मडगांव रेल्वे स्टेशनाचेर परतून बेकायदेशीर बीफ जप्त
भांगरभूंय | प्रतिनिधी
मडगांव : दिल्लींतल्यान आयिल्लें बीफ मडगांव रेल्वे स्टेशनाचेर हिंदू संघटणांनी जप्त करून पुलिसांच्या ताब्यात दिलें. सुमार 800 किल बीफ आसपाची शक्यताय आसा. ही घडणूक हिंदू संघटनांनी उक्ती केल्या आनी पार्सल घेवपाक आयिल्ल्या एका दुबाविताक कोंकण रेल्वे पुलिसांच्या ताब्यात दिलां.
केसरिया हिंदू वाहिनी गौरक्षक विभागाच्या राजीव झा हांकां मडगांव रेल्वे स्टेशनाचेर सव्या क्रमांकाच्या प्लॅटफॉर्माचेर रेल्वेंतल्यान आयिल्ल्या पार्सलांतल्यान वास येता अशी म्हायती मेळ्ळी. तांणी कोंकण रेल्वे पुलिसांक कळयलें आनी घडणुकेच्या थळार वचून पार्सल उगडले तेन्ना तातूंत हेर मांसा वांगडा बेकायदेशीर रितीन हाडिल्ले बीफ मेळ्ळे. उल्लेख केल्लो पार्सल व्हरपाक आयिल्लो पणजेचो अख्तर बेपारीक हिंदू संघटणेच्या कार्यकर्त्यांनी धरुन पुलिसांच्या ताब्यात दिलो.
आयिल्ल्या पार्सलाच्या बॉक्सांत चिकन आनी मटन आशिल्लें, तेच बरोबर बीफूय आशिल्लें. हें पार्सल दोन दीस आदिं दिल्लींतल्यान धाडिल्ले ताका लागून तातूंतल्यान उदक व्हांवताले आनी ताचो घाण वास येतालो. आतां 70 किल वजनाची 11 पार्सल मेळ्ळ्यात. अशे तरेन दुसऱ्या राज्यांतल्यान बेकायदेशीर रितीन बीफ हाडून राज्यांत विकतात. असले प्रकार पुरायपणान बंद करपाची मागणी बजरंग दलाच्या भगवान रेडकारान केल्या. कोंकण रेल्वे पुलीस हे प्रकरणाची फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
