भांगरभूंय | प्रतिनिधी
रावणफोंड रेल्वे पूल येरादारी खातीर बंद, रस्त्यांचेर उदक
भांगरभूंय । प्रतिनिधी
मडगांव : मडगांवां सयत साश्ट वाठाराक पावसान नेटाचो झोड दिलो. मडगांवच्या चडश्या रस्त्यां वयल्यान उदक व्हांवतना दिसतालें. खणिल्ल्या रावणफोंड रेल्वे पुला लागसारचो रस्तो नेमपाचो धोको आशिल्ल्यान येरादारी दुसरे वटेन घुंवडायल्या. तशेंच कांय वाठारांनी झाडां पडून लुकसाण जालां.
मॉन्सूनपूर्व पावसाचो चड मार मडगांव, फातोड्डें, नावेली सयत साश्टीच्या विवीध वाठारांक बसला. कोंब मडगांवच्या रेल्वे अंडरपास सयत सुरावलीच्या अंडरपासांत लेलगीत उदक सांचिल्लें. तळेबांदच्या वेस्टर्न बायपासा लागसारच्या व्हाळांतल्यान व्हड प्रमाणांत उदक व्हांवतालें आनी तळ्यांतल्या लेगीत उदकाची पातळी वाडटाली. मंगळारा रातीं आंकेंतल्या कायजी इमारतीच्या बेसमेंटांत उदक सांचून मोटारींचे टायर उदकांत बुडिल्ले. तशेंच लिफ्टींत आडकल्ल्या सुरक्षा रक्षकांक उजो पालोवपी दळान भायर काडलो. पॉवर हावसा लागसारच्या व्हाळांतलें उदक वाडून घरांनी उदक वचपाक लागिल्ल्यान स जाणांक उजो पालोवपी दळाच्या जवानांनी 6 जाणांक भायर काडले. बुधवारा सकाळीं रावणफोंड सर्कला कडल्यान रेल्वे स्टेशना कडेन वचपी रस्त्याचेर, नावेली शांतीनगर वाठारांत, पोरण्यां रेल्वे स्टेशन वाठारांतल्या रस्त्याचेर उदक संचिल्ल्यान चलत वचपी लोकांक आनी वाहन चालकांक त्रास सोंसचो पडलो.
रावणफोंड रेल्वे पुला लागसार नवो स पदरी पूल बांदपाचें काम चालू आसा. थंय पोरण्या रस्त्याची माती कोसळपाक लागिल्ल्यान रस्त्या वयली येरादारी बंद केली आनी दवर्ली रेल्वे गेट मार्गान घुंवडायली. ह्या पुलाच्या कामाची आमदार दिगंबर कामत हांणी बुधवारा पळोवणी केली.
फातोड्डें कदंब बसस्टॅण्डा लागसारच्या व्हाळाचें काम पुराय जावंक नाशिल्ल्यान उदक परतून फाटीं येवपाची घडणूक घडली. ते उपरांत आमदार विजय सरदेसाय हांणी पळोवणी केले उपरांत सांगलें, कोणाक कल्पना नासतना अचकीत व्हड पावस आयला. गोंय सरकार आनी लोकांनी एकवटान काम करपाची गरज आसा. सरकारान आपत्ती वेवस्थापना खातीर चड निधी दिवपाची गरज आसा. भुंयगत वीज केबल घालपाच्या कामा वेळार चुकीच्या खणकामाचो मार बसता. पालिकेन मॉन्सूनपूर्व कामां पुराय करूंक नात, पूण उदक व्हांवून वचपाच्यो वाटो आदले वरी करतले, अशें स्पश्ट तांणी स्पश्ट केलें.
मडगांवच्या मोतीदोंगरार देव नायक हाच्या घराचेर झाड पडिल्ल्यान घराचें लुकसाण जालें. पूण कोणाक दुखापत जावंक ना. चिंचणी भलायकी केंद्रा लागसारच्या रस्त्याचेर माड पडिल्ल्यान येरादारीक आडखळ जाली. असोळण्यां सेप्टीक टँक उदकान भरलो आनी लागींची राखणे वणत लेगीत कोसळ्ळी. फातोड्डें वाठारांत लेगीत रस्त्याचेर माती व्हांवून येवप आनी राखण वणत कोसळपाच्यो घडणुको घडल्यो.
भुंयगत वीज केबलां केल्लें खणकाम घातक
नावेली वाठारांत भुंयगत वीज केबलां खातीर खणकाम केल्लें. कामा उपरांत ताचेर मातयेचो भराव घालून दवरिल्लो. ताचेर पावसाळ्या आदीं दुरुस्तीचें काम करतले, अशें सांगिल्लें, मात तीं कामां जावंक नात. ह्या खणकाम केल्ल्या रस्त्यां वयल्यान वतना माती खाला गेल्ल्यान आतां गाडयो लवंडपाच्यो दोन घडणुको रावणफोंड सर्कला लागसार आनी मंडोप वाठारांत घडल्यो. ताका लागून वीज केबलां खातीर केल्लें खणकाम येरादारीक घातक थारता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
