भांगरभूंय | प्रतिनिधी
4.45 किमीचो स पदरी उड्डाण पूल लेगीत बांदतले
भांगरभूंय । प्रतिनिधी
पणजीः राष्ट्रीय म्हामार्ग 66 वयल्या मडगांव बायपास ते कुंकळ्ळी मेरेनच्या 7.24 किमी लांबायेच्या मार्गाचे उदरगती खातीर केंद्र सरकारान 747 कोटी रुपयांचो निधी मंजूर केला. ह्या मार्गाचेर 4.45 किमी लांबायेचो स पदरी उड्डाणपूल लसेगीत बांदतले.
केंद्रीय रस्ते येरादारी आनी म्हामार्ग मंत्री नितीन गडकरी हांणी फाटल्या 10 वर्सांत गोंयांतले रस्ते, म्हामार्गां विशींच्यो मुळाव्यो सुविदा वाडोवपाचेर भर दिला. ते खातीर तांणी कोटींनी रुपयांचो निधी गोंयाक दिला. तातूंतल्यान अटलसेती, जुंवारी पूल हे सारके खूबशे प्रकल्प उबे रावल्यात.
कांय दिसां आदीं गडकरी हांणी बेंदोर्डे ते पोळे ह्या काणकोण बायपासाक जोडपी 22.10 किमी लांबायेच्या रस्त्याच्या चारपदरीकरणा खातीर 1,376 कोटी रुपयांचो निधी मंजूर केल्लो. ते उपरांत आतां मडगांव बायपास ते कुंकळ्ळी मेरेनच्या मार्गाचे उदरगती खातीर 747 कोटी रुपया मंजूर केल्यात.
मडगांव बायपास ते कुंकळ्ळी हो साश्ट म्हालांतलो भाग मुंबय- कन्याकुमारी 4/6 लेन कॉरिडोराचो म्हत्वाचो भाग जायत आसा. ते खातीर ह्या मार्गाची उदरगत जाली जाल्यार आनी उड्डाणरपूल बांदलो जाल्यार ह्या वाठारांतले येरादारीचे कोंयडीचेर नियंत्रण हाडप तशेंच वाहनचालकांचो वेळ वाटावपाक व्हड मजत जातली.
मोदी, शाह, गडकरी हांचें तानावडे हांणी मानले उपकार
मडगांव बायपास ते कुंकळ्ळी मेरेनच्या मार्गा खातीर केंद्र सरकारान 747 कोटी रुपयांचो निधी मंजूर केल्ले खातीर राज्यसभा खासदार तशेंच भाजपा प्रदेशाध्यक्ष सदानंद शेट तानावडे हांणी प्रधानमंत्री नरेंद्र मोदी, गृहमंत्री अमीत शाह आनी रस्तो येरादारी तशेंच म्हामार्ग मंत्री नितीन गडकरी हांचे उपकार मानलें. केंद्रांतल्या भाजप सरकाराच्या फुडारपणा खाला गोंयान 10 वर्सांत दोळ्यांत भरपा सारकी उदरगत पळयल्या. गोंयची सर्वांगी उदरगत करचे खातीर केंद्र सरकारा कडल्यान सदांच यत्न चल्ल्यात, अशेंय तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
