मडगांव पालिकेंत चल्ल्या एजंटगिरी

भांगरभूंय | प्रतिनिधी

सावियो कुतिन्होः कारवाय करपाची मागणी

भांगरभूंय । प्रतिनिधी

मडगांवः एक मनीस पोतयेंत सुमार 100 फायली घेवन मडगांव पालिकेंत येता. दरेका अभियंत्या कडेन वचून सयो घेता. ही एजंटगिरी बंद जावपाची गरज आसा. अर्जदार नाशिल्ल्या मनशाक पालिकेंतल्यो फायली भायर व्हरपाक कश्यो दितात? मडगांव पालिकेंत जाचें काम आसा, त्या मनशानूच अर्ज दाखल करून घेवपाची गरज आसा, अशी मागणी शॅडो कावंसील फॉर मडगांव वतीन केली.

शॅडो कावंसील फॉर मडगांवचे संयोजक सावियो कुतिन्हो हांणी सांगलें, मडगांव पालिकेंत एजंटगिरी चालू आसा. लोकांचें अर्ज घेवन दुसरोच मनीस फायली घेवन पालिकेंत येता आनी सयो घेवन फायली वांगडा घेवन वता. फायली शेणटात तेन्ना एकामेकांचेर आरोप करतात. ते खातीर मडगांव पालिकेंत जाचें काम आसा, ताचेच कडल्यान मडगांव पालिकेंत अर्ज सादर करचो. ना जाल्यार त्या मनशा कडल्यान अर्ज घेवचे न्हय, अशें कुतिन्हो हांणी सांगलें. तशेंच बेकायदो बांदिल्ल्या घरांक पालिके वतीन घर नंबर दिवन तांचे कडल्यान कर वसूल करचो, अशें परिपत्रक 2022 त काडिलां. दरेके पालिकेक तें धाडलां. ह्या परिपत्रका प्रमाण फक्त मोतीदोंगर वाठारांतल्यानूच बेकायदो घरांक घर नंबर दिवचे खातीर 192 अर्ज पालिकेंत सादर केल्यात. पालिकेच्या सगळ्या वाठारांतल्यान अर्ज दाखल जावपा बदला फक्त एकाच वाठारांतल्यान अर्ज कशे येतात, हो प्रस्न उपस्थीत जाता. परिपत्रका वरवीं ह्या अर्जदारां कडल्यान 2018 सावनचे शुल्क भरून घेवप पालिकेक सक्तीचें आसा. मात पालिका अभियंत्यांचेर फक्त एकाच वर्साचें शुल्क घेवचे खातीर चेपण घालतात, अशी म्हायती मेळ्ळ्या. महसूलवाडी खातीर बेकायदो घरांक नंबर दितात अशें सांगतात, जाल्यार मडगांवच्या हेर वाठारांतल्यान बांदकामां खातीर वेगळो नेम आनी मोतीदोंगरा वयल्या बांदकामांक वेगळो नेम कित्याक? मडगांव पालिके कडल्यान पुराय शुल्क भरून घेतलें नाजाल्यार महसुलांत उणाव येतलो आनी हाका मुख्याधिकारी जापसालदार आसतलो, अशें कुतिन्हो हांणी सांगलें. आमदार दिगंबर कामत हांच्या सांगण्या वयल्यान मुख्याधिकारी काम करता, असो दावो कुतिन्हो हांणी केलो. तशेंच महसुलाचें जें लुकसाण जातलें, तें मुख्याधिकाऱ्याच्या पगारांतल्यान कापून घेवचें, अशी मागणी करतले, अशेंय कुतिन्हो हांणी सांगलें.