भांगरभूंय | प्रतिनिधी
असो मार्ग निवडात जो तुमकां पाखां दितलो आनी मायभुंयेची सेवा करपाचो मान मेळोवन दितलो.
विंग कमांडर नेहा विवेक मराठे (सेवानिवृत्त) ह्यो समर्पण, जिद्द आनी आव्हानांचेर जैत मेळोवपी एक देखदिणें उदाहरण आसात. मडगांवात जल्मल्ल्या आनी वाडिल्ल्या नेहा हांचो एका स्वप्नाळू चलये सावन ते भारतीय हवाई दलांतल्या एका नामनेच्या इंजिनिअरिंग ऑफिसरा मेरेनचो प्रवास हो देशा खातीर 14 वर्सांचे गौरवशाली सेवेचो काळ आसा. ही मुलाखत म्हजे खातीर वैयक्तीक रितीन खूब खाशेली आसा; कारण नेहाची आवय, नीलम मराठे आनी हांव चौगुले कॉलेजींतले सांगाती. तांचे चलयेन गांठिल्ली ही उंचाय पळोवन म्हाका एक इश्ट म्हणून खूब अभिमान भोगता. हांवें तांच्या स्फूर्तीदायक प्रवास, तांचीं आव्हानां आनी मळबाची राखण करताना तांकां मेळिल्ल्या मोलीक धड्यां विशीं संवाद सादलो.
जॉन आगियार: तुमचें भुरगेपण मडगांवांत गेलें आनी तुमी महिला आणि नूतन इंग्लिश हायस्कूलांत शिक्षण घेतलें. गोंयच्या त्या सुरवेच्या वर्सांनी तुमच्यांतलो अधिकारी घडोवपाक कशी मदत केली?
विंग कमांडर नेहा मराठे: म्हजे बाबा विवेक आनी आवय नीलम मराठे हेच म्हजे आधारस्तंभ. तांणी ल्हानपणा सावन म्हज्या मनाचेर कोरांतलें की खंयचेंय सपन कठीण आसना. आवयन म्हज्या शिक्षणाचो घट बुन्याद घाली. जाल्यार म्हजे बापूय स्वता एक खेळाडू आशिल्ल्यान तांणी म्हाका आनी म्हजे भयणीक खेळ आनी हेर उपक्रमांनी बरी कामगिरी करपा खातीर उमेद दिली. ह्या वातावरणामुळे हांव एक अष्टपैलू व्यक्ती म्हणून घडलें आनी म्हाका बॅडमिंटनंत दोनदा ‘नॅशनल स्कूल गेम्स’ मध्ये गोंयचें प्रतिनिधित्व करपाची संद मेळ्ळी.
0 जायतीं भुरगीं वेगवेगळ्या करियराचीं सपनां पळयतात, पूण सशस्त्र दलांत वचपाची ओढ कांय वेगळीच आसता. हवाई दलाचो गणवेशाची इत्सा केन्ना जाली?
– आठवेंत आसताना हांवें टिव्हीचेर भारतीय हवाई दलाचेर आदारीत एक मालिका पळयली आनी तो खीण म्हज्या आयुष्याचो टर्निंग पॉईंट थारलो. त्या गणवेशांतली शिस्त, उदेश, साहस आनी अभिमान हांचो म्हज्या मनाचेर खोल परिणाम जालो. त्या आदराचें रूपांतर रोखडेंच एका जिद्दीत जालें. त्या दिसा सावन हांव खंयच्याय हवाई दल अधिकाऱ्या भशेनूच जगूंक लागलें— शाळेतली तोंडी परीक्षा आसूं वा सर्ती, दर एका आव्हाना खातीर हांव स्वताक मानसिक रितीन तयार करूंक लागलें.
0 सपन पळोवप सामकें सोंपें, पूण तें प्रत्यक्षांत हाडपा खातीर खूब तयारी लागता. चड करून वेर्णाच्या पाद्रे कॉन्सेसाओ कॉलेज ऑफ इंजिनिअरिंगांत (PCCE) शिक्षण घेताना तुमी तुमच्या ध्येया कडेन पावल कशें मारलें?
– जेन्ना हांवें म्हजें स्वप्न म्हज्या पालकांक सांगलें, तेन्ना तांणी म्हाका फकत फाटबळूच दिलें ना, जाल्यार ते म्हजे घट आधारस्तंभ बनले. हांवें 10 वी उपरांत मुद्दाम विज्ञान शाखा निवडली आनी ताचे उपरांत PCCE तसल्यान इंजिनिअरिंग पूर्ण केलें. म्हजें ध्येय सदांच दोळ्यां मुखार आशिल्लें. हांव वर्तमानपत्रां वाचप, चालू घडामोडींचेर बारीक नदर दवरप आनी स्वताच्या नोट्स तयार करप हाचेर पूर्ण लक्ष दितालें.
0 म्हाका अशें समजलें की हवाई दलांत वचपा पयलीं तुमकां एके नामनेच्या कंपनींत नोकरी मेळिल्ली. त्या रोमांचक प्रसंगा बदल कांय सांगाल?
