भांगरभूंय | प्रतिनिधी
–
पणजीः मडगांव पालिकेचे नोकरभरतेंत गुड्डलूसांव जालां. पालिकेन जाहीर केल्ले लेखी परिक्षेंत उमेदवारांचे संख्येंत घोळ आसा. तशेंच सायट सुपरवायजर पद बढती दिवन भरपाक जाय तें सरळ भरतात. मडगांव पालिकेंत नोकरी चोरी चल्ल्या हें दाखोवन दिता आनी हे विशीं आमी अधिकृत कागाळ दाखल केल्या, असो आरोप कॉंग्रेसीचे मडगांव गटाचे समन्वयक सावियो कुतिन्हो हांणी केलो.
पणजे कॉंग्रेस हावजांत घेतिल्ले पत्रकार परिशदेंत सावियो कुतिन्हो उलयताले. ह्या वेळार थळावे फुडारी लिंकन गोम्स, अनवर नारू आनी अनिल आल्वारेस हजर आशिल्ले.
21 ऑक्टोबर 2024 त मडगांव पालिकेन दिसाळ्याचेर 11 एलडीसी, सायट सुपरवायजर आनी सहाय्यक गवणो दरेकी एक पद उजवाडाक हाडिल्लीं. मात 10 म्हयने जावन गेले तरी हीं पदां खंय पावलीं हाची वाट बेरोजगार तरणाटे पळयताले, अशें कुतिन्हो हांणी सांगलें.
10 म्हयन्यां उपरांत 11 ओगस्ट 2025 त जायरात उजवाडाक हाडून एलडीसी खातीर 23 ऑगस्ट, सायट सुरपरवायजर आनी गवण्या खातीर 24 ओगस्टाक लेखी परिक्षा जाहीर केली. हे परिक्षेंत एडमीट
कार्ड सक्तिचें आशिल्लें. मात हें एडमीट कार्ड 14 ओगस्टाक पोस्ट ऑफिसान धाडलें. मात हे सुटयेचे दिस आशिल्ल्यान वेळाभितर एडमीट कार्ड वेळार पावूंक ना आनी फकत 50 टक्के उमेदवारांनी लेखी परिक्षा दिली, असो आरोप कुतिन्हो हांणी केलो.
हे जायरातींत 1 ते 1767 मेरेन सीट नंबर नमुद केल्ले. ह्या पदां खातीर 1767 अर्ज आयल्या आसतले असो अर्थ जाता. मात जेन्ना आरटीआय वरवीं ह्या पदां खातीर वट्ट अर्ज कितले मान्य जाल्यात हाची जाप मागली तेन्ना 1398 अर्ज मान्य जाल्यात अशी आमकां जाप मेळ्ळी. 1398 अर्ज मान्य जाल्या जाल्यार 1767 इतले सिट नंबर कशे दिवपाक शकतात, असो प्रस्न कुतिन्हो हांणी विचारलो. हे उरिल्ले 300 अर्ज खंयच्यान आयले. हातूंत दिसून येता की उपरांत कोणेंतरी अर्ज केला आसत वा तांचे कार्यालयांतलेच कोण तरी थेट नियूक्त जाला आसूंये. जांकां नियूक्त करपाक जाय तांकां प्रस्नपत्रिका लिक करून तांच्या फावरांत हो निकाल दिवपाचो यत्न जाला आसूं ये, असोय आरोप कुतिन्हो हांणी केलो.
अस्तिवांत आशिल्ले भरती स्पश्ट सांगता, सायट सुपरवायजर फक्त बढती दिवनच भरपाक मेळटा. ह्या पदाची सरळ भरती करिनासतना जे वरीश्ठ सुपरवायजर आसात, जांचेकडेन तीन वर्सांचो अणभव आसा तांकांच हें पद दिवपाक जाता, असो युक्तिवाद कुतिन्हो हांणी केलो.
भाजप सरकार आनी तांचें तिसरें इंजीन मडगांव नगरपालिकेन आमी करता तो कायदो अशी भुमिका घेतल्या. मडगांव पयलीं आमी नोट चोरी उक्तडार हाडिल्ली आनी आतां हांगासर नोकरी चोरी चालू आसा. आमी कांय उमेदवरां वांगडा हे विशीं मुखेल सचीव, शार उदरगत सचीव आनी पालिका प्रशासकाकडेन कागाळ दाखल केल्या, अशें कुतिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
