी तिडकीन भरिल्ल्या आंदोलकांनी तीन मंत्री आनी स आमदारांच्या राबित्याचेर लक्ष्य केलें. ते उपरांत प्रशासनान इम्फाळ देगणांत कर्फ्यू घालून इंटरनॅट सेवा स्थगीत केल्या.
फाटल्या सप्तकांत जिरिबाम हांगा सुरक्षा दळां कडेन जाल्ले फारपेटींत कुकी- झो समाजांतल्या १० बंडखोरांक मरण आयलें. तेन्ना मजत कॅम्पांतले कांय जाण बेपत्ता जाल्ले. दुसर्या दिसा सोद कारवाय करतना तातूंतल्या दोग जाणांच्यो कुडी सांपडल्यो. जाल्यार शुक्रारा मणिपूर-आसाम शिमेचेर जिरी आनी बराक न्हंयांच्या संगमा लागसारा एक बायल आनी तीनल्हान भरग्यांच्यो कुडी सांपडल्यो. ताका लागून इम्फाळांत तिडकीचें ल्हार निर्माण जालें.
इम्फाळांत तिडकीन भरिल्ल्या लोकांनी स आमदारांतल्या तीन आमदारांच्या घरांत तोडफोड करून तांच्या मालमत्तेक उजो लायलो. इम्फाळ देगणांतल्या इम्फाळ उदेंत आनी अस्तंत, विष्णुपूर, थौबल आनी काचिंग ह्या जिल्ह्यांतल्या कायदो आनी सुवेवस्था इबाडिल्ल्यान सात जिल्ह्यांनी कर्फ्यू घालून इंटरनेट सेवा तात्पुरती स्थगीत केल्ली.
लोकांनी भलायकी आनी कुटुंबकल्याण मंत्री सपम रंजन हांच्या लाम्फेल सानकीथेल भागांतल्या घराचेर हल्लो केला. उपरांत गिरायक वेव्हार आनी भौशीक वितरण मंत्री एल सुसिंद्रो सिंह हांच्याय घराचेर हल्लो केलो.
बंडखोरांच्यो कुडी चुराचांदपूराक व्हेलीं
मजगतीं, फाटल्या सोमारा जिरीबामांत सुरक्षा दळां कडेन जाल्ल्या एन्कावंटरांत मरण आयिल्ल्या १० कुकी-झो तरणाट्यांच्यो कुडी चुराचंदपूराक व्हेल्यात. आसामाच्या सिलचार शारांत तांचो पोस्टमार्टम जालो. ते उपरांत तांच्यो कुडी विमानांतल्यान चुराचंदपूराक व्हेल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