– हय! इंजिनिअरिंगच्या निमण्या वर्सा ‘टाटा कन्सल्टन्सी सर्व्हिसेसांत’ (TCS) म्हजी निवड जाल्ली. पूण म्हजें मन मात हवाई दलांतूच आशिल्लें. पदवी मेळ्ळे उपरांत फकत दोन म्हयन्यांत हांवें ‘सर्व्हिसेस सिलेक्शन बोर्ड’ (SSB) ची मुलाखत दिली आनी पयल्याच यत्नांत येश मेळ्ळें! मेरिट लिस्टाची वाट पळयता आसताना हांवें अहमदाबादांत TCS चें ट्रेनिंग जॉयन केलें. ट्रेनिंगाच्या फकत दुसऱ्याच दिसा मेरिट लिस्ट जाहीर जाली आनी म्हजें नांव तातूंत आशिल्लें! तो म्हज्या आयुष्यांतलो सगळ्यांत उमेदीचो खीण आशिल्लो. हांवें रोखडेंच TCS सोडलें आनी एअर फोर्स अकॅडमीत वचपा खातीर खोशेन घरा परत आयलें.
0 तुमी जानेवारी 2011 मध्ये अधिकृतपणान हवाई दलांत रूजू जाल्यात. तुमची भूमिका आनी ह्या 14 वर्सांच्या सेवेन तुमकां कितें शिकयलें?
– हांवें ‘एअर डिफेन्स इंजिनिअरिंग ऑफिसर’ म्हणून काम केलें, जंय मळबाचें रक्षण करपी म्हत्त्वाच्या यंत्रणांची जापसालदारकी म्हजे कडेन आशिल्ली. ईशान्ये कडल्या अटंग्या रानां सावन ते अस्तंतेतल्या गरम रेंवटां मेरेन म्हजी बदली जाली. दर एका पोस्टिंगान म्हाका म्हजे मर्यादे भायर वचपाक भाग पाडलें आनी म्हाका नेतृत्व, जिद्द आनी सांघिक कार्याचे मोलादीक धडे दिले. म्हज्या बापायच्या पिरायेच्या अणभवी सैनिकांचें नेतृत्व करतना म्हाका हें समजलें की खरें नेतृत्व फकत पदान मेळना, जाल्यार तें तुमच्या कार्यक्षमतेन, धैर्यान आनी सातत्यान मेळोवचें लागता.
0 प्रजासत्ताक दिनाच्या 2015 चे परेडींत तुमी एका ऐतिहासिक खिणाचे साक्षीदार आशिल्ले. राजपथाचेर संचलन करताना तुमच्या मनांत कसले विचार आशिल्ले?
– तो खात्रीन म्हज्या कारकिर्दीतलो सगळ्यांत अभिमानाचो खीण आशिल्लो. परेडींत पयले ‘सगल्यो महिला अधिकारी’ तुकडीचो वांटो म्हणून संचलन करप अविस्मरणीय आशिल्लें. त्या इतिहासिक खिणाक राजपथाचेर ताठ मानेन चलताना, म्हाका पोरण्या परंपरांच्यो वण्टी मोडिल्ल्याचो आनी बदलत्या भारताचें प्रतिनिधित्व करत आशिल्ल्याचो सार्थ अभिमान भोगलो.
0 वैयक्तीक पांवड्यार सांगपाचें जाल्यार, हवाई दलान तुमकां फकत करियरूच दिलें ना, जाल्यार ताचे परसय बरेंच कितें दिलें, न्हय?
– नक्कीच. प्रशिक्षणा दरम्यानूच म्हाका म्हजो जोडीदार मेळ्ळो, तेय हवाई दलांत अधिकारी आसात आनी आमकां एक चली आसा. भारतीय हवाई दलान म्हाका फकत करियर दिलें ना, जाल्यार उडपा खातीर पाखां दिलीं. ह्या दलान म्हजें व्यक्तिमत्व घडलें आनी म्हाका आपल्या देशाची महान विविधता अणभवपाची संद दिली.
0 गोंयच्या तरणाट्यांक संरक्षण दलांत वचपा खातीर उमेद दिवपाक तुमी सदांच उत्सुक आसतात. संरक्षण मळार करियर करपा विशीं दोट्टी मनस्थितीत आशिल्ल्या तरणाट्यांक तुमी कितें सांगतलीं?
– गोंयच्या तरणाट्यांक म्हजो संदेश एकदम सादो आसा: तुमच्या ‘कम्फर्ट झोनां’तल्यान भायर सरपाक भियेंनाकात. जायत्या फावटीं आमी कॉर्पोरेटांतली “सुरक्षित” वाट निवडटात. कारण ती वळखीची दिसता, पूण भारतीय सशस्त्र दलां अशें आयुष्य दितात जें हेर खंयच्याय वेवसायांत मेळना. ही फकत “नोकरी” न्हय, जाल्यार तें एक “आव्हान” आसा.
भुरग्यांक हांव सांगीन की गोंयाक बलिदानाचा आनी योगदानाचा व्हड इतिहास आसा आनी भारतीय लश्कराक हुशार तरणाट्यांची गरज आसा. तुमी मडगांवचे आसूं, पणजीचे वा खंयच्याय ल्हान गावांतले, हवाई दलांत फकत तुमची गुणवत्ता आनी समर्पणूच महत्त्वाचें थारता. ह्या दलान एके ल्हान चलयेच्या स्वप्नाक अर्थ दिलो, तेंच तुमच्या खातीरय घडूंक शकता. विमानां पयस सावन पळोवं नाकात; तातूंत उडपाचें वा मळबाचें रक्षण करपी तंत्रज्ञान हाताळपाचें ध्येय दवरात. असो मार्ग निवडात जो तुमकां पाखां दितलो आनी मायभुंयेची सेवा करपाचो मान मेळोवन दितलो.
जाॅन आगियार
सलाम फौजी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
