भांगरभूंय | प्रतिनिधी
मडगांव : मडगांव पालिके वतीन पालिका वाठाराञतलो सोपो एकठांय करपा खातीर निविदा काडली आनी ठेकेदाराची नेमणूक केली. आदल्या दिसा अर्ज अवैध थारयिल्ल्या ओम कन्स्ट्रक्शनाक दुसर्या दिसा निविदा प्रक्रियेंत घेतली आनी दुसरे एजन्सीक भायर मारली. ही प्रक्रियाच रद्द करून आठ दिसांनी विशेश बसका आयोजीत करची, अशी मागणी नगरसेवक महेश आमोणकार हांणी केली.
मडगांवचे नगरसेवक महेश आमोणकार हांणी पत्रकार परिशद घेवन सोपो कंत्राट दितना केल्ले प्रक्रियेचेर आक्षेप घेतलो. आमोणकार हांणी सांगलें, नवो नेमिल्लो ठेकेदार विक्रेत्यां कडल्यान चड पयशे घेतिल्ल्याच्यो कागाळी येतात. आतां मडगांव पालिके वतीन सोपो कर एकठांय करपा खातीर ठेकेदार नेमपाचे प्रक्रियेंत घोळ आशिल्ल्याचें उक्तें जालां. ताका लागून ही सोपो निविदा प्रक्रियाच रद्द करपाची मागणी नगरसेवक महेश आमोणकार हांणी केली.
सोपो निविदा प्रकिया पुरायेन चुकीचे पद्दतीन केल्या. २५ तारखेर ओम कन्स्ट्रक्शना कडेन प्रमाणपत्र नाशिल्ल्याचें म्हणीत तांकां भायर काडटात आनी दुसर्या दिसा प्रमाणपत्र आशिल्ल्याचें सांगून परत ताका निविदा प्रक्रियेंत घेतात. जाल्यार निविदा प्रक्रियेंत पयल्या दिसा वैध थारयिल्ले म्हाळसा एजन्सीक दुसर्या दिसा भायर काडली. ओम कन्स्ट्रक्श आनी म्हाळसा एजन्सी हांचे कडेन कागदपत्रां नासलीं आनी उपरांत कागदपत्रां जोडून ओम कन्स्ट्रक्शनाक भितर घेतलें. जाल्यार हे प्रक्रियेंत एकूच अर्ज उरिल्ल्यान ही प्रक्रियाच रद्द जावपाक शकता. हाका लागून जी निविदा प्रक्रिया जाली ताची खोलायेन चवकशी करपाची गरज आसा. हे सोपो निविदा प्रक्रियेचेर विशेश बसकेचें आयोजन फुडल्या पांच दिसांनी करचें, अशी मागणी आमोणकार हांणी केली.
तशेंच मडगांव पालिका वाठारांतल्या थारावीक स्टॉलांचेर अतिक्रमणाची कारवाय करता हें योग्य न्हय. मुख्याधिकारी मेलविन वाझ हांणी अधिकारांचो वापर करीत फुटपाथावेलो अतिक्रमण काडपाची मोहीम सुरु करची. उपजिल्लोधिकार्यांच्या आदेशा उपरांतूच कारवाय करपाचे प्रकार जावचे न्हय, अशेंय आमोणकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
