भांगरभूंय | प्रतिनिधी
मड्यांची सोसायटी- ही अरविंद पांडुरंग भाटीकार हांची कादंबरी निकतीच उजवाडाक आयल्या. ‘कर्मण्ये… काल, आज, फाल्यां’ (2021), ‘संघर्श’ (2023) ह्या दोन कादंबरींच्या उपरांतची ही भाटीकारबाबांची तिसरी कादंबरी.
ही कादंबरी आसा गोंयच्या हावसिंग सोसायटींनी चलिल्लो भ्रश्टाचार आनी हावसिंग सोसायटीच्या वांगड्यांची सोसायटीच्या कामकाजाविशीं आनी भ्रश्टाचारा विशीं आशिल्ली अनास्था आनी घाळपण. हो एक ज्वलंत विशय.
ह्या कादंबरीचो नायक आसा बाळू काकोडकार. बाळू काकोडकार हो एक स्वातंत्र सैनीक आनी पेशान शिक्षक. शिक्षकाच्या नोकरेंतल्यान बसपगारी जातकूच तो एका व्हडल्या हावसिंग सोसायटींत फ्लॅट घेवन रावता. मुळांत चळवळी आशिल्ल्यान निवृत्त जातगीर लेगीत तो सरकारी अन्याया आड झुजत आसता. बाळू काकोडकाराक तागेलो राबितो आशिल्ल्या हावसिंग सोसायटींत पदाधिकाऱ्यांनी केल्ल्या भ्रश्टाचाराची सुलूस लागता. तो सगळी म्हायती एकठांय करता आनी पदाधिकाऱ्यां आड सरकाराक निवेदन दिता.
सोसायटीच्या पदाधिकाऱ्यांक बाळू काकोडकार हांणी सरकारी दरबारांत तांचे आड निवेदन दिलां म्हण क़ळटा आनी सरकारी दरबारांत वट आशिल्ले ते पदाधिकारी ती केस चिड्डुपाचो यत्न करतात. बाळू काकोडकाराक हर तरेन त्रास दिवपाक सुरु करतात. बाळूच्या प्रयत्नाक येस मेळचें न्हय म्हण धडपड करतात.
सोसायटीचो एकूय वांगडी बाळूक मदत करना. वेल्यान बाळूक ह्या जाण्ट्या पिरायेचेर ह्या लफ़ड्यांत कित्याक पडपाक जाय म्हणीत सोसायटीच्या पदाधिकाऱ्यांनी केल्ल्या भ्रश्टाचाराचें समर्थन करतात. एक खोशयेची गजाल म्हळ्यार ह्या भ्रश्ट अधिकाऱ्यांचीं तरणाटीं भुरगीं मात बाळूक येस मेळचें म्हण खूब यत्न करतात. निमणे भ्रश्ट अधिकाऱ्यांक कोर्टाकडल्यान ख्यास्त जाता आनी अजापाची गजाल म्हळ्यार सोसायटीचे वांगडी तांका तांच्या आदल्या पदांचेर वेंचूऩ हाडटात.
हावसिंग सोसायटीचे वांगडी हे सिमितेरींतल्या पुरिल्ल्या मेल्ल्या मड्यां भशेन. सगळे वांगडी जिते आसून लेगीत आपल्या हक्का विशीं जागरुक नाशिल्ले, अनास्था आशिल्ले, ‘आपल्याक कित्याक पडलां?’ ह्या भावनेन आपल्याच कोशांत रावपी जितीं मडीं. हेच खातीर लेखकान ‘मड्यांची सोसायटी’ हें कादंबरीक दिल्लें नांव सार्थ आसा.
म्हाका तर ही कादंबरी एका हावसिंग सोसायटीच्या पदाधिकाऱ्यांनी केल्लो भ्रश्टाचार आनी ताचे आड एका मनशान दिल्लें झूज इतलीच सिमीत अशी दिसना तर म्हाका आयज आमचे सरभोंवतणी घडटल्या घडणूकाचें मागीर तो आमचो वाठार जांव, आमचें शाऱ जावं, गांव जावं वा आमचो देश जावं, सगळ्या मळांचेर अशेंच घडटा ताचें हें प्रतिकात्मक मोस्त्र कशें दिसता.
हांगा म्हाका लेखकाविशीं सांगूक जाय. तांच्यो ह्यो तिनूय कादंबऱ्यो तांणी कितलेंय काल्पनीक अशें म्हळें तरी त्यो सत्य घडणुकांचेर आदारल्यात हें जाणवता. दुसरो म्हाका उल्लेख करपाक जाय तो लेखकाच्या लेखन शैली विशीं. तांच्या लिखाणांत लालित्य जरी नासलें तरी तांचें लिखाण प्रामाणीक आसा. कांदबरीचो विशय सुरवात धरुन निमणे मेरेन तांचे तकलेंत फ़िट्ट आसा. त्या खातीर ह्या कथनांत खंयच पाल्हाळ ना, पानां वाडोवपा खातीर डायल्यूशन ना. क़थेंत आडकथा ना, सरळ मार्गान वचपी ही वाचनीय कादंबरी. वाचकान एकदां वाचपाक घेतली तर ती पुराय वाचल्या बगर सकयल दवरन दिसना हेंच लेखकाचें येस.
ह्या कादंबरींत जे फ़ेक्टस आयल्यात ते सामके अस्सल. हावसिंग सोसाय़टीचें कामकाज, ताचे कायदे, फ़ौजदारी कायदे, इमारत बांदपाखातीर लागपी वस्तू, तांचें मोल, हाची म्हायती लेखकांन घेतल्या आनी तेखातीर हें लिखाण़ authentic जालां. ह्या वयार लेगीत इतले तपशील एकठांय करुऩ आपलें लिखाण authentic आसचें ही तांची लागणूक पळयल्यार भाटीकारबाब तोखणायेक पात्र आसात.
ह्या कादंबरीच्या मुखचित्राची संकल्पना श्रेया बोरकार आनी स्नेहलता भाटीकार हांची आसा आनी मुखचित्र ह्या कादंबरीक योग्य अशें जालां. कोंकणी कादंबरीचें दालन हे कादंबरीन वाडयलां. सोबीत तरेन संजना पब्लिकेशन्सान ती छापल्या आनी उजवाडायल्या. ते खातीर दिनेशबाब मणेरकार हांका परबीं. 278 पानांच्या ह्या कादंबरीचें मोल आसा 350 रुपया.
सखाराम शेणवी बोरकार
9923306751
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
