मडगांव सिने लता वाठारांतल्या आनीक एके इमारतीचो भाग कोसळ्ळो
भांगरभूंय | प्रतिनिधी
मडगांव : मडगांव शारांतल्या गांधी मार्केटा लागसार आशिल्ल्या धोक्याचें इमारतीचो एक भाग शुक्रारा दनपारां कोसळ्ळो. मागीर शेनवारा सकाळीं सिने लता वाठारांतले एके इमारतीचो भाग कोसळ्ळो. हातूंत कसलेंच लुकसाण जालें ना, कोणाक दुखापत जावंक ना. पूण खंयचीय अप्रिय घडणूक घडचे पयलीं पोरणें इमारतीं संबंदी ठोस उपाय करचे अशी मागणी नागरिकांनी केल्या.
मडगांवांतल्या पोरणें आनी धोक्याचें इमारतींचो प्रस्न परत एक फावट चर्चेंत आयलां. शेनवारा सकाळीं मडगांवांतल्या पालिका इमारती फाटल्यान आशिल्ल्या सिने लता वाठारांतल्या पोरणें आंताव इमारतीच्या बाल्कनीचो एक भाग कोसळ्ळो. ही दुर्घटना सकाळच्या वेळार जाल्ल्यान कोणाक दुखापत जावंक ना आनी कसलेंच लुकसाण जावंक ना. पूण त्याच इमारतीत जायतीं दुकानां चलतात. जायते गिरायक थंय खरेदी करपाक येतात. अशे परिस्थितींत इमारतीचो आनीक कांय भाग कोसळ्ळो जाल्यार अप्रिय घडणूक घडूंक शकता. ताका लागून अशा इमारतीं विशीं उपाय काडून बेगोबेग निर्णय घेवपाची गरज आसा.
मडगांवचे हे घडणुके उपरांत येरादारी पुलिसांनी हो रस्तो येरादारी खातीर बंद केलां. तशेंच मडगांवचे पुलीस निरिक्षक सूरज सामंत हांणी घडणुक सुवातेर वचून सुरक्षे खातीर कारवाय सुरू केली. वीज खात्याच्या कर्मचाऱ्यांनी धोक्याचे वीज लायनींची वीज पुरवण बंद केल्या. मजगतीं, पालिका कामगारांनी पडिल्ले स्लॅबाचे कुडके एकठांय करून ते कुशीक काडपाचे काम सुरु केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
