भांगरभूंय | प्रतिनिधी
मंत्री कामत : राष्ट्रीय युवा दिसा निमतान मडगांवां सुवाळो
मडगांव : स्वामी विवेकानंद हांचें एक तरी यादस्तीक गोंयांत आसचें अशी मागणी राज्यभरांतल्यान जाता. ते प्रमाण मडगांव रवींद्र भवन वाठारांत स्वामी विवेकानंद हांचो पुतळो आनी यादस्तीक उबारपा खातीर यत्न जावचे, अशें बांदकाम मंत्री दिगंबर कामत हांणी म्हणलें. सगल्या तरणाट्यांनी स्वामी विवेकानंदांचो आदर्श आपणावचो अशें तांणी सांगलें.
स्वामी विवेकानंद हांचे १६३ वे जयंती निमतान रवींद्र भवन, मडगांव वतीन कार्यावळीचें आयोजन केल्ले तेन्ना मंत्री कामत उलयताले. तांचे वांगडां भाजप प्रदेशाध्यक्ष दामू नायक, मनोहर बोरकार, वांगडी सचिव आशा हरमलकार, योगिराज कामत, राजेंद्र तालक हाजीर आशिल्ले. ह्या वेळार अॅड. सिद्धी एम. पारोडकार, डॉ. आकाश ए. रिंगणे, शुभम नायक, अर्जुन फळारी, कल्पिता एस. नायक, निलय नायक ह्या तरणाट्यांक ‘यंग अचिव्हर पुरस्कार २०२६’ भेटयलो.
मंत्री कामत हांणी मुखार सांगलें, स्वामी विवेकानंद हांची जयंती देशांत राष्ट्रीय युवा दिन म्हणून मनयतात. भारताचें नांव तांणी संवसारभर पावयलें. तरणाट्यांक सध्याच्या काळांत कोणूच आदर्श नात, हाका लागून ते वायट मार्गान वतात. तांचो कोणूय गैरवापर करून घेतात. हाका लागून विवेकानंद हांच्या कार्याची म्हायती घेवन तांचो आदर्श सद्याचे पिळगेन घेवचो.
दामू नायक हांणी सांगलें, स्वामी विवेकानंद हे तरणाट्यांचे गुरु आनी आदर्श. तांणी वेद, अध्यात्म हांचें म्हत्व संवसाराक पटोवन दिलें. वट्ट ३९ वर्साचे जिणेंत तांणी देश, धर्म आनी अध्यात्मीक कार्य संवसारभर पावयलें आनी भारतीय संस्कृतीक मान मेळोवन दिलो. तांणी गोंयांतूय येवन राशोल सेमिनरीत क्रिस्तांव धर्माचो अभ्यास केला. भुरग्यांनी स्वामी विवेकानंद हांचे जिणेचेर आशिल्लीं पुस्तकां वाच्चीं.
उपरांत विवेकानंद केंद्र, कन्याकुमारी – गोंय फांटो हांचे राज्य संयोजक वल्लभ लक्ष्मण केळकार हांचें स्वामी विवेकानंद हांची जीण आनी विचारांचेर आधारीत व्याख्यान जालें. सुत्रसंचालन श्रुती हजारे हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
