भांगरभूंय | प्रतिनिधी
पणजीः कोकण रेल्वेन ७३९ किमी रेल्वे मार्गाचें दोट्टीकरण करपाचें काम हातांत घेतलां. तातूंत गोंयांत मडगांव ते माजोड्ड्यां रेल्वे स्टेशना मजगतीचें रेल्वे मार्गाचें दोट्टीकरण पुराय जालां. गोंय सरकाराचे गुंतवणूकी खातीरचें योगदान घेवन उरिल्ल्या दोट्टीकरणाचें काम पुराय करतले, अशी म्हायती केंद्रीय रेल्वे मंत्री आश्विनी वैष्णव हांणी लोकसभेंत दिल्या.
लेखी जापेंत वैष्णव हांणी सांगलें, रेल्वे मंत्रालय, महाराष्ट्र, गोंय, कर्नाटक आनी केरळ सरकार ह्या पांच भागधारकांक घेवन कोंकण रेल्वे महामंडळ लिमिटेडची स्थापना वर्स १९९०त जाल्ली. कोंकण रेल्वेंत सगळ्यांत व्हडलो ६६.३५ टक्के वाटो रेल्वे मंत्रालयाचो आसा, १५.११ टक्के वाटो महाराष्ट्र सरकाराचो, कर्नाटक सरकाराचो १०.३० टक्के वाटो, गोंय आनी केरळ सरकारचो दरेकी १४.१२ टक्के वाटो आसा.
सद्या कोंकण रेल्वेच्या मंगळूर-मुंबय क्षेत्रांत २८ जोडयो ट्रेनी धांवतात जाल्यार मंगळू-मडगांव क्षेत्रांत ३३ जोडयो ट्रेनी धांवतात. तशेंच गोंयां खातीर ४ वंदे भारत ट्रेन सेवेचो आस्पाव केलो आनी ह्यो ट्रेनी मंगळूर-मडगांव आनी मडगांव-मुबंय मार्गार धांवतात.
कोकण रेल्वेच्या कार्यकक्षेंत येवपी ७३९ किमी रेल्वे दोट्टीकरण करपाचे काम हातांत घेतलां. तातूंतले रोहा-वीर आनी मडगांव-माजोड्डा विभागांतल्या ५५ किमी रेल्वे दोट्टीकरणाचें काम पुराय जालां. उरिल्लें ६८५ किमी मार्गाचें दोट्टीकरण करपाचें अजूनय उरलां. हे खातीर भागधारक राज्याच्या योगदाना सयत भरीव गुंतवणुकेची गरज आसा. राज्याचे भागधारक वांट्या नुसार राज्यांनी भांडवल गुंतवणुकी खातीर आपले योगदान दिवपाक सांगपा खातीर रेल्वे मंत्रालय राज्य सरकाराक येवन मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
